Vawiin zing dar 10 khan Tumpui Field, Kolasib-ah Independence Day-2014 chu ropui taka hman a ni a. Sports Minister Pu Zodintluanga chuan hnam puanzar pawt pharhin, parade cantingent 15-in hnam puanzar chibai an buk chu a chhang a. Sports Minister hian, “Kolasib Venglai Field-a Sports Complex siamna tur cheng nuai 2347.88 chu Central sawrkarin min pawmpui tawh a, sanction hmuh ve leh hna tan a ni ang” tih a puang.

Pu Zodintluanga chuan, “Kan sawi fo tawh thin angin mi rethei te dinkhawchhuah nana programme NLUP ruahman bakah hian Mizoram Sorkar chuan thalaite khawvel thar din hi a ngai pawimawh hle mai a. Chumi bawhzui chuan sorkar pawh a tang hle mai a. Sports infrastructure kan neihte hian nghawng tha tak a nei a, kan thalai rualten Santosh Trophy bakah North East huapa tournament buatsaih Dr T Ao Memorial Football-ah te result duhawm tak tak kan nei a, a lawmawm hle a ni” a ti a. “Thalaiten infiamna khawvelah bung thar kan kaina turin Vision 2016 chu Sorkarin a kalpui mek a. hemiin a tum ber chu Mizo thalai tu pawh Olympic 2016-ah hian india aiawha tel ve theih ngei kan tum a ni. Chumi denchhena lawmawm deuh mai chu tunah hian TBC Lalchhanhima, Ruantlang, Champhai chu 2016 Summer Youth Olympics-ah India aiawhin China-ah weighlifting-ah a tel ve a, Mizoram tan pawh chanchin lawmawm tak a tling a ni” a ti bawk.

Kolasib District chhunga kum khat kal ta chhunga sawrkar hmalakna hrang hrangte Minister chuan tarlangin, UD&PA hnuaiah Kolasib khawpui chhung kawng Km 34 chei a ni tawh a; miretheite chenna tur, chhungkaw 300 tan in sak zawh a ni a. Health Department hnuaiah mipuite hriselna tura theih tawp chhuah chhoh mek zel a ni a. Hospital leh a thawktute pawh thuam changtlun chhoh reng a ni. Eye Ward pawh Kolasib-ah cheng nuai 75 senga bun fel a ni tawh. Govt. Kolasib College building leh Hostel-te sak mek a ni a. Hmeichhe Hostel tur bik pawh College Veng-ah nuai 354 senga sak mek a ni.

Ram thanna atana kan hmaih theih hauh loh chu zirna hi a ni a. SSA Mission hnuaiah zirlai 11468 hnenah a thlawnin zirlaibu leh uniform pek an ni a. Hmeichhia tan bik mi 50 awm theihna hostel enkawl mek a ni. RMSA Kolasib chuan school building thar 8 (eight) Rs. 48 lakh theuh senna tur a sa mek a, reiloteah zawh theih beisei a ni a ti.