Vawiin hi Independence Day vawi 68-na a ni a; Mizoram khawpui Aizawl-ah pawh tukin zing dar 9: 00 khan A.R. Ground-ah ropui taka lawm a ni. He hunah hian Chief Minister Pu Lal Thanhawla chu khuallian a ni.

Pu Lal Thanhawla chuan, “Kum sawmruk pariat kalta, he ni ropui taka kan hnam puanzar mawi tak zarpharh a nih khan, inawpbehna thlazar hnuai atangin kan hnam ropui tak chu lo piangin, inpekna leh thawhrimna hmangin hnam zalen ah a rawn ding chhuak ta a ni. Zalenna sual chhuah nana hnam pa ten tharum tel lova hma an lo lak dan kha a danglam hle. Tharum thawh leh thisen chhuahna tel miah lova inawpbehna rorelna hnuai atanga hnam-in zalenna a sual chhuah dan chanchin hi khawvel chanchin a thleng hmasa ber a ni hial mai thei. Hei hian kan hnam hi huatna nilovin muanna leh khawngaihna ah a innghat tlat a ni tih a tilang a ni. Ahimsa - hmanraw thiltithei tak chuan khawvel pumah pawnlam ram dang awpna atanga zalenna sual chhuak turin a chhawk tho nasa hle a ni” a ti.

Chief Minister chuan “Kan hnam ropui tak dintute hmathlir tihhlawhtling turin inhlan thar theuh ila, kan hnam a lo than chhoh zel a, hmasawnna leh hlawhtlinna kawng kan zawh tlan zel theih nan zalenna, intluktlanna leh inunauna tinghet zel turin i bei theuh ang u. Kan thlah lo kal zel tur te tan kan Danpuia innghat rochun tlak leh tha din turin i thawk theuh ang u.He hun hi remchanga la-in, Sorkar ah rinna an nghah tlat avang leh min tawiawmna zawng zawng te avangin tlawmngai pawl te, Kohhran te, thu thar puangzartute leh Zoram mipui zawng zawng te chungah lawmthu ka sawi duh a. Mizoram nuam zawk leh hmasawn zel, huapzo leh chhenfakawm siam turin an duhsakna leh thlawpna nghet tak kan neih zel ka beisei tlat a ni” a ti.

Pu Lal Thanhawla chuan “August ni 15 hi kan zavaia tan ni pawimawh tak a ni a. Ram zalenna kan din chhuahna ni, ram dang awpbehna atanga kan chhuahna hun ropui tak a ni. He ni hi kan za atan ni chhuanawm leh chhinchhiahtlak a ni a. Kan ram ropui tak innghahna thurin hre rengin, tawngka mai nilovin kan nitin nunah i nunchhuahpui zel ang u” a ti.

Independence Day vawi 68-na lawmnaah hian Chief Minister Pu Lal Thanhawla chuan heng a hnuaia Medal leh Award-te hi a sem a ni:

1) Governor’s Gold Medal for Distinguished Service: Kum 41 chhung Environment & Forests Department-ah hna a thawh that avangin he Medal hi Pu M. Sawmliana, Forest Ranger, Mamit Forest Division, Mizoram hnenah hlan a ni.

2) President’s Fire Service Medal for Gallantry – He Medal hi Fireman Lalnghahmawia, Fireman B. Vanlalruattluanga leh Fireman C. Lalawmpuia te hnenah nikum May ni 11-a Laipuitlang leiminah an nunna hial chan huam a chhiat tawkte chhanchhuahna kawnga an thawh that avangin hlan an ni.

3) State Award to Meritorious and Outstanding Teachers, 2014 chu Pu Lalnunpuia Hrahsel, Govt. Mizo High School, Aizawl, Pu K. Lalbiakkunga, Headmaster, Govt. Roseland Middle School, Champhai leh Pu Purna Prasad, Headmaster. Govt. Nepali Primary School, Thuampui, -te hnenah hlan a ni.

4) Basketball Tournament (Men) a Champion Providence Higher Secondary School leh Runners up St. Joseph Higher Secondary School; Basketball Tournament (Women) a Champion Govt. Mizo Higher Secondary School leh Runners up Helen Lowry Higher Secondary School; Volleyball Tournament (Men) a Champion Hunthar Volleyball Club leh Runners up C. Lalthuama Memorial Volleyball Club, Bungkawn; Volleyball Tournament (Women) a Champion Chawnpui Volleyball Club leh Runners up Mahruaitea Volleyball Club, Rawpuichhip; Badminton Tournament (Men Single) a Champion Zarzoliana, Health Badminton Club leh Runners up Lalduhawma, Lalat Badminton Club; Badminton Tournament (Women Single) a Champion F. Vanlalhriatpuii, Saron Badminton Club leh Runners up Lalrinzuali, Saron Badminton Club – te hnenah lawmman hlan a ni bawk.

Vawiina A.R. Ground-a Independence Day lawmna inkhawmah hian parade contingent 28 an tel a. Silai keng contingent 5 zinga lawmman dawngte chu – 1-na 1st Battalion MAP, 2-na 1st Battalion CRPF leh 3-na 5th IR Battalion te an ni a. Silai kenglo zingah 1-na Govt. Aizawl North College NCC Contingent , 2-na Govt. Republic Higher Secondary Rovers’ Crew, 3-na Govt. Hrangbana College NCC Contingent te an ni a. School contingent zingah 1-na Synod Higher Secondary School Contingent, 2-na St. Lawrence School Contingent, 3-na Monfort Higher Secondary School Contingent te an ni. Parade Commander-te chu Pu Zonunsanga, Dy. SP., Mizoram Police leh Pu C. Lalruatkima, Dy. S.P., Mizoram Police te an ni.

Police Medal for Meritorious Service dawng turin Inspector B. Lalnghakliana, ACB leh ASI (Operator) Lalrinawmna, MPRO te thlan an nih thu puan a ni bawk.

(INDEPENDENCE DAY-A CHIEF MINISTER PU LAL THANHAWLA THUSAWI PUMPUI CHU A HRANPAIN DIPR WEBSITE-A SPEECH AH DAH A NI E)