Tukin zing khan Disaster Management & Rehabilitation Department changtu Minister Pu C.Ngunlianchunga chuan Bungkawn Veng-a Lai House building dawlna lungrem siam mek chu bialtu MLA Pu Vanlalzawma, Bungkawn Vengthar Local Council member-te, tlawmngai pawl hrang hrang hruaitute leh Bungkawn Local Council hruaitute nen an enho.

Kum kalta khan Lai House building thlanga lungrem chim tawh leh ruah sur nasa avangin a tluk mai an hlauthawng a, he House thlang, Bungkawn Vengthar a cheng chhungkaw engemawzat chuan luah ngam lovin an in leh lo an riah chhuahsan a. Thiah mai a ngai dawn ni awma thuthang te pawh a awm hman a ni. Hetih hunlaia Lai Autonomous District Council (LADC) CEM Pu C.Ngunlianchunga chuan rang taka hmalak a tul tih hriain lei hi a min lohna turin a venna tur retaining wall rinawm tak sak a nih theih nan hma a la nghal a. Lai House thlanga mimal in pathum chu leiin Special Plan Assistance (SPA) kaltlangin project lian tham tak siam a ni a. Tunah hian retaining wall rinawm tak siam mek a nih bakah Lai House zauhna tur building sak bul tan nghal a ni.

A hmuna enfiahtu Minister Pu C.Ngunlianchunga chuan kum kalta ah Mizorama leimin rapthlak tak tak a thlen lai khan Lai House pawh hi tlu mai thei dinhmunah a ding nia hriain Bungkawn Vengthar mipuite bakah LADC hotute pawh an mangan hle thu a sawi a. Kum 20 chuang lo ding tawh Lai House pawh thiah mai a tul em tih enfiah tur mithiamte rawih an ni a, khi leh thalo dang a lo awmlo tih hmuhchhuah a ni. Retaining wall leh building sakna tur laih a nih hnuah a leilung a nghet thawhkhat tih foundation siamna atangin a hriat theih ta chu thlamuanthlak a ti a. Mithiam zawkte ruaiin leimin in a hnawl mai lohna turin lung bang rinawm tak leh building pawh kawngpui an atangin sak chhoh tura ruahman a ni, a ti. Bungkawn Vengthar Local Council hruaitute leh tlawmngaipawl hruaitute hmaah thusawiin Minister chuan House sak danah khawtlang hruaitute mit ti kham leh an duhthusam lo lai a awm a nih chuan contractor te hnenah leh ama hnenah ngei pawh hrilh hrehlo turin a ngen a ni.

Bialtu MLA Pu Vanlalzawma pawhin a bulthum atanga engkim hretu LADC CEM kalchhuak, DM&R Minister Pu C.Ngunlianchunga’n hma chak taka a la nghal chu lawmawm a ti a. Lai House hi hun rei tak awm tur, Bungkawn veng leh Bungkawn Vengthar mipuite thenawm kumhlun tur a nih avangin lungrual taka engkim in ban tawna an awm hi a tha a ni, a ti.