Independence Day vawi 76-na lawmna hun hmanga lo kal te leh Champhai district mipui zawng zawngte, in zavaiin chibai ka buk a che u! A hmasa berin vawiinah hun tha tak mai hmang theia kan awm avangin Pathian hnenah lawmthu ka sawi a ni.
2. India ram chuan August ni 15, 1947-ah British awpna atanga zalenna neiin, Independent Ram a lo ni ta a. Hetianga ram dang awpbehna atanga chhuahna Ni Ropui tak champhaphak kan hmang leh thei hi a ropuiin a hlu em em a ni.
3. India ramin zalenna a neih theihna atan hian ram hruaitu hmasa ten an nunna hlu tak leh an hun hlu tak an lo hlan a. India zalenna atana India ‘Hnam Pa’ Mahatma Gandhi te, Jawaharlal Nehru te, Dr. Rajendra Prasad leh hruaitu dang tam takte inpekna leh inhlanna a ropui hle a ni. He Ni Ropui takah hian an inpekna leh inhlanna zozaite hre thar leh ila, kan zalenna thawhk chhuaktu zawng zawngte zahna thinlung nen he Ni hi hmang turin ka sawm che u a ni.
4. Hripui leng karah mipui leh sawrkarin harsatna hrang hrang kan tawk a. Hun thim zual a kiang deuha kan ngaih laiin hri kai kan pung chho leh mek a, hun engin nge min hmuak tih pawh sawi thiam a harsa rih viau mai. Sum leh pai, ei-bar zawnna kawngah thlengin harsatna namai lo tak kan tawng chho mek zel a, chutiang chu ni mah se, mipuite mamawh phuhruk turin kan sawrkar chuan theihtawp a chhuah ve reng a. Tin, development lamah pawh department hrang hrangin taima takin hna an thawk zel a, duhthusamin hma sawn zung zung lem lo mah ila, kan bei sauh sauh zel dawn a ni.
5. Champhai district-a sawrkar department hrang hrang pawhin tha thlah lovin mipui tan taima takin hna an thawk reng a. Department tinte thawhrimna leh inpekna hi mipuiin an chhawrin an hlawkpui zel ka beisei tlat a ni. Nikum Indpendence Day leh kumin inkara department hrang hrang hmalakna thenkhat han tarlang ila -
AGRICULTURE : FOCUS hnuaiah Wetland Agriculture tanpuina leh buh tuhna hmun tih zauh nan hectare 45 zetah hma lak a ni a, mi 70 tan tui lian danna siamsak a ni. Tui dahkhawlna siamsak leh tui verhsak hnate thawh a ni a; Hnahlan, Tualcheng leh North Diltlang-a chhungkaw 140 hnenah Apple tiak 100 theuh sem chhuah a ni a, hmarcha chi pawh khaw hrang hranga mi 400 hnenah pek a ni bawk. Mi 1100 hnenah ar note bakah tui leh chaw pekna sem chhuah a ni tawh a, mi 63 hnenah man tlawm zawkin vawk note hralh chhuah a ni a, khaw panga (5)ah Sial vulh tanpuina chi hrang hrang pek a ni bawk.
AH & VETY : SEDP Pilot Project hnuaiah chhungkaw 24 hnenah Ar vulh tanpuina installment vawi 3 pek ni tawhin Broiler Farming thlangtu chhungkaw 20 hnenah Rs. 1,27,450/- theuh leh Rainbow Rooster Farming thlangtu chhungkaw 4 hnenah Rs. 1,23,200/- theuh pek a ni tawh bawk.
Special Central Assistance (SCA) hnuaiah Saikhumphai, Sesih, Leisenzo khuaah te Vawk in leh a chaw dah khawlna tur (Feed Godown) sak zawh tawh niin Hnahlan Laili Phaiah sak mek a ni bawk.
African Swine Fever (ASF) leng avangin vawk-te pek an la ni lova, hri a reh veleha pek nghal tura ruahman a ni. ASF tihziaawm tumna kawngah MLA pathumte, DC leh department hma lak hona avangin disinfectants (Bleaching Powder leh Sodium Hypochloride) eng emaw zat sem chhuah a ni a, District Level Coordination Committee on ASF hmalaknain Keifangtlang bul thuta Sub. Headquarters YMA ramah vawk thlanmual (Common Grave Yard) siam a ni bawk. Tin, ASF avanga vawk chante tan loan an lak an rulh hun pawhseisakna turin district thuneituten hma an la mek bawk a ni.
ATMA : Agriculture leh allied department hnuaiah demonstration hrang hrang vawi 17 neih a ni tawh a, district chhunga khaw hrang hrang 14-ah loneitute training neihpui an ni. Kuthnathawktu ten interest group 12 an din a, chungte tan chuan an bul tanna tur tanpuina pek a ni a, hlawhtling takin an inrelbawl mek a ni. Tin, kut hnathawktute chu Mizoram chhung district dangah exposure visit neihpui an ni a, hei hian hlawkna tam tak a paw chhuak mek bawk.
District chhung khaw pahnihah Farm School nei tawhin khaw pathumah capacity building hun hman a ni tawh a, thlai thar sengkhawm lawmpuina hun (Kisan Gothis) pawh khaw pathumah neih a ni.
COMMERCE & INDUSTRIES (COMMERCE WING) : Special Assistance to State for Capital Investment Scheme (SASCI) hnuaiah Land Custom Station (LCS), Zokhawthar thuam thatna atan Rs. maktaduai 15 hmuh a ni a, hna thawh tan mek niin he scheme hian Immigration Check Post (ICP), Plant Quarantine, Animal Quarantine, Truck Terminal leh thawktute chenna tur sak te a keng tel a ni.
Sawrkar leh Champhai DC thupek bawhzuiin Champhai District chhunga sawrkar enkawl bazar/market chhungah hman khat daih (single use plastics) tihtawp a nih theih nan hma lak mek a ni a, bazar-a thil zuarte hnenah leh anmahni dawrtute hnenah polythene bag leh plastic water bottle hmang lo tura inzirtirna kalpui mek a ni.
DEPUTY COMMISSIONER : ILP 435 pek chhuah niin heta tanga sum hmuh Rs. 15,88,690/- chu sawrkar sum bawmah chhun luh a ni. Mi 3331 tan biometric enrolment (Aadhaar) tihsak an ni a, certificate hrang hrang, Residential – 769, Tribal – 1205, Income – 1041 pek chhuah a ni. Silai license leh fee dang atanga sum tlingkhawm Rs. 6,35,822/- chu sawrkar-ah chhun luh a ni.
Disaster Management & Rehabilitation (DM&R) branch atangin in leh vantlang hmun, lo leh leilet chhia eng emaw zat tan tanpuina sem a ni a, leimin ven nan silpaulin thahnem tak sem chhuah a ni bawk. Kangmei leh thlipuiin in a tihchhiatsakte pawh dan dinglai anga tanpui nghal zel an ni. Ruahsur avanga leiminin kawng a hnawh pinte pawh khawl leh mihring tha hmanga thenfai nghal zel a ni bawk.
Lirnghing tehna khawl in (Seismograph Centre) chu tun hnai khan Rs. 3,04,000/- senga bun a ni a, state pawn lam atanga mi thiam te endik turin peh a ni tawh.
Champhai khawpui chhung faina leh thianghlima kawnga hma kan sawn zel theih nan Champhai Solid Waste Management Bye Laws 2020 chu hman theih tur a siam a ni a, hetah hian mumal taka bawlhhhlawh paih leh sawngbawl dan turte, dan bawhchhetute hremna tur leh thuneitu turte chiang taka ruahmanna siam a ni.
National Green Tribunal leh Mizoram State Pollution Control Board thu bawhzuiin Champhai District tan Champhai District Environment Plan chu siam a ni a. He Plan hnuaiah hian environment chungchanga hmalakna hrang hrang – bawlhhlawh leh plastic chhia sawngbawl dan, damdawi hluihlawn sawngbawl dan, tur leh zungzam hlauhawm (radiation) nei hnawm sawngbawl dan, electronic hmanraw chhia sawngbawl dan, tui thianghlim leh thianghlim loh endik chungchang, inchhungkhur thli luang thehthang dan ruahmanna, boruak thianghlim nei tura ruahmanna, thil laihchhuahna hmun vawn thianghlimna kawnga ruahmanna, ri bengchheng avanga harsatna thunun kawnga ruahmannate a tel a ni.
Raltlan buaipui hna a thawk zel a, khaw hrang hranga raltlan dahkhawmna te chu fang chhuakin an mamawh zualpui phuhruk nan leh inrelbawlna hrang hrang atan Rs. 1,15,78,825/- sen ral a ni tawh.
Champhai South bialtu MLA leh Transport Minister ni mek Pu TJ Lalnuntluanga hmalaknain office chuan bus a nei thar a, office staff tan mai ni lo, mipui nawlpui tana chetvel a tihawlsam phah hle a rinawm.
Dan leh thupek kenkawh kawngah theihtawp chhuaha hma lak niin dan loa sumdawng leh dan phal loha thil titute chungah dik taka hremna lek kawh a nih theih nan tan a la zel a ni.
DIET : DIET Building vertical extension khawih mek a ni a, Girls’ Hostel tur pawh sak tan mek a ni. Tunah hian B.Ed zir theihna turin hma lak mek a ni a, Mizoram Teacher Eligibility Test (MTET) ah zirlai mi 334-in exam an hmachhawn bawk. Tin, kum 2022 chhungin school 13-ah National Achievement Survey neih a ni.
DISTRICT JAIL : Hripui darh tur ven nan 4C siam a ni a, tang awm tharte leh jail chhunga vei awmte dahhran nan leh enkawl dam nan tangkai taka hman a ni. Tang zingah mi 86 chuangin hripui an vei a, hnathawkte leh medical lama thawkte inpekna avangin pawn lama refer ngai lovin tihdam vek an ni.
Hmeichhe ward zim leh hrehawm tak chu Addl. District & Sessions Judge ruahmanpuinain tihzau niin hawi khawthawnna nuam tak leh thlai chin theihna tura siamrem a ni thei ta a ni.
ECONOMICS & STATISTICS : Bungraw thlan bik thenkhat man chhiar dan zir bingin chumi hmang chuan consumer price index leh inflation rate-te chhut thin a ni a, minimum wage chhutna turin zirna hrang hrang kalpui a ni bawk.
EXCISE & NARCOTICS : September 2021 leh July 2022 chhungin MLPT Act 2019 hnuaiah Zu chi hrang hrang Rs. 1,03,63,770/- man hu leh NDPS Act 1985 hnuaiah ruihtheihthil Rs. 3,99,56,880/- man hu man niin, a vain Rs. 5,03,20,650/- a tling a ni. Hemi kaihhnawihah hian mihring 238 manin case 389 zet ziah luh a ni bawk.
Tin, hna thawh that avangin Sub Inspector J. Laltlanmawia chuan Governor’s Gold Medal dawngin, Sub-Inspector C. Zodinpuii chuan Silver Medal a dawng ve bawk a, AR Lammual, Aizawla Independence Day lawmnaah he chawimawina hi hlan an ni.
FOOD, CIVIL SUPPLIES & CONSUMER AFFAIRS : South Khawbungah buhfai metric ton 200 dah theihna Godown thar peih fel a ni a, DCSO bial chhungah Aadhaar Seeding pawh zaa 94.95 tihzawh tawh a ni. Ration card hi 18825 awm mekin buhfai dinhmun a tha a, mipui tan hlauhthawn tur a awm lo. Gas leh Oil lamah pawh harsatna a awm lo.
PMGKAY hnuaiah buhfai quintal 23404 pek chhuah a ni a; One Nation One Ration Card (ONORC) hnuaiah Ration Card transfer kher lovin district danga mite pawhin kan district atangin buhfai an la mek a ni.
HORTICULTURE : Off Season Tomato (Arka Samrat leh Arka Abed) hlawhtling taka chin a ni a, tun fur ruahtui tlak lai hian a rah sengin thar chhuah zawng zawng quintal 1132.40 man lei chhuahna zat chu Rs. 51,41,096/- a ni. Tin, off-season Cabbage quintal 2199 thar tawhin sum hmuh zat chu Rs. 94,33,500/- zet a ni. Heng bakah hian chhungkaw 32-in Dawnfawh chingin quintal 124.15 an thar tawh a, Rs 14,72,250/- lai an hmu chhuak bawk.
Champhai Districta khaw 10 chuang atanga Serthlum thar chhuah zat chu quintal 2318 niin heta tanga sum hmuh zat chu Rs 43,76,900/- a ni a, Selam chu serthlum thar chhuak tam ber khua a ni.
SEDP hnuaia Pilot Project pawimawh tak pakhat ‘Pilot Project on Cultivation of Passion Fruit’ hnuaiah Mualkawi leh Ngur khuaa chhungkaw 20 ve vein Sapthei chingin kumina an thar chhuah quintal 180 hralhna atangin Rs. 5,60,000/- an hmu tling der tawh a ni.
Khuangthing, Samthang, Thekpui leh Thekte khuaahte Hmarchate chinna Unit 40 kalpuiin chhungkaw 574 zetin Mizo Hmarchate (Zo chilli) an ching a, kum 2021 tawp lamah khan sengin nisaa an pho ro hnuah kg 1 Rs 250 – Rs. 400 in February – April thla chhung khan an hralh a, an tharchhuah zawng zawng hi tihro hnuah quintal 745 niin hemi hralhna atanga sum hmuh chhuah chu Rs. 18,62,500/- chuang a ni.
LAND CUSTOMS STATION : Customs leh NDPS Act hnuaiah case 83 ziah luh niin Rs. 37,11,30,984/- man hu bungrua man a ni. Swachhta Plan kaltlangin Vangchhia-ah vantlang zun in tur sak mek a ni a, office leh a vel chu Single-Use Plastic hman lohna hmuna siam turin hma lak mek a ni bawk.
LAND REVENUE & SETTLEMENT : Office in chhiah a lak khawm zawng zawng chu Rs. 1,25,63,794 a ni.
FISHERIES : Pradhan Mantri Matsya Sampada Yojana Scheme( PMMSY) hnuaiah dil thar laihna tur (Construction of New Pond) tanpuina mi 100 hnenah pek a ni a, sangha chi vulh/ khawina tura dah lawkna (Construction ofFingerling Rearing Area) siam nan mi 10 hnenah tanpuina pek a ni bawk a, mi pakhat hnenah sangha chi siamna tur (Establishment of Carp Hatchery Unit) tanpuina pek niin Zotlang-a sanghal dil neitu pakhat hnenah ornamental sangha khawina tur (Establishment of backyard ornamental rearing Unit) tanpuina pek a ni bawk.
SEDP Scheme hnuaiah chhungkaw eng emaw zatin sangha siam/khawi a eizawnna an neih theih nan hma lak mek a ni a. Kum 2021-2022 chhung hian Champhaia sangha khawitute hnenah 70% subsidy-in sangha chi/note nuai 5 sem chhuah a ni.
FOREST, ENVIRONMENT & CLIMATE CHANGE : Nagar Van (Urban Forest) scheme kalpui niin Champhai khawpui chhung reserve forest hectare 50-a zauah hma lak mek a ni, he Scheme atan hian Rs. nuai 140 ruahman a ni.
NEC hnuaia project ‘Afforestation of Denuded Hills in Champhai District’ kalpui mek niin Champhai Panchayat Reserve area hectare 369-a zauah thingphun tharin hmunhma cheibawl mek a ni a, hemi atan hian Rs. nuai 80 ruahman a ni.
Champhai Zotlang ramah Botanical Garden siam tura hma lak tan mek a ni, ‘View Tower cum Water Storage tank’ siam a ni tawh a, gate leh fencing siam a ni tawh bawk. June ni 2, 2022 khan Hon’ble Minister EF & CC-in a lungphum a phum. He hmunah vek hian Interpretation Centre siam mek a ni bawk a, hemi atan hian Rs. nuai 80 ruahman a ni,
Champhai District chuan Mizoram pum huap ram kang ven kawnga hnathawk tha lawmman 2-na a dawng a, he chawimawina hian certificate leh pawisa fai Rs. 30000/- a keng tel a ni.
Green Mizoram Day 2022 ah khan Champhai Forest Division hnuaiah thingtiak 16393 phun a ni.
HEALTH & FAMILY WELFARE : Health program hrang hrang tha taka kalpui zel a ni a. Covid-19 dona kawngah pawh theihtawpa hma lak zel a ni.
District Hospital OPD-ah mi 25445 an inentir a, casualty-ah mi 5123 inentir zawng zawng atanga mi 4593 chu admit an ni. Mitthi 185 awmin nau piang 986 an awm thung.
AB-PMJAY hnuaiah beneficiary 732 awmin an bill Rs. 27,43,842/- chu buaipuisak mek an ni a, Mizoram State Health Care Society (MSHCS) hnuaia beneficiary 223 te bill Rs. 32,66,831/- pawh buaipui mek a ni.
PM Cares Fund atangin PSA Oxygen Generating Plant (500 LPM) dawn a ni a, CPWD ten installation an tihfel hnuah ni 7.10.2022 khan Dr. ZR Thiamsanga, MLA & Vice Chairman, H&FW Board chuan a hawng a, tangkai taka hman mek a ni.
Covid-19 hripui leng mek dona kawngah leh damlote enkawl chungchangah District Hospital Champhai chuan Health & Family Welfare Department, Government of Mizoram atangin hnathawh that avanga chawimawina ‘Certificate of Appreciation’ a dawng a, ‘Ayushman Bharat Pradhan Mantri Jan Arogya Yojana’ (AB-PMJAY) hnuaiah bill bawhzui tha ‘Certificate of Recognition’ a dawng bawk.
HIGHER & TECHNICAL EDUCATION – CHAMPHAI GOVERNMENT COLLEGE : Session tan hmain zirlai zawng zawng tan IQAC chuan Online Orientation Programme a buatsaih a, May 27-28, 2022 chhung khan Finishing School – Career Orientation Course for Core Students a buatsaih bawk.
MZU Under Graduate Even Semester exam 2021-a rank neih pha chin hnenah GCC Incentive Awards hlan a ni a, tin, zirlai te enkawlna - Mentoring System chu Student Support and Progression Committee-in a kalpui bawk.
04 Bikers, NIELIT, Govt. Vengthlang Middle School leh MISTIC ten en thawhhona thuthlung ziah a ni a, hemi hmang hian kawng hrang hranga hma lak tum a ni.
Boruak bawlhhlawh zel tur tihziaawm nan te, lirthei tui hman tlem inzirtir nan leh hlawhtling taka Fit India Movement kalpui a nih theih nan thla tina Thawhtanni hmasa ber chu No Vehicle Day atana puan a ni a, college bul hnaia awmte chu kea college kal tur te, awmna hla deuhte pawh college atanga km 1-a hlaah an lirtheite daha kea college pan thin tura tih an ni.
Department hrang hrangin zirlai pangngai piah lama thiamna leh hriatna paw chhuak thei tur thil hrang hrang zirna an klapui thin a, zirlai chhuak tawh te, la kal lai mekte leh zirtirtu thahnem takin college tihchangtlunna turin pawisa leh hmanrua/bungrua an thawh thin a, college pawhin nasa takin hma a sawn phah a ni.
IRRIGATION & WATER RESOURCES : I&WR Department chuan scheme hrang hrangah hma a la chho zel a, Minor Irrigation tihchangtlun nan PMKSY leh NABARD kaltlangin project 51 tihhlawhtlin tawh a ni a, tunah hian 6 kalpui mek a ni.
Tuikhai Anti-Erisoin Scheme hnuaiah Sesih khuaa Tiau lui bul hnaih lei luangral tur ven nan Rs. maktaduai 11 chuang DPR thehluh a ni.
National Hydrology Project hnuaiah ruahtui tlak dan tehna khawl tha chu Vaphai leh Hnahlan khuaa bun tura hma lak mek a ni a, Tuipui-ah chutiang ang khawl tha bik chu bun tum a ni bawk a, Champhai-ah Automoatic Weather Station bun tum mek a ni bawk.
Japan International Cooperation Agency (JICA) kaltlangin Tlangsam-ah Thliarpui Minor Irrigation Project kalpui turin NABARD chuan Rs. 1,38,83,000/- a pawmsak tawh a, hna pawh tan thuai theih inbeisei a ni.
Ground Water Irrigiation scheme hnuaiah khaw eng emaw zatah hma lak mek a ni a, tui verh hna pawh hmun 25-ah thawh zawh tawh a ni.
LOCAL ADMINISTRATION : 15th Finance Commission Grant 2020 – 2021 (2nd Installment) hnuaiah Tied Grant leh Untied Grant atan Rs. 2,19,83,500/- ve ve dawn a ni a, Untied Grant hi khaw chhung hmasawnna hna hrang hrang Village Council 62 te kal tlanga thawh nan hman niin Tied Grant hi VC leh PHE Department thawh hona hnuaiah drinking water, sanitation, ODF leh Swachh Bharat Mission Grant, adt. atana hman a ni.
RGSA hnuaiah Village Council 22 ten Panchayat Bhavan (VC House) thar sakna tur leh chei thatna tur an dawng.
POLICE : Heroin kg 11 leh gram 786, Rs. nuai 290 chuang man hu leh mepthamphetamine mum 76400, Rs. nuai 176 chuang man hu man a ni.
Ramri kana lak luh ramsa chi hrang hrang 500 vel lai man niin hengte hi District Wildlife Crime Control Unit kaltlangin Customs Preventive Force hnenah hlan a ni.
PHE : NLCPR hnuaia ‘Construction of Dam Reservoir and Development of Recreation Centre at Keilungliah, Champhai’ hna, Rs. nuai 1988 hmanga thawh chu zawh fel a ni tep a, metre 20-a sang tui khuahna (dam) hmanga tui khawlna tha siamna tur niin hei hian Champhai tui harsatna tawh mek pawh a tiziaawm thui hle tura ngaih a ni.
Jal Jeevan Mission (JJM) hnuaiah kum 2024 ah chuan thingtlang in tin ten an in chhung atanga tui an herh haw theih theuh nan hma lak mek a ni a, Swachh Bharat Mission – Gramin hnuaiah ek in tha neihna tur te, ek in chhe tawh siam that hna te, vantlang hman theih tur inthiarna siam te, a awm sa chei that leh bawlhhlawh leh thli paihna mumal siam hna te kalpui mek a ni bawk.
PWD : PMGSY hnuaiah Hnahlan leh N. Diltlang inkar kawng km 12.72-a thui siam leh chei that hna thawh zawh a ni a, NABARD kaltlangin Champhai leh Khawbung inkar kawng, Khawchhaktuipui thleng siam hna chu thawh zawh tawh a ni bawk.
SCHOOL EDUCATION : District Education Office Building thar, cheng nuai 200-a sak chu ni 2.11.2021 khan luah luh fel a ni a, he building tharah hian District Education Office leh District Project Office (Samagra) te suan luh a ni a, Training Hall a awm bawk.
DIET Champhai tihchangtlunna atan DIET Hostel Building sak mek a ni a, hna hi engemaw chen thawh zawh tawh a ni a, Zokhawthar Secondary School-ah Teacher Quarters pahnih sak mek a ni bawk.
Sawrkar leh private sikulah Myanmar rambuai avanga raltlan naupang 2064 zet admit an ni a, a remchan dan angin zirlaibu leh an mamawh dang ngaihtuahsak a ni.
Sikul naupang mamawh zirlaibu leh uniform te chu sawrkar enkawl primary leh middle School zawng zawngah pek a ni a, sikul zawng zawngah library tihchangtlun nan lehkhabu eng emaw zat pek a ni bawk.
Khawvel hmasawnna mila kan pen theih nan ICT lamah hma lak niin Govt. High school zawng zawngah Smart Class Room nei tura inruahman mek a ni.
Naupang tana hlauhawm thei school building endik niin sum awm dan ang zelin a thuam that hna pawh thawh chhoh mek a ni.
Sikul kal theih a nih leh tak hnuaha Girls Hostel pawh hawn a ni a, sawrkar sikul zawng zawngah (PS & MS) Mid–Day Meal pawh tha taka pek a ni bawk.
Rualbanlo naupangte’n sikul an kal ve theihna turin anmahni zawn chhuah hna leh a tul dan ang zela chhawmdawl hna pawh kalpui a ni.
Sub-Headquarters YMA nena tangkawpin sikul kal rual, kal si lo zawn chhuah beihpui thlak a ni a, a remchan ang zelin sikul kaitir dan zawn a ni bawk.
SEDP : Champhai District Socio-Economic Development Policy Committee chu March ni 24, 2022 khan din fel a ni a, DC chu Chairman atana ruat niin Member Secretary atan Project Director, DRDA ruat a ni a, member dang 17 an awm bawk.
Champhai District SEDP Committee hian assembly constituency 3 (East Tuipui, Champhai North leh Champhai South) hnuaia khaw 68-ah Village Level SEDP Committee din felin orientation training pawh pek an ni tawh a ni.
Village Level SEDP Committee-in beneficiary leh trade thlan an thehluh chu District SEDP Committee-in uluk taka a en a, a pawm hnuah SEDP Executive Boar hnenah a kal zel dan tur tihfel a nih theih nan a thawn fel tawh.
Family Oriented SEDP inakihhruainain a sawi angin constituency tin atangin beneficiary 1500 theuh thlan an ni a, Champhai District constituency 3 atangin a thawh khatna atan beneficiary 4500 hming thehluh a ni.
Champhai District chhungah hian department hrang hrang - Agriculture, Horticulture, AH & Vety, Sericulture, Fisheries, Soil & Water Conservation, Commerce & Industries leh UD&PA ten he scheme hi an enkawl dawn a ni.
SERICULTURE : Champhai District chhungah hian a chi siamchhuahna (Govt. Seed Farm) hmun 2-ah a awm a, Govt. Mulberry Seed Farm Champhai (Kanan Veng) ah cocoon kg 27.2 thar chhuah niin, Govt. Oak Tasar Seed Farm (Tlangsam) atangin cocoon 6500 nos. thar chhuah a ni bawk a, Mizorama Oak Tasar seed farm awmchhun a ni nghe nghe.
Hripui leng karah farmer ten pangang vulh/cocoon hralh hmanga eizawnna an neih zel theih nan theihtawpin hma lak a ni a. RKVY Scheme pawh kalpui niin chhungkaw eng emaw zatin eizawn nan an hmang mek a, pangang pui khat tui (1 dfls) atanga cocoon kg 25 vel lek thar thinte khan kg 50 te an thar thei ta hial a ni.
Pi Lalsangzuali Dungtlang chuan Mulberry Cocoon 181.6 kg tharin vawi khat vulh (thla khat) ah kg 82 a thar a, Rs. 20,000/- chuang a lei chhuak a, Pi Zoramthari Champhai Bethel chuan thla khat chhungin mulberry cocoon kg 84 thar chhuakin Rs. 20,000/- chuang a lei chhuak bawk a, thlai dang an chin tel hralhna atangin sum eng emaw zat an hmu chhuak bawk.
SOCIAL WELFARE : District Child Protection hmalaknain Zote-ah Champhai Observation Home sak mek a ni a, naupang 41 hnenah sumfai tanpuina pek chhuah a ni a, naupang 49 chu Children’s Home-ah dah luh niin naupang 24 te chu an chhungte hnenah dah let an ni bawk. Harsatna hrang hrang tawk case 55 vel chinfel a ni.
TRANSPORT : Lirthei ke pali nei chi 768 leh ke hnih nei chi 954 chhinchhiah thar niin, revenue lut zawng zawng chu Rs. nuai 197 chuang hret a ni a, parking fee atangin Rs. nuai 5 chuang hret hmuh a ni tawh bawk.
UD&PA : Swachh Bharat Mission (Urban) hnuaiah faina kawnga inzirtirna hrang hrang kalpui niin Swachh Survekshan 2021 hnuaiah Khawpui Fai inelnaah tel in ODF+ ni thei turin theihtawp chhuah zel a ni a, bawlhhlawh thenfai leh thianghlimna kawnga hma sawn deuh deuh turin a bei sauh sauh a ni.
National Urban Livelihoods Mission (NULM) hnuaiah mi tam takin hamthatna an dawng chho mek a, nikum September thla atanga tun thleng hian SHG 31 siam thar niin mi 45 te chu ni nga chhung cake ur zirtir an ni. Tin, kawngkama inpho thinte chhawmdawlna turah mi 52 te chinchang chhui chian hna thawh zawk a ni tawh bawk. New Champhai-ah Tar In sak hna thawh tan a ni a, Mazuia Memorial TNT, Grace Receivers’ Home leh Emmanuel After Care-a awmte tan a thlawnin an eitur leina tumsak an ni bawk. Mahnia eizawnna an dap ve ngei theih nan mi thahnem tak tan bank loan lak theih dan tur duansak a, bank thenkhat chuan an target neih ang an tifel tawh nghe nghe a, hma lak zel a ni.
PMAY (U) DPR-II chhunga mi 613 leh DPR-I a tel mi 1 te chu tanpuina hmasa pek an ni tawh, CLSS hnuaiah dilna 48 dawn niin bank hrang hrang hnenah thawnsak an ni.
6. Kawlphetha chungchangah Champhai District-in harsatna in tawh fote pawh sawrkar chuan a ngai pawimawh hle a, department hotute pawhin an vei hle a, tha zawka kawlphetha in neih theih tan theihtawp chhuah chhunzawm zel tur a ni.
7. Hripui leng avangin District inrelbawlnaa a hnarkaitu kan DC te, kan SP te, Doctor, nurse leh health workers te leh department officers te an hmanhlel hle thin a. DC kaihhruaina hnuaia District Level Task Force te, Village Council leh tlawmngai pawlte kaihhruaina hnuaia Village Level Task Force te thawhhona tha tak mai zarah leh an inpekna zarah vawiin thlengin hripui avanga harsatna lian tham tawk lovin Champhai district kan la awm thei a nih hi. Hri dona kawnga ke an pen zelnaah duhsakna ka hlan a, sawrkar office zawng zawng te, village council te, NGO leh pawl hrang hrangte hian kawng tinrenga Champhaiin hma a sawn theih nan ngaihtuahna i seng tlang zel ang u.
8. He hri leng karah hian damna leh hriselna tha nei turin duhsakna ka hlan theuh che u a. Pathian zara hma lam hun eng tak kan neih zel theih nan kan ram zalennain kum 75 a pumhlumna ni chhinchhiahtlak takah hian duhsakna ka hlan thar vek a che u.
Ka lawm e.
