Kumin Independence Day 2010 lawm turin sorkar a inpuahchah mek a. Aizawl Lammual-a he Ni lawmna programme leh a kaihhnawih thil pawimawh hrang hrang sawi turin vawiin khan Aizawl D.C. Pu C.Thanchhuma hovin Independence Day Celebration Organising Committee an thukhawm a ni.

Kumin Independence Day 15th August, 2010 hi Pathian Ni-a a tlak avangin a lawmna programme chu kumdang aia hma hret zing dar 7:30-ah tan a ni ang a, hemi Ni lawmna chi khat 'AT HOME' pawh buatsaih a ni lovang. Independence Day lawmnaah hian Mizoram Chief Minister Pu Lal Thanhawla chu Khuallian tura beisei a ni a. Kum dang ang bawkin Independence Day pualin Football leh Volleyball Tournament buatsaih a ni dawn a, heng sport pahnih te bakah Aizawl khawpui chhunga school-te tan basketball tournament huaihawt a ni bawk dawn a ni. Independence Day Sports Tournament-te hi August ni 3, 2010 atangin tan an ni ang.