Vawiin March 24, 2009 dar 1 (p.m) hian IMPCC Meeting chu Environment & Forest Conference Hall-ah an thukhawm a, member an kal tha hle. Pu C.Lalrosanga, Director Aizawl DDK Centre leh D.D.G, AIR, NE-II, IMPCC Chairman-in kaihruaiin, tun March thla chhunga Kangmei Ven chungchanga hma lakna chu an thlir hova; AIR leh DDK lam atang chuan mipuite fimkhur tura ngenna an tihchhuah hnem ber kum niin hriat a ni a. Local Cable Television leh Tualchhung Chanchinbu te pawhin an chhuah ngun thawkhat hlein hriat a ni.
Heti chunga kumin chhunga ram kang tam lutuk chu Mizo mipuite fimkhur tawk lohzia lantirna pakhat nia ngaiin, Forest Department emaw, tutee maw puh tur zawng ngawt lovin, ram mipuiten kan ram kang chhe tur venghim tura mawhphurhna kan nei a ni tih hriat a tulzia an tarlang bawk. Thingtlang khaw tinte, kumtina lo vata hal thinten uluk taka meilam sial a, ramchhuakten meizuk bung leh nawhalh timit lova paih mai kan chin thin te hi sim tul an tihzia uar taka sawiin, khawtina V.C. ten mahni khaw ramchhung tikang lo tura hmalak tulzia inzirtir uar tul hlein an ngai bawk.
Tunlai Mizoten sorkar leh khawtlang hruaituten thuawihna kan tlachham hle nia ngaiin, thuneitu Sorkar leh mahni khuaa khawtlang hruaitute thu awihna kawnga tan la tùrin mitin an ngen nghâl bawk a ni. Tunlaiin mi thenkhatin Sorkarin thingtlang lo neih titawp tura mipuite hamthatna thawk ngai lo anga an puhna pawh sawi langin, Mizoram Sorkar hian UT hlim atangin kawng hrang hrangin kumtina lo vata, insawn thin titawp tura ranvulh te, Terrace siam te, huan nghet neih leh thlai chi hrang hrang ching uar tura tanpuina kawng tinrenga a lo pekchhuahte a hman lohna tura hman a ni thin chu pawi an tih thu an sawi bawk.
Aizawl leh Lunglei AIR Transmitting Capacity hi a chak tawk lo hem avang leh khawl a hlui taw hem avangin Mizoram Sorkar thuneituten hma lak pui se an duh hle a, Central Sorkar thuneitute kuta hmalaksak tur pawhin Sorkar an ngen nghâl a ni.
April 16-a Lok Sabha member thlanna tur buatsaih a nih dawn avangin April thla thupui atan `Inthlannaa mipuite mawhphurhna’ an thlang a ni. Voter zawng zawngten fimkhur taka Mizoram aiawhtu tur mi tha ber thlang chhuak thiam tùrin `right’ an nei theuh a ni tih hre theuh se an duh a ni. Election-a duty tùrin Media mite- AIR,DDK, DIPR te motor leh Officer te hman loh tur a ni a, Environment & Forest Department motor leh Officer te duty-a tir lo tùrin Election Commission-in thupek a chhuah thu tarlan a ni bawk.
April 29-ah AH&Vety Conference Hall-ah Meeting hi neih leh tur a ni.
