1433/2022-2023

Aizawl, 1st August 2022 : Vawiin khan Dr. Lalhriatzuali Ralte, IAS Aizawl Deputy Commissioner hovin S.P. Conference Hall-ah kumin India Independence Day vawi 75-na Aizawl a lawm dan tur rel a ni.

India Independence Day lawmna hi AR Ground-ah zing dar 8-ah Chief Minister Pu Zoramthanga hova  hman turin ruahman a ni tawh a; hrileng avanga kum hnih lawm mumal theih a nih loh avang leh kumin hi India zalenna kum 75-na a nih avangin kum hmasa lam aia uar deuh a lawm ni se tih rel a ni. Vawiin thutkhawmah hian sorkar laipuiin min beisei angin India zalenna kum 75-na lawmna chikhat atan In tinah (Har Ghar Tiranga) Hnam Puanzar hi August 13 zing atangin ni 15 ni tlak thleng zar ni se sawiho a ni a. Hei hi mitinten ngai pawimawh theuh turin min beisei a ni.  

Meetingah hian sorkar department hrang hrangte mawhphurhna leh chanvo te sawiho niin inbuatsaihna kal pui tan tura tih an ni. Independence Day lawmna AR Ground a neih turah hian Parade contingent  - Armed leh Unarmed Contingent neih theih tur a beisei a ni.