Mizoram sawrkar Land Revenue & Settlement Department buatsaihin vawiin khan Aijal Club-ah Bank leh Registrar of Properties te tan workshop buatsaih a ni a. He Workshop hi Directorate of Income-tax (Intelligence & Criminal Investigation) of N.E. Region, Guwahati Director Pu Vikram Sahay chuan a kaihruai a ni.

Bank kaltlanga sum tam tham khawih chet te, credit card bill pek te, in hmun lo ram lei leh hralht te bakah sum tam tham sensona tur thil reng rengah Permanent Account Number (PAN) hman a tulzia te, Annual Information Return thehluh pawimawhnate he workshop ah hian Pu Vikram Sahay chuan powerpoint hmangin a sawifiah a. Land Revenue and Settlement Secretary Pu Zothankhuma’n kalkhawmte lawmna thu sawiin sawrkar laipuiin Income Tax Act zirtir hna an kalpui mek chu Mizoram sawrkarin a thlawp thu a sawi. Hemi zawh hian Public Sector leh Cooperative Bank aiawhte nen sawihona hun hman chhunzawm nghal a ni bawk.

Income Tax (IT) Act, 1961 in a phut anga taxable income nei ten an mawhphurhna hriaa tha taka tax an pek theih nan Directorate of Income-tax chuan hma a la nasa hle a. Kum 2016 a pilot project an kalpui mekah he Directorate hian Mizoram sawrkar hnuaia thawk, college leh school zirtirtu, engineer, All India Service a thawk, Scheduled Tribe ni si lo, dan in a phut anga chhiah chawi ngei tura ngaih mi 300 laiin chhiah an chawi loh mai bakah income tax return an thehlut lo tih a hmuchhuak a. Directorate in a chhut dan chuan untaxed income hi kum 2013-2014 leh 2014-2015 sawrkar kum chhung khan cheng vaibelchhe sawmpariat (18) zet a tling khawm hman niin workshop-ah hian an tarlang.

Income Tax Act, 1961 section 10(26) in a tarlan danin notified area, hmarchhak state a cheng Scheduled Tribe (ST) te chu income tax awl an ni a. Tribal ni tho mah se hmarchhak pawn lam atanga sum hailuhna an nei a nih chuan income tax pe ngei turin dan in a phut a. Notified area huamchhunga cheng pawh nise Scheduled Tribe an nih loh chuan income tax hi an pek ngei a ngai thung. IT Directorate hian Mizoram Sawrkar leh Nagaland Sawrkar hnuaia thawk, tribal ni lo, income tax pe lote dapchhuah hna a kalpui mek a. IT Department hian tax pe ngei tura ngaih pe silo tam tak a hmuhchhuah tak te hian income tax a pung nen an chawi a ngai dawn a, danin a phut angin hremna pawh an chungah a lek thei a ni. He project a kalpui mek hian sawrkar hnathawk chauh nilo, sumdawngte leh mimala eizawngte a huam a. IT Act, section 10 (26) phena biru a, tax awl ruk tum anga ngaiin North East state a cheng, income tax pe ngei tur, pe si lo te chu IT Directorate hian a vaukhan a ni.