Nimin, August 5 khan Tourism Minister Pu John Rotluangliana leh sawrkar mi pawimawh ten Chalfilh Tlang chhip, Vanzau phul a Tourist Department khualbuk sak mek leh an hmalakna hrang hrang te a endik. Minister hi a mah puitu, Parliamentary Secretary Pu T.T. Zothansanga, Chalfilh Constituency bialtu Dr. Ngurdingliana, MLA, KVI Board Chairman Pu K.Lianzuala, Principal Accountant General Pu L.Tochhawng, Deputy Accountant General Pu Hautinlal Suantak Vaiphei leh Pu Vabeiha Hlychho, Director, Tourism Department ten an tawiawm a ni.

Minister hian Chalfilh tlang chu han hla deuh mahse, a panna kawngte a that tawh avangin khualzin mite leh Adventure Club te tan pawh tlawh pawh a awlsam tawh thu a sawi a. Khualzin hip tur erawh chuan a tlang chhehvel chereu tan mek chu tihtawp vat a ngai a ni tiin in Chalfilh ngaw chu pan chakawm khawpa humhalh that a pawimawh hmasak thu a sawi a ni. Thangthar zingah Adventure a tui tam tak an awm tawh a, heng ho tan hian Chalfilh Tlang pan hi a manhla hle dawn a ni a ti a. Vanzau khualbuk hi hman thuai a nih theihnan Electric current leh tui hnianghnar taka hman tur lakluh chungchangah te sawrkar in chak takin hma a la mek a ni a ti.

Chalfilh tlang chhip vanzau phul ah hian Tourism Department chuan khualbuk, mi 20 chuang thlen theihna tur sa mekin a bul vela phul ah te pawh puanin enge maw zah kaih theih na tur hmunawl a buatsaih a. Vanzau phul hmawr tawp, chalfilh tlang sang lai bera chhal ah khawthlirna in sang sak tumin hma lak mek a ni bawk a ni. Khaw thian tum chuan helai hmun atang hian thui tak mizoram hmun hrang hrang te leh Manipur ram te thleng pawha a lan theih thu khawtual mi kal ve te chuan an sawi a ni. Heng hmalakna te bak ah hian khual buk atanga hla vak lo, Filhte tlang atanga Tualbung kaltlang a Tam Dil ke a panna tur fehkawng tia vel Trekking route siam tum a ni a. Vanzau phul,Tualbung leh Tamdil ah te riahbuk, Base Camp-te siam tum a ni bawk ani. Chalfilh tlang chhip vanzau phul hi Aizawl atanga KM 100 tling lo hret a hla a awm a ni a, Sakawrdai panna kawng dung zawhin Khawruhlian piah Khanpui khua atanga lirthei lian leh te a thlen chhoh theih a ni.