Nimin August ni 4, 2014 (Thawhtanni) khan Lunglei DC Pu Ashish Madhaorao More, IAS hovin DC's Conference Hall-ah Independence Day 2014 lawm dan tur rel hovin Lunglei District Department hotute an thukhawm a ni.

Meeting kaihruaitu DC Pu Ashish More chuan kumin Independence Day 2014 lawmna chu Thuamluaia Muala-ah hman a nih tur thu leh Khuallian atan Horticulture Minister Pu PC Lalthanliana a ni dawn tih kalkhawmte a hrilh a. I-Day 2014 lawmna tura sum indaihlohna sukiang turin Department hrang hrangte atangin thawhlawm khawn dan tur Sub-Committte duan sa chu meeting-ah hian pawm a ni bawk.

Independence Day 2014 lawm nan Football, Volleyball, Carrom-board leh Snookers & Billiards Tournament huaihawt a ni dawn a, henga lawmman tur atan - Football : Rs.25,000/-, Volleyball : Rs.15,000/-, Snooker & Billiards : Rs.10,000/- leh Carromboard : Rs.5000/- ruahman a ni.

Independence Day 2014 lawm nan Lunglei Photographers' Association (LPA)-in 'Photo Exhibition' buatsaih an dil chu meeting-ah hian pawm a ni bawk. Photo Exhibition hi August ni 15, 2014-ah Khuallian-in a hawng nghal anga, ni 4 chhung a awh dawn a ni.