Zoram mipui duhtak te,
CHIBAI,
A hmasain Krismas leh Kumthar duhsakna chibai ka buk a che u.
Krismas hi kan Lal Isua pianna hlim leh lawm taka kan hman hun a ni a. He hun pawimawh tak, Lei leh Van inremna ni ah hian remna leh muanna kan thupui ber lo ni se. Remna hi tunlai khawvel inghirnghona leh buaina kara kan mamawh ber a ni tih I hria ang u. He hunah hian Lal Isua khan midangte hmangaihna leh lainatna a zirtir tih hre thar leh ila. Midangte te nen inngaidam tawnin thlamuang taka len za I tum ang u.
Kan hun tawngah hian midangte rem thei hlei thei lova inlak hran tumna hmun tam takah te thleng mek bawk mahse Lal Isua’n min zirtir angin inpumkhatna leh in unauna te vawn nun tlat kan tum tur a ni. India ram inpumkhatna tan mi chi hrang hrang te zai khata luan ho tih kan thupui ni reng thin hi Mizoram chhunga cheng hnam peng hrang hrang leh sakhaw hrang hrang vuantute tan pawh hian kan inpumkhatna atan a pawimawh em em tih hre tlang ila. Khua leh tui tha, sawrkar thurel te tha taka zawm thin kan nih angin engkim huamin sakhuana emaw thil dang vanga kan danglamna deuh te pawh dahtha inremna leh muanna a awm theih nan theih tawp I chhuah tlang zel ang u.
Mizoram hi ram mawi bik, sik leh sa thuah pawh hmun nuam em em mai leh a chhung boruak pawh thianghlim tak a ni a. State chhung hmun hrang hrang te ka fang kual tawhin khua leh tuite nen pawh in biangbiakna kan nei nual tawh a ni. Heng a ka thil hmuh chu mipui an hawihawm a, an inlungrual hle tih ka hmu a. Hei hi thil lawmawm tak a ni a, tun aia kan tan mar leh zual chuan kan theihna sang tak hian hlawhtlinna lian zawk min thlen dawnin ka hria a ni. Kan Prime Minister in India Thar leh intodelhna a lo suangtuah thin pawh kha Central leh State sawrkar hmalakna kan thlawp tlat chuan a ti hlawh tlingtu zingah kan tel ngei dawnin ka hmu lawk bawk a ni.
Tun hunah hian Central Sawrkarin hmasawnna atana hmalakna hrang hrang - Pradhan Mantri Jan Dhan Yojana, Pradhan Mantri Jeevan Jyoti Bima Yojana, Pradhan Mantri Suraksha Bima Yojana, Atal Pension Yojana, Pradhan Mantri Ujjwala Yojana leh a dang te a kalpui hi ngaihven thar turin khua leh tui te ka chah a. Heng hmalakna pawimawh tak tak te hi a dawng theitu a piang te chu tangkai taka hman tum turin ka duhsak a ni.
Kumin Christmas-ah hian he Hripuileng avanga miharsa zawkte theihnghilh lo tur leh tanpui turin kan in ngen a. Khawvel lawmnan a lo kal tih hre thar leh ila, Christmas in a thil tum dik tak hre rengin midangte tanpuiin hlimna leh lawman thlentu nih I tum theuh ang u.
Kum 2022 chu kan lo thlahliam leh dawn ta reng mai a. Tunah hian phur tak leh beiseina sang tak nen kum 2023 hmuak turin inpuahchah leh mek a ni. Kum lo thar turah pawh khua leh tui thain a ram hmasawnna leh a ropui zual zel nana a tih tur te ti chhunzawm zel turin kan in chah nawn leh bawk a. Kum tharah pawh ram intodelh, ram hausa leh India thar siam turin hmalam panin ke I pen zel ang u.
Chrismas leh Kumthar hlim leh lawm taka hmang theuh turin duhsakna chibai ka buk nawn leh a che u!
KA LAWM E
Jai Hind.
