Public Health Engineering Department chuan an hnathawh hrang hrang thlirletna hun “Review Meeting of Works, 2016” chu vawiin khan an Department changtu Minister Pu Zodintluanga hovin Berawtlang Tourist Complex Multipurpose Hall-ah an nei. He hunah hian Mizoram District hrang hrang atanga PHED Officer-te an kalkhawm a ni.

PHED Minister chuan Department hmalakna leh thawktute thahnemngaihna chu faktlak a tih thu sawiin, mipui rawng an bawl naah awlsam leh tha zawka service an pek theih nan Engineer-te chu theihtawp chhuah thin turin a chah a. Kawng hrang hrangah Department hnathawh hmasawnna nasa tak hmuh tur a awm rualin, thawktute erawh an thlen chin a duhtawk mai lo turin a chah a. Khawvel hmasawnna umphak mai bakah a rual kal ve thei turin turin hna thawk a, ngaihtuahna chhenfakawm leh hman tangkai theih tur, innovative ideas nei turin kalkhawmte chu a chah a ni.

Department hmachhawp thenkhat tarlangin Minister chuan PHED hotute remhriatna zarah Aizawl khawchhunga kangmei chhuah thula Aizawl Veng hmun hrang hrang – lirthei tlan tlang leh tlang lohna vengah te chuan tui point engemawzat siam tum a nih thu a sawi a. Tui meter chungchangah pawh hmalakna thar – Smart Metering kalpui theih tura buaipui mek a nih thu tarlangin, hei hian ziah sual (human error) vanga bill chhut diklo awm thei te nasa takin a tikiam dawn a ni, a ti. Tuisemchhuah kawngah mipuite tan a awlsam zawk nan a sem nih leh hmun thenkhatah phei chuan a darkar bi thlenga inhrilh lawk thin a ni ta chu Minister chuan hmasawnna tha tak anih thu a tarlang bawk.

Minister chuan PHED chu tuisem leh khawl buaipui piah lamah department hming put chhan “health” chu pu zo tura chah in, an hna hian mipuite hriselna thui taka a nghawng theih avangin faina leh thianghlimna chu dah pawimawh turin kalkhawmte chu a chah a. District tina tui semchhuah thianghlimna leh Swachh Bharat Mission hnuaia hmalakna kal mekah te tang leh ngawrh zawka vil tha turin a chah a ni. Pu Zodintluanga chuan Department Officer-te inhmuhkhawm tam chuan ngaihtuahna thar leh hnathawh lamah hmasawnna a thlen bakah mipuiin hlawkna an neih phah thin thu sawiin, vawiin review Meeting pawh chu hmalaknate thlirho a, harsatnate leh tawnhriat te inhrilhna hunt ha leh hlawkthlak tak a nih a beisei thu a sawi a ni.

PHE Department hnuaiah hian tun dinhmunah Mizoram hmun hrang hrangah Non Lapsable Central Pool of Resources (NLCPR) hnuaia Project thawh mek 10 awm in, heng zinga paruk chu commission tawh a ni a. North East Council (NEC) hnuaia project 7 zinga pahnih chu commission a ni tawh bawk. 10% Gross Budgetary Support (GBS) project 4 awmin, pahnih chu commission tawh a ni a. Multi-Sectoral Development Programme (MsDP), NABARD (RIDF) leh AMRUT hnuaiah project 3 theuh a awm bawk. Swachh Bharat Mission hnuaiah hian kum 2015-2016 chhunga Mizoram puma inthiarna mumal la neilo zat chu chhungkaw 22,307 a chhut niin, Aizawl, Champhai leh Serchhip District ten an target an tlin vek a. Aizawl, Champhai, Kolasib, Serchhip leh Siaha chuan kum 2016-2017 chhung hian ODF District-ah inpuan hman an beisei a ni.

Vawiin meeting hi thuang thum a then niin, a hawnna inkhawm hi Pu V. Lalremthanga, IAS, PHED Secretary chuan a kaihruai a. Technical session-a chhunzawm niin, Rural & Urban Water Supply Scheme, Atal Mission for Rejuvenation and Urban Transformation (AMRUT) leh Swachh Bharat Mission hnuaia PHED hmalakna te leh North Eastern Region Capital Cities Development Investment Programme (NERCCDIP) hnuaia SIPMIU hmalakna te ngaihtlak a ni. Nimin khan KSB pump chungchang inzirtirna lo neih tawh niin, 27.7.2016 khan AE, Sr. AE, SDO leh Sr. SDO-te tan Aijal Club-ah Software Workshop neih a lo ni tawh bawk.