Vawiin khan Mizoram sawrkar leh UN thawh hona kal zel hnuaiah NLUP Conference Hall-ah Food and Agriculture Organisation (FAO) Inception Workshop buatsaih a ni a. Environment & Forest Minister Pu Lalrinmawia Ralte-in a hmanpui.

Forest Minister Pu Lalrinmawia Ralte chuan Mizorama ramngaw tam berte hi sawrkar ram ni mah se, a enkawl leh neitu nihna chu mipuite kuta awm a ni a; a enkawl zelna atana thil thar, ram tana tha tur kalpui chungchangah Department-in mipuite tawiawmna mamawh hle a ni, a ti a. Leng lal Pu Saihnuna Fanai (L) chungchang sawi langin, kum 22 a lal chhungin ram an tikang miah lo va; chu chu thangtharte’n entawn se a duhawm hle, a ti bawk.

NLUP Implementing Board Vice Chairman Pu PL Thanga chuan inlawmna thu a sawi a. ‘Afforestation and Forest Livelihood’ zir bingna kalpui dan tur FAO leh a thawhpui te duan chu thlir ho a ni.

He hun hmang tur hian NLUP line Department hrang hrang, Autonomous District Council member-te, Mizoram University leh Mizoram Sustainable Development Foundation aiawh te an tel a. Sawi hona hun tha tak hman a ni.