76^th  INDIAN INDEPENDENCE DAY, 2022 SERCHHIP DISTRICT

Serchhip Bawrhsap, Sorkar official, Army official, Media leh NGO hruaitute, School naupang, thian duh takte leh vawiina he hun pawimawh tak hmanga lo kal zawng zawngte, in zavaiin India Independence Day vawi 76-na chibai ka buk  a che u.

India ramin zalênna a hmuh kum 76-na ah hian duhsakna chibai ka bûk a che u. Ram dang awpna hnuai ata zalenna kan neih theih nan a theih tawp chhuah tu ram hruaitu ropui India Hnam Pa Pu Mahatma Gandhi te, Pu Jawahar Lal Nehru te, Pu Netaji Subash Chandra Bose te, Pu Sardar Vallabhai Patel te leh mahni inphata zalenna atana lo beitu zawng zawngte, nunna hlantu kan sipai huaisente he ni ropui takah hian zahna chibai ka buk a ni.

Mizoram Sawrkar chuan kan State chhung a ralmuan a, him leh thlamuang taka mipuite kan awm theih nan venhimna kawngah awmze nei takin hma a la a, kan police chhuanawm tak takte hian an hnena thubuai (criminal case) thehluh 1,633 zinga 676 chu hlawhlting takin an chhui zova, silai tawlh ruk tum mi 20 manin thubuai 12 ziah luh a ni bawk. Supreme Court thupek bawhzuiin Police Station leh Out-Post zawng zawngah CCTV leh Audio Recorder vuah mek a ni.  

Serchhip District-ah ngei pawh kum kal mekah dan bawhchhiatna case 136 zet register a ni a, chung zinga case 102 te charge sheet niin convict tawh mi 14 an awm a ni. Police ten tun kum khat chhunga ruihhlo an man ringawt pawh hi International market rate a chhutin Rs. 10.82 Crore man zet a tling tawh a ni.  

Excise & Narcotics Department pawhin NDPS Acts leh Mizoram Liquor Prohibition Act hmangin khawtlang ruihhlo laka kan fihlim theihnan  nasa takin hma an la mek a, a bik takin Mizoram Liquor Prohibition Rules pawh tunah hian peih fel a ni tep tawh bawk a ni.  

Hriselna tha neih hi ram hmasawnna thlentu pawimawh tak a nih avangin sawrkar chuan mipuite hriselna lam hi a ngai pawimawh hle a. Sub-Centre tam tak tunah hian Health and Wellness Centre ah upgrade mek zel a ni. Kan hriat theuh angin Covid19 hripuiin khawvel a nuai a, Mizoram sawrkar pawhin Kohhran leh NGO te nena thawk dunin, he hri hlauhawm tak laka mipuite kan him theihnan nasa takin hma a la a,   he hri hian min la chenchilh avangin a dona lama hmalakna pawh a la kal reng a ni. Kan district-ah hian he hripui hi mi 14,343 ten kai tawhin, chung zinga mi 35 te chuan vanduaithlak takin nunna an chan hlauh mai a, Sawrkar chuan pawi a tiin, chhiat tawkte kan tawrhpui takzet a ni. Covid - 19 vaccine pek hna hi ngawrh taka kalpui reng ala ni bawk a ni. Covid-19 hripui laka inenkawlna hmanraw pawimawh tak Oxygen siamna khawl PSA Oxygen Plant (250 LPM) chu October, 2021 khan Health Minister zahawm tak chuan Serchhip District Hospital Complex-ah a hawng tawh a ni. Kan District Bawrhsap leh a thawhpui fel tak takte hmalakna zarah hripui dona hmanrua tha engemaw zat kan dawng bawk a ni. Tun hnai mai khan Formosa Foundation & Habitat for Humanity atangin Covid-19 dona leh in enkawlna hmanrua thahnem tak kan District Hospital hian a dawng leh bawk a ni.  

Sports lamah kan hmuh leh hriat angin hmasawnna leh hlawhtlinna duhawm tak mai kan nei chho zel a, kar liam ta mai khan, Birmingham, United Kingdom a Commonwealth Games 2022 neih zawh takah India ram aiawhin weightlifting 67 kg category ah Mizo tlangval Jeremy Lalrinnunga chuan Gold Medal la in, record a siam nghe nghe a. India Hockey Team a tel Mizo nula Lalremsiami pawhin Bronze Medal a rawn hawn bawk a. Ram pawn infiamna khawvela mahni hming chher a, Mizoram ti hmingthatu thlalai chhuanawm tak tak kan nei zel hi a lawmawm takzet a ni.

Mipuiten tui thianghlim hnianghnar kan neih theih nan PHE Department kaltlangin hmalakna engemaw zat thawh mek a ni a. Jal Jeevan Missions hmangin Serchhip District chhunga khaw 36 zinga 23 te chu Functional Tab Water Connection pek fel an ni tawh a, khaw dang 12 tan buaipui mek a ni a, chhungkaw 6,070 te chu connection pek fel an ni tawh a ni. NABARD sum hmangin Thenzawl Vanva Dam Pumping hna thawh mek a ni a, North Mualcheng khaw tui lakna tur Solar Pumping NABARD sum Rs.880 lakh senna tur chu tender kalpui mek a ni bawk. NorthVanlaiphai Pumping tih lenna tur tender pawh kalpui a ni tawh bawk. Tuihna humhalh tha leh tuihna tih pun kawnga ram pum huap intihsiakna “National Water Award” lawmman pakhatna (Best panchayat) hi Serchhip district-in kum hnih a zawnin kan dawng tawh a, 2^ndNational Water Award 2019-ah khan Lêng khua chu pakhatna niin; 3^rdNational Water Award 2020-ah Sialsir chu pakhatna a ni ve leh a ni. Thingtlang khaw faina lama hma lakna (Swachh Bharat Missions Grameen)-ah pawh Serchhip District hian entawn tlakin hma kan la a. East Lungdar RD Block (khaw 11) chu Open Defecation Free (ODF) Plus Category sang ber Model Category-ah puan an ni tawh a ni. Individual Household Compost Pit hi Lêng, Chêkâwn, Vanchêngtê, Sialhau leh Hriangtlângah te Swachh Bharat Mission – Gramin (SBM(G)) leh RD Department tang kawpin siam a ni. Plastic Waste Resource Management Centre hi Thenzawlah sak zawh tawh niin electric fitting thawh mek a ni.

Rural Development Department hnuaiah SEDP kaltlangin BDO Complex-ah  Residential Quarters building block panga Rs. 372.86 lakh hmanga sak a ni a, 5^th October, 2021 khan heng building te hi hawn a ni a, tunah  chhungkaw 13 in an luah mek a ni. Khawtetlang, Serchhipah Rs. 85 lakh senna Panchayat Bhawan pawh sak zawh tawh a ni. Ni za inhlawhna chu tluang taka kalpui chhoh mek zel a ni a, tun sorkar kum chhungin chawhrualin ni 40 inhlawhna siam a ni tawh. PMKSY version 2.0 chu North Vanlaiphai leh Lungkawlh khuaah te bul ṭan chhoh mek niin Watershed Committee pawh din fel an ni tawh a. Training pawh huaihawt niin, Entry point activity zawhfel a ni tawh a, Horticulture Development atan thlai chi sem a ni tawh bawk.  

Thingtlang miretheite tana in sak ṭanpuina PMAY-Grameen scheme hnuaiah East Lungdar Block-ah mi   200, Serchhip Block-ah mi 226, Serchhip District pumpui tan chhungkaw 426 tan target pawmpui tawh kan ni a, a rang lama sanction tih fel theih beisei a ni. India Sorkarin Independence Kum 75-na lawmna puala ruahmanna a siam, tuihna tihpunna ‘Amrit Sarovar Project’ chu District chhungah ngawrh taka kalpui a ni a, tui khuah pawh hmun 75 velah siam zawh tawh a ni.

Mizoram State Rural Livelihood Mission (MzSRLM) hmalaknain MzSRLM hnuaia SHG Memberte vawk vulhtute tan, Vawk Insurance tihsak turin ruahmanna siam a ni a, AH & Vety Department leh National Insuarance Corporation nena ṭang hovin Vawk Insurance hi kalpui tur a ni, August 3, 2022 khan SHG memberte tan hemi pual training pawh huaihawt a ni. MzSRLM hmalakna a zarah hian SHG member ni lote pawhin he Vawk Insurance zar hi an zo thei dawn nghe nghe a ni. Tunah Serchhip District ah SHG 400 leh East Lungdar RD Block hnuaiah SHG 255 an awm mek a ni.

Khawpui a infrastructure leh facility awm ang te thingtlang lamah mamawh anih ve tho avangin Central Sawrkar chuan Shyama Prasad Mukherjee Rurban Mission (SPMRM -Rurban) Scheme a duang chhuak a, chu Scheme chu East Lungdar RD Block huam chhunga khaw 9 ah kalpui a ni

a.  he Scheme hnuaiah hian heng hmasawnna hna hrang hrang hi thawh a ni :

East Lungdar ah Training Hall changtlung tak bakah Video Conferencing Hall changkang tak mai awmna Rurban Training Centre sak a ni a, He Office hi BDO Office a ni tel nghal bawk a, hawn mai theih a peihfel a ni tawh a ni.

Thingtlang lam a kut hnathawktu ten hmunpui zawk, Aizawl a thlai rate danglam chhoh dan an lo hriat theih a, rate tha zawka an hralh theihna tur Android Mobile Application – “Aizawl Thlai Rate Apps” chu peihfel a ni tawh a, tlangzarh mai theihin Google Playstore ah dah a ni a, Aizawl thlai rate te chu kar tin vawi 2 update a ni tawh a ni.

Thingtlang khaw fai lawmman dawngtu leh Tuihna humhalh tha lawmman dawngtu Leng khua ah hian Smart Village Project kalpui a ni a,  Thalai te tan Open Gym te siam a nih bakah School zawng zawngah smart class facility pek vek a ni.   In tinah Bawlhhlawh thliar hranna tur bawlhhlawh bawm sem niin, kawtlaiah te dah a ni bawk a, tawihthei te chu mahni in bulah compost pit siamah paih luh zel a ni.   Khaw mipuite zinga Insurance nei thei zawng zawng chu PMJJBY hnuaiah Insurance tihsak vek an ni a, a harsa zual te chu PMSBY atangin Insurance tihsak an ni bawk a ni.  East Lungdar ah pawh Artificial Turf Futsal Ground, Chung nei leh zan lama inkhelh theihna tur siam mek a ni a, reilote ah siam zawh beisei a ni.

Chekawn khua ah  Green Chekawn Project kalpui a ni dawn a, Solar Village tura duan a niin, intinah solar electric connection pek mai bakah kawtthler zawng zawng solar hmanga tihen tum a ni a, tunah hian hna tan theih mai a ni tawh a ni.

Small Scale Industries kan tih mai heng - Turmeric Processing Unit te,

Chilli Processing Unit te, Bottle Manufacturing Unit te leh Seed Bank te pawh MzSRLM hnuaia nuho pawl nena tangkawpin din a ni a, mi tam tak in eizawnna ngial nghet an neih phah a ni.    

PWD Serchhip Division chuan PMGSY fund hmangin Chhingchhip to Hualtu, Thentlang to Sialhau, Serchhip to Hriangtlang leh Mualcheng to North Vanlaiphai inkar kawngte an thawk mek a, Central Road Fund hmangin Meter 68 a sei double Lane PSC Bridge (Tuichang lei) an dawh mek a, NABARD sum hmangin Keitum – Chekawn – NorthVanlaiphai kawng tih zauh leh siam that hna an thawk mek a  ni bawk .

Samagra Shiksha hnuaiah kuminah zirlai naupang 5,079 te hnenah zirlaibu a thlawna sem a ni a, Midday meal hi naupang 6,733 te tan buatsaih mek a ni. Se36.rchhip District chhunga khaw hrang hrangah School building sak that leh thawm that hna hi kalpui mek a ni. District chhunga zirlai naupang rualban lo mi 11 te hnenah Escort & Transport Allowance leh an mamawh bik hmanrua te pek an ni a, an nu leh pate a hrana training neihpui an ni bawk. Tin, district chhunga P/S zawng zawngah sports materials pek an ni a, Govt. H/S 21, Govt. HSS - 1, Govt. P/S - 66 leh Govt. M/S -51 te hnenah Annual School Grant pek an ni bawk. Vocational Education hi Govt. Serchhip H/S ah leh Govt. Serchhip HSS ah te kalpui a ni a, nikum September thla atang khan Govt. JM H/S ah vocational education hi hawn thar a ni bawk.

Serchhip DIET ah Assembly Hall thar Rs.68 lakh senga sak chu a peih fel a ni tawh a, Hostel Building tur Rs.215 lakh senga sak mek pawh chak taka kalpui mek a ni.

Govt. Serchhip College chuan kumin kum tirah khan NAAC grade-A a hmu thar a, North East India huap pawhin NAAC grade A hmu thei khawpa College tha hi an la tlem hle a ni.   Science Building Rs.156 Lakh senga sak leh Women’s Hostel Rs.19.73 lakh senga sak chu zawh fel tawh a ni. Article 275 Grant leh Serchhip DRDA atangin tui dah khawlna sak thar a ni. Tunah hian Administrative Building thar sakna tur te, Career Coaching Centre & Skill Development Building sakna turte leh Women Recreation Centre sakna tur buaipui mek a ni.

Horticulture Department hmalakna hnuaiah nikum khan Dragon Fruit chingtuten Quintals 200 an thar chhuak a, kuminah hian quintals 500 thar chhuah theih beisei mek a ni. Dragon Fruits chinna atan tun hnaiah Thenzawl Lamliandung Zau Cluster chu Unit 60 pek belh an ni a, Cluster dangte pawh FOCUS hnuaiah pek belh tum mek a ni. Khumtung leh Baktawng-ah nasa taka balhla chin mek a ni a, nikum chhung khan balhla hi quintals 13,000 thar chhuah a ni. Serthlum huan enkawl nulat thar (rejuvenation) hi MIDH hnuaiah kalpui mek a ni a, kumin chhung hian huan hactare 100 zet a zauvah hmalak a ni. Hualtu, Lêng leh North Vanlaiphaiah te chhungkaw 51 zetin kumtin lo neih bansanin protected cultivation hmangin eizawnna an thlak tawh a,   loneitu chhungkaw 28 ten eizawnna nghet an neih belh theihna turin Hualtu leh

Hmuntha-ah Green House Cluster thar pathum siam belh tum mek a ni.

Serchhip District chhunga Greenhouse Cluster kan neih mek atangin off-season tomato quintals 450 nikum chhung khan kan thar chhuak a, Dawnfawh leh Loneituten thlai chi leh thlai tiak hrisel an dawn theih nan Centre of Excellence kalpui a ni bawk.

Rural Infrastructure Development Fund hmanginAgriculture Department chuan Lêng, Mualcheng, East Lungdar, Khawlailung leh Lungpho–ah te Land Development  kalpui mek a ni. SEDP hnuaiah kumin hian chhungkua 1,056 te chu nasa taka vaimim chin tir mek niin nikum lama kan thar chhuah zat aia tam thar chhuah theih ngei kan beisei mek a ni. SEDP hnuaiah vek hian chhungkaw 72 te chu Fû chi pek an ni. National Food Security Missions - Oilseeds hnuaiah hriak nei thlai chin niin,  nikum khan leilet zawl Hectare 243 a zauvah têl antam Quintals 114.98 thar chhuah a ni. RKVY-RAFTAAR hnuaiah ran chaw siamna Composite Feed Mill bun thar a ni a, December, 2021 atang khan ran chaw hi siam chhuah tan a ni.  

Industrial Unit 8 te hnenah State Incentive Subsidy pek thar an ni a, thalai 60 te chu puan tah leh puan ban training pek an ni. Mi 59 te hnenah PMEGP loan pek an ni a, PM Formalization of Micro Food Processing Enterprise Scheme hnuaiah Industrial Unit pahnihte chu recommend theh luh sak an ni.  

Pradhan Mantri Matsya Sampada Yojana (PMMSY) hmangin chhungkaw 100 te chu Sangha dil thar laihna tur sum pek an ni. He scheme hnuaiah vek hian Sangha khawi lenna Dil laih tanpuina mi 50 hnenah pek niin, Buh kara Sangha khawi duh mi 30 te tanpuina buaipui mek a ni.  

Tuikum zau, Zuangleng zau leh Zawlpui zauva Rubber chingtute tan Rubber Processing House leh Smoke House te sak thar a ni a, Rubber chingtute hi Rolling Machine leh hmanraw dangte pek an ni bawk.

Loneitute tana tui lak hna hi PMKSY atangin Lower Tuiphai, North Vanlaiphai; Tuichang, Keitum; Tuikual, Lungchhuan leh Mat hnâr zau, Serchhipah te thawh mek a ni a, hei hi chhungkaw 89 ten an hmang tangkai dawn a ni. Ground Water Project hi NABARD sum hmangin Chawm zau, Matah leh PMKSY atangin Damdiai zau, Bungtlangah te thawh mek an ni a, district chhung hmun hrang hranga loneitute tui lak hnathawh nan NABARD-ah proposal pathum (3) leh PMKSY ah Proposal pakua (9) theh luh a ni.

Sericulture Department chuan kan district chhungah Seed Farm pahnih a enkawl mek a, kum kalta chhung khan Seed Cocoon singkaw chuang a thar chhuak a, kuminah pawh sing sarih chuang thar leh tawhin hengte hi pangang chi (tui) siamna atan Aizawlah thawn thlak thin an ni. RKVY hnuaiah Eri pangang vulhtute tanpuina leh hmanrua pek tum mek a ni a, Central Silk Board bultumin kan district-ah hian chhungkaw 60 te chu Eri pangang vulh tura thlan niin bul an tan tawh hlawm a, a chaw hmun lo nei sa te phei chuan cocoon an thar tan der tawh a ni. Pangang vulhtute tan pangang chi hi ngaihtuahsak zel a ni a, an cocoon thar chhuahte pawh lei sak nghal zel an ni.

SEDP hmangin kan district chhunga ar vulh tu chhungkaw 29 te hnenah tanpuina pek an ni a, FOCUS Project atangin khaw 52-ah ar note 9600 semchhuah a ni bawk. Vawk note thar chhuahna turin Vawk mir chhungkaw thlan chhuah 10-te chu vawkin sak sak an ni a, vawk note subsidy a pek an ni bawk. Kel Vulhtu Society te hnenah kel note engemawzat pek a ni bawk.  

Chhungkaw hmasawnna tur lam hawi zawngin SEDP hnuaiah ruahmanna siam a ni a, he scheme hnuaiah hian beneficiary te thlan niin, an eizawnna duhthlan ah bul tanna tur cheng sing nga (Rs. 50,000/-) pek an ni dawn a. A enkawltu department 9 te chu beneficiary an neihzat a zirin, he programme kalpui nan hian a vaiin sum vaibelchhe 328.13 ruahman a ni.

Ration buhfai, Midday Meal, Wheat Based Nutrition Programme leh National Food Security Missions hnuaia hmalakna hrang hrangte DCSO chuan tha takin a kalpui a, Fûrpuiah pawh buaina tâwk lova kan awm theih nan,  Monsoon Stock te siamin, harsatna tâwk lovin kan awm thei a ni.  

Mipuiten tehna leh bukna dik hnuaiah ngei an mamawhte an lei theih nan Legal Metrology chuan hma chak takin a la a, kum kalta chhung khan kan district-ah bukna leh tehna endik hna hi tum 705 zet neih a ni a, a dik tawk lo an hmuh chhuah te chu an hnâwl sak thin a ni.

Kan ram ngawte kan tuai thar leh theih nan Afforestation hi Thenzawl Forest Division hnuaiah Scheme pahnih Green India Missions leh National Afforestation Programme te kalpui mek a ni a, ram 2991.8 Hectare a zauvah plantation kalpui a ni. Ram kang ven kawngah nasa taka hmalak a ni a, kuminah khan Meikawng (fireline) km 41.9 a thui sial niin kum hmasa lama lo siam tawh Meikawng km 8 a thui tuaihnum a ni bawk a, thla 4 chhung atan Fire Watcher mi pariat rawih an ni. Kumin Green Mizoram Day-a district inelna ah pawh lawman pakhatna kan dawng nghe nghe a ni.

Serchhip Fire Station chuan kum khat chhungin kangmei vanga kohna vawi 28 a dawng a, heng zinga 25 te hi ram kang niin, a dang pathumte hi In kang a ni. Fire & Emergency Service, Serchhip Fire Station hian fire awareness campaign te nei in, kangmei a lo chhuah palh a chhanchhuah hnathawh dan tlangpuite School hrang hrangah kalin zirtirna an pe thin a ni.

Kan district chhungah Cooperative Society 111 a awm mek a. Heng Society te enkawl hna hi District Cooperative Office chuan a thawk a, an hmalakna kawng hrang hrangah tanpuiin an sum dinhmun a endik sak bawk thin. Audit hnuhnung bera a lan danin kan Society 111 te kum khat sum che vel belh khawm hi Rs. 348.77 lakh vel a ni. PM Vandhan Yojana hnuaiah Van Dhan Vikas Kendra hi Cluster 16 din a ni tawh bawk.   

Housing for All (Urban) atangin Serchhip khawpui chhungah chhungkaw 404 te hnenah in sak tanpuina cheng nuaih khat singnga theuh pek an ni a, tunah hian chhungkaw 341 ten in thar an nei tawh a ni. Thenzawl leh North Vanlaiphaiah chhungkaw 121 ten in sakna sum hi an dawng tawh a ni. Housing for All (Urban) thawh hnihna hi chhungkaw 947 te hnenah tun hnai mai khan 1^stInstalment pek an ni leh tawh bawk. DAY-NULM atangin Subsidy Loan mimal 225 pek an ni tawh a, Covid19 hrilengin a tih buai vendors mi 40 te hnenah PM SVANidhi loan pek an ni bawk. Swatch Bharat Missions Urban hmalakna hmangin vantlang inthiarna 16 sak zawh tawh a ni a, Individual Household Latrine sakna mi 1,181 te hnenah 1st Instalment pek an ni tawh bawk.  

PMMVY hmangin nu naupaite chu Maternity Benefits Rs.5000 theuh pek thin an ni a, kumin chhungin nu 142 te hnenah pek tawh a ni. National Nutrition Missions hnuaia hmalakna hrang hrangte pawh tluang taka kalpui zel a ni a, an taksa mamawh tawk eitur tha ei phak lo naupang 15 zinga pariatte chu Severe Acute Malnourished (SAM) hmalakna hmangin Normal Children ah enkawl hlawhtlin an ni. Anganwadi 49 te chu ei tur thlai thianghlim leh hrisel tharna tur huan (Nutri Garden) nei thei tura ICDS Project hnuaia thlan an ni. Anganwadi Workers zawng zawngte chu Poshan Abhiyan hmangin Smartphone pek vek an ni a. Hei hi an hnathawhna lamah an tih turte tha taka thawka, chhin chhiah ngaite mumal taka an chhinchhiah theih nan leh Poshan Tracker atan te a hman tur a ni.

Kum khat liam ta chhungin naupang enkawl leh venhim ngai case 64 chu Child Welfare Committee-ah ngaihtuah a ni a, Juvenile Justice Board-ah case 8 a lut bawk. Children's Home pahnih kan nei a, naupang 22 enkawl mek an ni. Tunah hian naupang dan kalh a che te enthlakna (Observation) Home-ah mi 2 an awm mek bawk. Kumin chhung hian District Child Protection Unit atangin naupang 82 te chu sponsorship thla tin Rs. 2,000 pek an ni. Khaw hrang hrangah naupang venhim leh enkawl chungchang zirtirna neih thin niin, khaw tinah Village Level Child Protection Committee din a ni tawh a, district chhung school zawng zawngah Nodal Teacher for Protection of Child Rights ruat vek an ni tawh bawk.

Serchhip Zone atangin kum kalta chhungin GST Rs. 137.86 lakh te,

Profession Tax Rs.88.68 lakh te leh VAT Rs.83.86 lakh te Deputy Commissioner of State tax chuan a la khawm a ni.

District Transport Office chuan lirthei kaihhnawih chhiah chi hrang hrang Rs.110.35 lakh an khawn tling tawh bawk. Kum kalta chhung khan Serchhipah hian lirthei thar 698 ziah luh a ni. Tunah hian Serchhip District Transport Office Building thar sak mek a ni a, September thla hian hawn hman beisei a ni.

Land Revenue & Settlement Department, Serchhip District chuan kum kalta chhungin Tax Revenue Rs.48.79 lakh te, Non-Tax Revenue Rs.6.2 lakh te la khawmin, in hmun lo ram chhin chhiah, pass pek, re-issue, renew, thendarh leh property registration hna chi hrang hrang an thawk a. National Generic Document Registration System (NGDRS) pawh November ni 26, 2021 atang khan kalpui tan tawhin, Serchhip District hi Mizoramah online registration kalpui thei District pahnihna kan ni nghe nghe a ni.

Information & Public Relations Department chuan Mizoram pum huapin lemziak mite, film siamtute leh thlalatute tan online programme vawi 5 leh offline programme vawi 4 a buatsaih sak a. Film siamtu mi 32  hnenah short film leh documentary siamna tur sumfai a tanpuina pek a ni. Mizoram Journalists Association member te leh an chhungte tan damdawi ina inenkawlna cheng nuai 20 pekchhuah a ni a. NEC sum hmanga sak Lianchhiari Run sak hna chu 80% vel thawh zawh a ni tawh. I&PR Officer leh Journalist te pawh Bureau of Parliamentary Studies & Training (BPST), Parliament, New Delhi-ah Parliamentary Process & Procedures for Media Persons training tura tirh an ni. I&PR hian kumin March thla khan Department din champha phak vawi sawm ngana ‘Golden Jubilee’ a lawm bawk a ni.

District Panchayati Resource Centre chuan kum 2022 chhungin Village Council hrang hrangte pualin training vawi 7 a buatsaih sak tawh a, Covid-19 hripui avanga state danga hnathawk lo kir te puala eizawnna lam hawi zirtirna, Mizoram Youth Commission, Deputy Commissioner leh SIRD tang kawp ten an buatsaih pawh DPRC ah hian tha taka neih a ni.

Serchhip District Treasury Office hnuaiah Drawing & Disbursing Officers (DDOs) hi 47 awm mekin, State Pensioner 1500, Central Pensioner 42 leh State dang mi pensioner 4 an awm mek a. Heng sawrkar sum chet velna zawng zawngte hi fel takin Treasury Office hian a enkawl thin a, sawrkarin sum leh pai enkawl dan thar Integrated Financial Management Information System (IFMIS) kalpui theih turin Treasury Office hi thuam chhoh mek a ni bawk.

Consumer Price Index (Urban) hi thla tin hapta hmasa berah leh hapta vawi thumnaah te siam thin a ni a, bungraw thlan chhuah bik atangin Retail Price Index leh Wholesale Price Index te thla thum danah siam a ni thin  a, Industrial Product Survey te, cement leh iron rod lak luh chhinchhiah hna te, kan thei leh thlai man chhinchhiah hnate bakah, Birth & Death Certificate Issue leh re-issue chi tinrengte chatlak miah lovin District Research Office kaltlang a thawh thin a ni.

Mizoram Co-Operative Apex Bank, Serchhip Branch chuan kum kalta chhungin deposit Rs.4,146 lakh a hmu a, ACP Loan hi Rs.241.68 lakh pe in, kum khat chhungin profit Rs.133.52 lakh a nei hman a ni.

SBI Serchhip Branch hnuaiah PMJJBY leh PMSBY scheme latu hi mi 656 an awm mek a, PMEGP Loan hi mi 6 hnenah pek thar niin Rs.48.99 lakh pek chhuah a ni. Kisan Credit Card hi mi 36 hnenah pek niin, Standup India loan hi mi 1 hnenah leh MUDRA loan hi mi 4 hnenah pek thar a ni. Kum kalta chhung khan Serchhip Branch hian Deposit Rs.9000 Lakh chuang hmuin chung zinga a zatve aia tam Rs. 5000 Lakh chuang hi loan Advance a nei a ni.

Awle, he ni lawmawm tak hmang tura lo kal kan zirlai naupang duhawm tak tak leh Sawrkar hnathawk te, chanchinbu mite, kohhran hotute/hruaitute leh tlawmngai pawl aiawh hrang hrangte, in chungah lawmthu ka sawi a. Remna leh muanna vawng nunga ramin hma a sawn zel theih nan mahni zawn theuh a rinawm taka thawk leh hma la chhunzawm zel turin ka sawm duh che u a ni.

A tawp berah chuan Sawrkar chuan hmathlir thui tak neiin ruahmanna leh ngaihtuahna a siam zel a, kum engemaw zat kan State thenawm nena ramri buaina kan neih pawh chin fel hna thawk zelin, theihtawp a chhuah mek a, engtik ni ah emaw chuan kan ram thenawm te nena ramri buai kan neih hi chinfel ala ni ngei ang tih hi ka ring tlat a. Mipuite hemi chungchangah hian Sawrkarah rinna nghat ngam tur leh, Sawrkar thlawp tlat turin ka sawm duh che u a ni. Hmasawnna kan ramin a neih theihna tur atana sawrkarin kawng a sial mekah Sawrkar tha ti chak tu ni zel turin ka sawm duh bawk che u a ni.

Ka lawm e

JAI HIND