1434/2022-2023

Aizawl 1st August 2022: Nimin ni 31.7.2022-a Birmingham, England-a neih mek Commonwealth Games, 2022 Weightlifting-a Gold Medal latu Jeremy Lalrinnunga chungchangah Mizoram Sorkar Sports & Youth Services Department chuan a hnuaia mi ang hian lawmpuina thuchhuah a siam a ni:-

Commonwealth Games, 28th July - 8th August, 2022 neih mekah Jeremy Lalrinnunga chuan India tan Weightlifting discipline-ah 67 Kg. (weight Category ) Snatch -140 kgs, leh Clean & Jerk 160 kg - 300 kgs total chawiin lawmman pakhatna (Gold Medal) a la a, Mizo zingah Commonwealth Games-a Gold Medal la hmasa ber leh Weightlifting Discipline Snatch-ah 140 kgs chawiin record thar siam hmasa ber a ni bawk.

Jeremy Lalrinnunga hi October ni 26, 2002 khan Civil Hospital Aizawl ah a piang a; a pa Lalneihtluanga a ni a, a nu Pi Lalmuanpuii a ni a. Govt.Complex Aizawl (tuna Ainawn Veng ni ta)-ah Sorkar Quarters ah an cheng mek a ni.  

Sports & Youth Services Department leh Mizoram Weightlifting Association tangkawp chuan September ni 24, 2011 khan State Sports Coaching Centre (SYS) Govt. Complex-ah Weightlifting Academy a din a, hetah hian Pu Malsawma Khiangte, (NIS) Weightlifting Coach Sports & Youth Services Department leh Pi PC Remlalliani (NIS) Bethlehem Veng hnen atangin Weightlifting Technique mau bung leh tui connection pipe bung atangin bul an tanpui a ni.

Jeremy Lalrinnunga hian October 2011 atangin Weightlifting a zir tan a. Hemi hnu  hian Army Assistant Coach Zarzokima Pune chuan Coach Malsawma Khiangte hnenah Army Boys Pune trial tura mipa naupang 3 thlang chhuak tura a rawn tih angin Jeremy Lalrinnunga, Jacob Vanlaltluanga leh Zakhuma te thlanchhuah an ni.

 Kum 2012 January thla ah Army Boys Pune ah an pathum hian trial neiin an tling vek a ni. Pune Army Boys-ah Army Foreign Coach Gubala, Slovakia leh Zarzokima Assistant Coach-te hnen atangin Weightlifting an zirnaah hma an rawn sawn chho zel a, Army-ah Kum 4 (2012 - 2015) an zir hnu chuan kum 2016 ah Sub Junior National Weightlifting Championships Youth a tel a, 50 kg ah Gold medal la nghalin, Snatch bikah 90 kg zovin New National record a siam a, tun thlengin he record hi tuman an la khum lo a ni.

Army lamah chuan Youth Olympic Gold  (2018) medal lak lawmpui nan Naik Subedar hna pek a ni. India Sorkar chuan India infiammite an tih that lehzual theih nan a hrana enkawl bik tur Target Olympic Podium Scheme (TOPS) a siam a. Jeremy Lalrinnunga pawh tel vein Olympic lo awm tur kum 2024 leh Commonwealth Games 2022 inbuatsaihna atan thlan a ni.

Sports thuamhnaw leh hmanraw siam chhuaktu lian leh lar Adidas nen kum 2022 thleng thawhhona contract an sign nghe nghe a ni.

Jeremy Lalrinnunga hian Mizoram Sorkar Incentive Cash Award Scheme hnuaiah hian a hlawhtlinna hrang hrang lawmpuina atan Rs.16.10 lakhs a lo dawng tawh nghe nghe a ni.

Mizoram Sorkar Sports & Youth Services Department chuan Commonwealth Games Record Breaker Jeremy Lalrinnunga hi a chhuang takzet a, amah lo enkawltu Coach te leh Mizoram Weightlifting Association te leh amah sponsor tute chungah lawmthu an sawi a. Mizoram Sorkar pawhin dan angin amah chawimawina leh lawmpuina a hlan dawn a ni.