Vawiin hi Independence Day vawi 70-na a ni a; Mizorama Independence Day lawmna pui Aizawl AR Lammuala neihah Chief Minister Pu Lal Thanhawla chu khuallian niin Hnam Puanzar a phawtpharh a, Parade Contingent-te chibai a chhangletin he Ni puala a thuchah a sawi a ni.

Pu Lal Thanhawla chuan “Kan ram tana ni ropui tak, Kumpinu awpbehna atanga chhuahna ni, Independence Day vawi 70-na a lo thlen hian Mizoram mipuite leh he ram ropui taka khua leh tui zawng zawngte duhsakna chibai ka buk a che u. Kum 69 kalta vawiin ni angah khan hnehchhiahna thim chhah tak ata enna hmu in, awpbehna nghawngkawl tihtliah a lo ni ta a. Midangte rinchhan hauhlova mahni ke ngeia dingchhuakin, zalenna kawng zawh tura mi dangte cho chhuaktu kan lo ni hial ta zawk a ni.  Ram zalenna tura inpe pumhlum mahni tana huamhauhna thinglung pu lo - Mahatma Gandhi, Pt. Jawaharlal Nehru, Sardar Vallabhai Patel, Maulana Abul Kalam Azad leh hruaitu dangte leh zalenna sipai tam tak te tawrhna atanga zalenna hi kan nei a ni.” a ti a. Mizoramin kum 30 chhung Remna leh Muanna a neih chu humhim zel a, man to taka zalenna hi kan lei ani tih hriaa hei humhim zela, hmasawnna lamtluang  beiseina nung neia rinawmna, dikna, taimakna leh Pathian tihna nung nen hmalam pan turin mipuite a chah a ni.                                                                   

Sawrkar Flagship Programme - NLUP chungchang sawiin Chief Minister chuan mipuiten eizawnna ngelnghet an neih theih nan a tanpuina leh chawmdawlna programme hi kan Sawrkar chhung chuan kan chhunzawm zel dawn a ni, a ti.   UN Joint Initiative Project hnuaia UN Agency pali te chuan nasa takin an inbuatsaih chho mek thu leh NLUP chungchangah hianUniversityofMinnesotate nen pawh thawho mek anih thu te a tarlang bawk.

Chief Minister chuan New Economic Development Policy (NEDP) chungchang chu heti hian a sawi. “Kan sawrkarin tun kum nga kalta chhung khan, NLUP hnuaiah ei leh bara intodelh theih nan chhungkaw 1,30,000 (Nuai khat leh sing thum) lai hnenah tanpuina a pe tawh a. Chutichungin chhungkaw tamtak eizawnna kawnga rahbi tleu laklawh, retheih leh bawrhsawmna avanga mahni puala ding chhuak theilo tur chhungkaw engemaw zat an la awm tih kan sawrkarin a hria a. Chuvangin, kan sawrkar chhung chuan NLUP hi kan chhunzawm zel dawn a ni.

Kan pi leh pute atanga tihdan leh kalphung pangngai renga, thar chhuah pung chuang lo, tlemte thar a khawsak tawk tawkna 'subsistence economy' hi, thiamna thar leh tihdan thara kal a, kan thalai thiambikna neite leh kan mi neinung leh hausate hmanga hlawhtlinna leh hausakna kawng zawh kan turn ta a. Chuvangin, hemi atan hian New Economic Development Policy hman kan tum a ni. Retheihna, khawsak tawk tawkna 'subsistence economy' sal tanna atangin khawsakna zangkhai zawk leh zalenna (economic exodus from subsistence economy) kawng zawhkantum a ni.

Tunah chuan Mizo thalai lehkhathiam - engineer, doctor, MBA etc. te chuan sawrkar-a luh tum kher lo in, mahni kea ding a, an thiamna chu mipui rawngbawl nan company, society, hospital etc. te an din ta hlawm a. Hetiang kawng thar zawh tur hian sawrkar chuan an mamawh intawm (infrastructure) hi a siamsak dawn a. An tana awlsamna tam tak, an mamawh intawm - link road te, electric leh tui supply te, an thar chhuah sawngbawlna (Value Addition Processing) te, thar chhuah chhekkhawlna hmun leh an thar chhuah thehthangna (storage & marketing) kawngah remruatnasiama tum a ni. Heng ruahmanna tam tak pawh hi sawrkarin enkawl vek kher a tum lova, mipui hi a ring ngam a. Inbiakremna mumal neia an thawh theihna kawng, outsourcing te hi sawrkarin a tum ber pakhat chu a ni. Hetiang ruahmanna hiankanthalai rualte tan eizawnna ngelnghet tam tak a chhawp chhuak ang a, mi tam takin nitin eizawnna tur inhlawhna ngelnghet an neih phah dawn a ni. 

Tin, department ten tum bik leh luhchilh bik an neih dawn avangin, an buaipui chu duh ang khawp 'level' a tlin hma chuan kawng thar leh thil dang dang dap lawr duat lo a, rilru nghet chet chawta beih an tum dawn a. Health Department tan pawh Falkawn Hospital hi khum 250 tal kumin chhunga dah tumin, he Hospital behchhana Medical College dinna tura hmalakna hi luhchilh bik a tum a ni. Chutiang zel chuan Agriculture leh Horticulture Department pawhin annual crop eng emaw ber, thar chhuah tam an tum ang a. Vety Department pawhin ranvulh kawngah luhchilh bik neih an tum dawn a ni. Hetiang hian department tam takinkanram tana tha ber tur lehkanhlawhtlin theihna tur kawng hi sawrkar remruatna hnuaiah an thawk vek dawn a ni.

NEDP ken tel pawimawh em em chukantih dan thin lehkanngaihtuahna hlui hnuchhawn a, thil tih danglam tarn tak 'CHANGE'kanneih tur hi a ni.Kanthlen chin atanga hmalam pan zel turkanni si a. Chuvangin,kansystem change (kalphung thlak) te chu, - Mipuiin a neitu nihna an hriat avanga sawrkar nena hmalakna zawng zawnga 'mipui nena thawhho' hi a ni. Tin,kanMizo thalai leh mihausa te pawhin kutnathawh eizawnna hi hna zahawm leh pawimawh a nih avanga an luhchilh theih nan sawrkarin remruatna a buatsaih thar hi a ni bawk. NEDP hnuaia kan hmalakna hi 'tanpuina' ni mai lova, 'tangpuihna' a ni a, tang te chu an dinchhuah ngei theih nana sawrkarin a puih zel hi a ni, kuminah NEDP bul tan nan Rs. 250 crore (cheng vaibelchhe zahnih sawmnga) ruahman a nghal a ni” a ti. 

Independence Day vawi 70-na lawmnaah hian Chief Minister Pu Lal Thanhawla chuan heng a hnuaia Medal leh Award-te hi a sem a ni:

1) Huaisen Lawmman: Jeevan Raksha Padak Award 2015 chu Pi R. Zoengmawii, w/o Pu Robert Zote, Zotlang Veng hnenah 9.10.2014-a Elizabeth Lalramnghaki electric hruipui in a man, nunna a chhan avangin hlan a ni.

3) State Award for Teachers 2015 chu – Pu Lalthantluanga Tochhawng, Lecturer, Govt. GM Higher Secondary School; Pu Lalchhanhima Chhangte, Headmaster, Govt.  SelingMiddle Schoolleh Pi C. Ramngaihsangi, Headmistress, Govt. Electric Primary School-II, Aizawl-te hnenah hlan a ni.

President’s Police Medal for Distinguished Service dawng turin Pu LT hrangchal, IPS DIG Northern Range thlan a nih thu te; President’s Medal for Meritorious Service dawng turin – Pu C. Lalzahngao, SP Kolasib; Pu C. Lalnunmawia, SP Mamit; Pu Zosangliana SP Lunglei; Pu Zoramsanga Ralte Asst. Commandant, 1^stBattalion MAP leh Pu C. Lalremliana, Inspector, Police Headquarters te chu thlan an nih thu leh  Union Home Minister’s Medal for Excellence in Police Training dawng turin Inspector Zochama te chu thlan an nih thu puan a ni.

Vawiina A.R. Ground-a Independence Day lawmna inkhawmah hian parade contingent 30 an tel a. Silai keng contingent 6 zinga lawmman dawngte chu – 1-na Ist Meghalaya Police Battalion; 2-na Police Training School No.2 Platoon leh 3-na Ist Battalion MAP te an ni a. Silai kenglo contingent 8 zingah 1-na chu 20^th Mizo Independent Company NCC; 2-na , 1 Mizo Air Squadron NCC; 3-na Govt. Aizawl College NCC te an ni a. School contingent 13  zingah 1-na, St. Joseph’s Higher Secondary School; 2-na Govt. Hrangchhuana High School , 3-na Divine Intervention School te an ni a. Parade Commander-te chu Pu Zonun Thara, Deputy SP leh Pu Timothy R. Lalhmangaiha, Deputy SP te an ni. Band party 3 an tel bawk a ni.EstherLalvenpuiiGovt.HrangchhuanaHigh School zirlai naupang Parade practice avanga vanduaina tawka boral chu pawi a tih thu leh a chhungte a tawrhpui takzet thu a thusawiah Chief Minister hian a tarlang bawk a ni.

(INDEPENDENCEDAY-A CHIEF MINISTER PU LAL THANHAWLA THUSAWI PUMPUICHUA HRANPAIN DIPR WEBSITE-A SPEECH AH DAH A NI E)