1435/2022-2023
Kolasib dated 1st August 2022: Vawiin chawhnu khan DC Conference Hall, Kolasibah ruihtheih thil tih tlemna kawnga ruihtheih thil kalkual dan zirchian leh dap chhuah hna sawt zawk a kalpui dan tur sawihona hun Kolasib District Level Committee on Narco Coordination Centre (NCORD) chuan an nei a. Pu John LT Sanga, Deputy Commissioner chuan țhutkhawmna hun a kaihruai a ni.
NCORD țhutkhawmna ah hian ruihtheih thil tawlhrutute rang tak a man chhuah an nih theih nan hemi kawnga hma latu Sawrkar Department hrang hrang leh NGO ten thudawn an inhrilhchhawn zung zung theih nan leh ruahmanna fel tak hnuai a thawhhona țha tak a awm theih dan tur sawiho a ni a. Kolasib district chhunga ruihtheih thil avanga buai enkawlna hmun, De-addiction & Rehabilitation Centre-a hmalak dante thlir ho niin Dawmdawi hmansualna avanga enkawl mi 273 leh Zu vanga enkawl mi 146 an awm mek thu tarlan a ni. Ruihtheih thil dona sawt zawk a kalpui a nih theih nan Department hrang hranga hmanrua awmte tangkai tak a hmang turin leh a tul ang angte thawhchhuahpui turin inhawng tak a indawrtawnna neih a pawimawh thu sawi a ni.
Excise & Narcotics Department, Kolasib district tarlan danin January atanga July 2022 thleng khan sap zu um puitling 3137, Rakzu 759.82 litres, Beer can 1304, Heroin 113.87 gram, Methamphetamine 12.8 Kg leh ruihtheih thil dang engemaw zat man a nih tawh thu tarlan a ni a. MLP Act 2019 hnuai a thubuai ziah luh 1,009 a awm bawk a ni.
Vawiin thutkhawmnaah hian SP,Kolasib, 1st IR Bn., Excise & Narcotics, Chief Medical Office, Social Welfare, DAO, DFO aiawhte an tel a, School leh College-a zirlai, ruihtheih thil lak a fihlimte an him chhunzawm zel nan ‘Awareness Campaign’ kalpui dan tur te sawi a ni.
Attachment
- Loading attachment...
