Thian duhtakte,
Kan hriat theuh angin kumtin Armed Forces Flag Day chu December ni 7 hian rampum huapin kan hmang ziah thin a. He ni pawimawh tak hi min venghimtute, kan tana nun lo hlan tawh tu sipai huaisen, kan pasalthate leh tuna kan sipai ni mekte chawimawina leh zahna kan lantirna hun a ni. Kan sipaite hi kan ram venghimtute an ni a; anni hian englai pawhin an nunna thap huamin min venhim hna an thawk a. Kan ram ropui tak chuan heng kan sipai huaisen ram tana nunna hlan tute zahna chibai a buk a ni.
Kan sipai te zahna kan lantir rual hian khua leh tui te chuan kan sipai huaisen martar ten an kalsan tak an chhungkua te leh sipai huaisen ram venhimna atana theihtawp chhuah avanga taksa lama harsatna nei te tanpui a, sum leh pai ang zawnga kan theih ang anga lo tanpui hi kan tihtur a ni.
Armed Forces Flag Day pual hian khua leh tui te zawng zawng te chu tanpuina thil pek phal taka pe chhuak turin kan insawm a. Armed Forces Flag Day hi awmze nei taka hman niin kan hman chhan langsar zual te chu heng te hi a ni :-
(a) Indona hmuna sipai thi, hliamtuar leh Indona in a nghawng avanga harsatna tawk, sipai te dinhmun siamthat.
(b) Ex- Servicemen leh an chhungkua ten in leh lo an din that leh theihna tura tanpui. Tin, Ex- Servicemen leh an chhungkua te tana hamthatna ngaihtuahsak.
(c) Sipai a tang mek leh an chhungte puala hamthatna ngaihtuahsak, te a ni.
Vawiin ni pawimawh takah hian ka sawi tel duh chu, Mizoram atangin sipai huaisen tak tak, ram venhimna kawnga thawh hlawk tak tak an lo chhuak tawh thin a. Tun thleng hian India Sipai atana thawh hlawk tak state kan la ni a. Kan state atang hian nula leh tlangval huaisen leh chhuanawm tak tak, India ram leh Mizoram ti hmingtha tu tam tam lo chhuak tawh in, an la awm mek zel bawk a ni.
Kum tin, Flag Day pual hian vehbur khawn a ni thin a. Nikum chhung kha chuan Hripui leng avangin kan ti thei ta lo a. Amaherawhchu, sawrkar office hrang hrangah te vehbur khawn niin nikum khan Rs 70,000/- tanpui sum thawhkhawm a tling khawm a. Heng te hi kan sawi tawh ang khan Ex-Servicemen leh an chhungte tanpui ngai apiang pui nan hman a ni thin.
Khawtlang mipuite, sumdawngte, sawrkar hnathawk leh mi thahnem ngai zawng zawng te, he ni pawimawh tak puala vehbur khawn hi ngaipawimawh a, sum thehchhuak leh turin kan in ngen leh a. Kan himna tura theihtawp chhuahtu te hi kan hriat renga tanpui an lo ngaih takah chuan kan theih tawpa lo tanpui turin kan in ngen bawk a ni.
He rawngbawlna huangah hian tlem lua leh tam lua a awm lo a. Tuihna tlem te te luangkhawm ten Tuifinriat a siam tih hre reng ila. He Armed Forces Flag Day ah hian khua leh tui zawng zawng te thil phal turin kan in sawm a ni.
Ka lawm e.
Jai Hind
