1571/2022-2023
Aizawl, the 12th August 2022 : Kum dang ang bawkin, rampum hmun dang rualin Mizoram hmun hrang hrangah pawh August ni 15 khian Independence Day chu ropui takin hman a ni leh dawn a. Kumin Independence Day hi India zalenna champhaphak vawi 75-na a nih angin urhsun takin a lawmna hi ruahman chho a ni a, Azadi Ka Amrit Mahotsav tia hming zau thei ang berin rampum huapin programme hrang hrang te siam niin siam mek zel a ni.

Mizoramah chuan he ni puala lawmna inkhawm lian ber chu Lammualah August ni 15, 2022, zing dar 8:00 AM ah neih tan a ni dawn a. He hunah hian Chief Minister Pu Zoramthanga chu khuallian a ni dawn a. Lammual ah Hnam Puanzar a pawtpharh hnuin Parade Contingent te a endik anga, an chibai bukna te chhangletin March Past neih a ni anga. Chief Minister in Independence Day thuchah a sawi zawh hnuin National leh State awards te chu a sem nghal anga, Parade contigents te hnenah lawmman a hlan bawk ang.

Lammuala Independence Day programme hman zawh a nih hnu chhun dar 11 ah sawm bikte tan Governor’s ‘AT HOME’, Raj Bhawan-ah a awm leh dawn a ni.

Mizoram sawrkar chuan he hun pawimawh tak hmang tur leh a hmanna hmunah te, tel theuh turin khua leh tui zawng zawng te a sawm a. A bik takin Sawrkar hnathawkte chu Independence Day lawmna programme-ah tel ngei tura hriattir an ni.