Central Sorkar Media Unit hrang hrang leh State sorkar Department thenkhatte intelkhawmna "Inter Media Publicity Coordination Committee (IMPCC), vawiina PIB Media Centre-a thukhawm chuan June thla thupui atan "Ruihhlo lakah i fimkhur zual ang u" ("Let us be more vigilant against drug abuse") tih an thlang.

Vawiin meeting-ah hian All India Radio, Doordarshan, Mizoram Khadi & Village Industries Board, Environment & Forest, Health, Agriculture, Directorate of Information & Public Relations (DIPR), AH&Vety, Directorate of Field Publicity leh Soil & Water Conservation Department te an tel a, tun thla IMPCC thupui "Kut hnathawh tihmakmawh" tih hmanga Department hrang hrang hmalak dan an sawiho a, tunhnaia Laipuitlang - Ramhlun Venglaia chhiatna thleng chungchang Doordarshan leh All India Radio ten Delhi/Guwahati lama an puanchhuah dan pawh sawilan a ni bawk.

Agriculture Department-in Farmer's Day puala kut hnathawktu hlawhtlingte hnena chawimawina an pek chhuah pawh sawilan a ni.

Vawiin meeting hi an Chairman, Doordarshan News leh PIB hotu ni bawk, Pu Mangjangam Touthang-in a kaihruai a, June ni 27 ah IMPCC hi an thukhawm leh dawn a ni.