Vawiin chawhma khan Health Directorate Conference Hall-ah Training of Trainers for reducing IMR & MMR neih a ni. He hun hi Dr. F. Lallianhlira, Joint Director (FW) chuan a kaihhruai a, Dr. Lalbiakkima, Director, Hospital & Medical Education chu khuallian a ni. Khuallian chuan kalkhawm te hnenah in lawmna thu sawi a, Mizoram State in IMR – ah Incentive Cash Award an dawn chhan chu thawktute thawhrimna vang a nih thu sawiin, hun lo kal leh zel turah pawh thawktute chu taima tak leh thanemngai taka tan la reng turin a fuih bawk a ni.

Dr. Lalthanga, State Programme Officer, RCH-in power-point hmangin thawktute, Politician te leh NGO hrang hrang te tana IMR leh MMR chungchanga hmalak dan tur aia nasa a rate tihhniam a nih theihna tura tanlak dan tur kimchang takin a entir a, sawihona neih zui nghal a ni. He hunah hian Dr. R.L. Dangvela, Head of Department (Gynae.), Civil Hospital, Aizawl chuan hmalak dan tur te, Infant Death awm chhan leh a inven dan tur pawimawh tak tak kalkhawm te hnenah a sawi bawk a ni. He training-ah hian District hrang hrang atangin C.M.O. leh Officers te, Presbyterian Hospital, Aizawl leh Serkawn Baptist Hospital atangin Medical Superintendent bakah thawktu hrang hrang an kal a, Dr. Rohmingthanga Ralte, Director of Health Services chuan lawmthu sawinain hun a khar a ni.