India Independence Day vawi 63-na chu state dangte rualin Mizoram ah pawh tluang taka hman a ni a. Tarlan tawh angin District leh Sub-Division Headquarters hrang hrangah sawrkar mipawimawh ten Hnam Puanzar pawt pharhin he ni hi an hmanpui a ni.

Saitual Sub-Divisional Hqrs. a lawmna buatsaih chu Parliamentary Secretary Pu K.S.Thanga chuan Khuallian niin Saitual Public Playground-ah Hnam Puanzar a pawtpharh a, thuchah a sawi a ni. Pu K.S.Thanga chuan inthlan hma a thutiam an neih manifesto te chu tunah policy ah an chang tawh tiin mipuite hnena tihhlawhtlin tura an sawi te tihlawhtling mekin la tihpuitlin loh te pawh chak taka bawhzui an nih dan a sawi a. India ram pumin khawkheng a tuar mek chu Mizoram leilet neitu 59% te pawh a nghawng pha tiin hemi atan hian Chief Minister leh Agriculture Minister in sawrkar laipui an dawr tawh dan te a tarlang a, leilet siamtute chu lo chiai lo turin a chah a ni. Swine Flu chungchang a sawina ah Mizoram sawrkar inbuatsaih dan leh he natna darhzau tur ven kawnga a hmalakna te a sawi a, mipui te chu thlaphang lo turin a hrilh a ni. Pu K.S.Thanga hian Saitual bial mipuite chu hun hmasa lam atangin Bialtu MLA viak tha leh remhre tak an neih avangin a lawmpui thu a sawi bawk a, he bial chhunga inkalpawhna kawng zawhfel leh hmabak te, kawlphetha lama an bial hmasawnna tur ruahmanna hrang hrangte, tui intur leh zirna kawnga an hmachhawp neihte a hrilhfiah a. NREGS pawh Saitual bial ah hian chhunzawm zel a nih tur thu a sawi bawk.

Parliamentary Secretary hian Saitual a Salvation Army enkawl nau hnuchham in - Hlimna In chu a tlawh bawk a, Independence Day thilpek atan cheng 3000/- a hlan. He nau hnuchham inah hian naupang 70 zet enkawl mek an ni.