1572/2022-2023

Thlazing ni 12, 2022: Vawiin khan Mizoram Cleanliness Competition 2022 Sub-Committee, Lawngtlai chu an Chairman, Additional Deputy Commissioner Pu James Miahlung hovin Mizoram Khawpui Fai Intihsiakna 2022 atana hma lak dan tur ngaihtuahin Lawngtlai DC Conference Hall-ah an ṭhu khawm.

He hunah hian Lai Autonomous District Council (LADC)-a Executive Member i/c Sanitation Pu Lalropuia Chinzah bakah, sawrkar official-te, Lawngtlai khawpui chhunga village council ai awhte leh faina kawnga veng tina palai atana ruat local ambassador-te, tlawmngai pawl leh kohhran ṭhalai hruaitute, NSS ai awh leh chanchinbu mite an tel a. Mizoram Khawpui Fai Intihsiakna atana inbuatsaihna kal chhohpui dan tur leh hma lakna tur rawtna hrang hrang an sawi ho a ni.

Mizoram Khawpui Fai Intihsiakna 2022-ah hian August thla aṭanga November thla thlengin thla tin endikna hrang hrang kalpui tura ruahman a ni a. January 2023-ah result puan a ni dawn a ni.

He ṭhut khawmah hian Lawngtlai khawpuiin faina kawnga hma a sawn theih nana hma lakna tur ruahmanna hrang hrang duan a ni a. Veng tinah local ambassador-te kaihhruaiin children sanitation club din ni se tih niin, a tam thei ang ber vantlang, tlawmngai pawl, kohhran ṭhalai leh sikul naupang huap ang tein hnatlang runpui buatsaih ni se tih a ni bawk a. Faina kawnga mipui zirtir nan hmun ualau laia thuziak tarin, a tam thei ang ber tlangau au tum ni se, tih a ni a. Internet hmanrua kal tlanga mipui zirtirna theh darhtu atan brand ambassador pahnih ruat an ni a. Tualchhung huapa faina kawnga inelna kalpui chungchang te rel niin, Lawngtlai khawpui chhunga office leh zirna in zawng zawngte hman khat daih sarang (single use plastic) hman tawh lohna hmuna puan a nih theih nan chak zawka hma lak ni se, tih a ni a. August ni 20, 2022 (Inrinni)-ah Mizoram Cleanliness Competition 2022 atana Lawngtlai khawpui chhunga hma lakna khuhhawnna (kick off) buatsaih tum a ni bawk.

Attachment

  • Loading attachment...