Thian duhtak te u,

India Independence Day vawi 77 naah hian Mizoram mipuite leh khawvel hmun hrang hranga India khua leh tui te duhsakna chibai ka buk a. Vawiin ni a lo thlen hian mahni inphata ram tana zalenna sualtu, kan hruaitu ropui tak takte, kum 200 chuang zet awpbeha kan awm tawhna ata mahnia ro inrel ram ni thei tura beitu zawng zawngte chungah lawmthu sawiin, zahna chibai i buk thar leh ang u. He ni ropui takah hian Mizo fa, India ramin zalenna a hmuh theih nana beitu zawng zawngte pawh zahna chibai ka buk a ni.

India ram hmun dangte rualin Mizoram pawhin kawng tinrengin hmasawnna hmel a hmu chho zel a. Kum li leh a chanve kalta chhung khan kan hriat theuh angin harsatna chi hrang hrangin min chimbuai a, amaherawhchu ram mipuite tanpuina leh thawhhona tha avangin harsatna tam takah hnehtu kan ni thei ta hial mai. Covid hripui vang khan kawng tinrengah harsatna tawk mah ila ram mipuite hamthatna tur hmasawnna hmel duhawm tak tak nei turin sawrkar chuan theihtawp chhuah a thulh ngai lo a ni.

Kan hriat theuh angin kan ram chuan G-20 Presidency mawhphurhna zahawm tak kan chelh mek a, hlawhtling taka he mawhphurhna hi a hlen theih nan khawpui hrang hrangah Meeting leh Event engemawzat a buatsaih a. Mizoram pawhin G-20, B-20 Conference chu March ni 2, 2023 khan kan thleng a nih kha. Kha meeting thupui kha ‘India ramin hmarchhak biala hma a lakna- Urban Planning, Infrastructure, Bamboo, Startups, Skill Development, Nursing leh Paramedics lama multilateral business remchanna inkhawmpui’ tih a ni. Ram 17 atangin palai an lo kalkhawm a, kha inkhawmpui khan Mizoram hmasawn zel theih nan rahchhuah duhawm tak a thlen ngei pawh kan beisei a ni.

Hetih mek lai hian May ni 4, 2023 atanga Manipura chi leh chi inkara buaina lo irhchhuak khan keini pawh min nghawng telin kan ram chuan harsatna a tawk zui nasa hle mai. A hnu zelah pawh vanduaina leh buaina duhawm loh tak tak engemawzat thleng zui zelin, Mizo mipuite rilru pawh a ti na hle a ni. He harsatna rapthlak tak kan thenawm state maia thleng mek hi Mizoram sawrkar chuan chik taka thlirin kan mite, a bikin Imphal khawpuia awm zirlaite himna turin nasa takin hma a la a. Manipur atanga himna zawnga rawn raltlante tan relief and rehabilitation lamah theihtawpin hma a la bawk.

Manipura buaina a chhuah tan tirh lai khan Imphal khawpuia Mizo awm mek mi 264 te thlawhtheihna hmanga thiar chhuah nan sawrkar chuan Cheng nuai 36 chuang a seng a. sawrkarin a chhinchhiah chinah (July ni 18, 2023 thleng khan) mi 12,509 ten sahimna zawngin Mizoram an rawn lut tawh bawk. Relief Camp hi Aizawl ah leh district thenkhatah din a ni a, an tan buhfai quintal 2388.50 chuang pek chhuah tawh a ni. Kohhran, tlawmngai pawl, thianho leh mimal tam takin heng kan unaute tan hian sum leh thilpek dangte hmangin an pui bawk a, a ropuiin a lawmawm tak zet a ni. Mizoram sawrkar chuan heng kan unaute lo tuamhlawm nan hian Cheng vaibelchhe nga a sanction tawh a, Central sawrkarah pawh kan unau Manipur atanga rawn raltlan te mamawh zualpui chhawmdawlna atan hian tanpuina Cheng vaibelchhe 10 kan dil mek a ni.

1. Mizoram hi state ralmuang tak kan nih zel theih chhan pakhat chu Mizoram Police te’n tha thlah miah lova hna an thawh vang a ni, a tih loh theih lova. International border ah BSF leh Assam Rifles te nen tangkawpin venhim hna ngawrh takin an thawk thin bawk.

Mizoram Police chuan July ni 14, 2023 thleng khan ruihhlo tam tham tak, international market a Cheng vaibelchhe 2077.68 bawr vel chu man in, criminal case thubuai 1,900 ziahluh a nih bakah, a inhnamhnawih mi 610 an man an bawk. Kum 2020 a Cyber Crime Police Station din a nih atang khan tun thlenga sum ruk hmuh let zat chu Rs. 36,75,268 a ni a. Cyber crime a inhnamhnawih a puh mi 64 zinga 18 chu thiamloh chantir an ni tawh. Mizoram Police hian kumin Remna Ni champha vawi 37-na pualin thisen unit 407 an pe bawk.

Kan police te thuamthat nan a remchan dan ang zela hmalak a ni thin a. Sawrkar laipui atangin Special Assistance to States for Capital Expenditure (SASCE) Scheme kaltlangin PHQ Complex, Khatla, Aizawl a DIG (Northern Range) Office sakna tur Cheng vaibelchhe 3.20 hmuh a nih bakah 3rd IR. Bn. Headquarters, Thingkah, Lawngtlai District a tui supply na tur Cheng vaibelchhe 96.910 dawn a ni a. State sawrkar pawhin SEDP atangin Vairengte a Battalion Company Headquarters sakna tur Cheng nuai 223.71 a pek bakah Saitual Police Station a SDPO Office sakna tur Cheng nuai 6 a pe bawk.

2. Lunglei Fire Station hnenah Ministry of Home Affairs in huaisen lawmman a pek thin pakhat ‘Subash Chandra Bose Aapda Prabandhan Puruskar, 2023’ chawimawina chu hlan a ni a, ka lawmpui hle a ni. April ni 24-26, 2021 inkara Lunglei khawchhunga kangmei nasa tak chhuak chu Lunglei Fire Station a thawk te’n huaisen taka an thelh avanga he chawimawina hi hlan an ni a. Prime Minister zahawm tak Pu Narendra Modi hnen atangin kumin March ni 10 khan Mizoram Fire & Emergency Services official te chuan an zuk dawng a ni. Lawmman hian certificate leh pawisafai Cheng nuai 51 a keng tel a ni.

3. Finance Department hmalakna in Mizoram Integrated Financial Management System (IFMIS) project chu kumin April thla atang khan treasury 12 ah hman tan a ni a. Fiscal Management Unit Cell kaltlangin he project hian manual a budgeting, accounting, procurement leh pay roll siam hna thawh ngai thin kha thlakin, awlsam takin computer hmanga thawh a ni tawh dawn a ni. Hei hian financial management (sum enkawl dan) kalphung langtlang, rintlak leh chak zawk a thlen dawn a ni.

Tun dinhmunah state chhunga DDO 705 zinga DDO 658 chuan IFMIS kaltlang hian thla tin hlawh an la tawh a. Module 12 kalpui tura ruahman zingaah module 10 chu kalpui tawh niin, module hmabak la awm - Debt Management Module leh Pension Management Module te pawh zawhfel thuai beisei a ni.

4. Hmarchhak state dangte nen khaikhin in Mizoram chuan Planning & Programme Implementation department hmalakna zarah NEC project a thawk tha hle a. NEC chuan Mizoram tan sawrkar kum 2022-23 chhungin project thar 11 tan Cheng vaibelchhe 62.81 hman phalna a rawn pe a. North-East Special Infrastructure Development Scheme (NESIDS) hnuaiah State chuan Cheng vaibelchhe 366.14 man project kalpui lai mek sawmpasarih(17) a neih bakah, North East Road Sector Development Scheme (NERSDS) hnuaiah Cheng vaibelchhe 189.92 man hu project pali (4) kalpui mek a ni.

Hmasawnna chak leh rualkhai zawk thlen nan Union Budget 2022-23 khan hmalakna thar - PM-DevINE a tlangzarh a. He scheme hnuaiah hian Mizoram tan hmalakna lian tham tak - ‘The Aizawl By-pass on the Western Side’ (Cheng vaibelchhe 500 man) leh ‘Pilot Project for Construction of Bamboo link Road at different locations in various districts in the State of Mizoram’ (Cheng vaibelchhe 100) chu sanction a ni. 

5. Hmasawnna atana pawimawh tak pakhat chu mipui mamawh tawk kawlphetha neih a ni a. February ni 16, 2023 khan 20MW Grid Connected Solar Park chu Vankal ah hman theih a hawn a ni a. Hemi hmalakna in a ken tel hrang hrang – a panna kawng siam te, 132kV Sub-Station bun te, tui supply leh mamawh dangte chu state sum atangin Cheng nuai 2107.15 hmanga thawh a ni. He Solar Park in kawlphetha a siamchhuah hi state sawrkar chuan man tlawm zawk a lei let in, kan mamawh bak a la bang (surplus energy) chu state pawnah hralhchhuah a ni thung. NERPSIP Scheme hnuaiah PGCIL chuan 132kV Lungsen to Chawngte Line, 30.966 km a thui chu thlun a ni a, Power & Electricity Department hnenah June ni 14, 2023 khan a hlanchhawng a ni.

Kawlphetha hnianghnar zawk a awm theih nan Marpara-ah 33/11kV Sub-Station siam mek a ni a, Lawngtlaiah 132/33kV Sub- Station leh Chiteah 33/11kV siam hna thawh mek niin, Luangmual 132/33kV Sub-Station leh Sihhmui 132/33kV Sub-Station augmentation hna thawh a ni a. District hrang hranga thlai chinna hmun 16 ah power supply na tur hna chu NABARD RIDF-XXVII atanga sum hmuh Cheng vaibelchhe 11.64 hmangin thawh mek a ni a, hna 95% chu zawh a ni tawh. Heng bakah hian kum hnih chhunga thlai chinna hmun 51 ah power supply a awm theihna tur Cheng vaibelchhe 26 man project dawn a ni bawk. Thenzawl ah Cheng vaibelchhe 74.82 man project - 10MW Grid Connected Solar Power Plant chu kum nga chhungin thawh zawh tum a ni a. Zawh a nih hun chuan he power plant atanga kawlphetha siamchhuah chu state hman tur liau liau a ni ang. Ministry of Power in a rawn ruahman Revamped Distribution Sector Scheme hnuaiah Pre-paid Smart Metering kalpui turin ruahmanna siam a nih bakah Aizawl khawpui chhunga power hloh titlem turin hma lak thuai a ni bawk ang.

6. Public Health Engineering Department in a chhinchhiah dan in, July ni 17, 2023 thleng khan khawpui (urban areas) ah chenna in 1,22,147 tan tui connection pe in, thingtlang (rural areas) ah chuan chenna in 1,19,309 hnenah tui connection a pe bawk. Jal Jeevan Mission hnuaiah Functional Household Tap Connections (FHTC) 1,19,309 pek a ni bawk a. July ni 12, 2023 thleng khan khaw 293 chu FHTC hian a tuam tawh a, March 2024 chuan khua zawng zawng tuamchhuah vek hman beisei a ni.

NESIDS hnuaiah Alternate Gravity Water Supply Scheme of Aizawl, Augmentation of N. Vanlaiphai WSS leh Greater Mamit WSS Phase-II chu kalpui mek a ni a. Heng pathum hmalakna bakah hian SASCI kaltlangin hna dang paruk (6) thawh a ni bawk. Kum 2022-2023 chhung khan PHE Department chuan sum Cheng nuai 6742.651 a la lut a ni.

7. Public Works Department hnuaia hnathawh zingah km 307.869 a thui Formation Cutting te, km 319.534 a thui Black top (Flexible Pavement) te, Concrete Pavement 294.563 phah, Culverts (CD Works) 11,677 siam, Protection Work 18,524.72 rm, lei (bridge) 5 dawh, Non-residential Building 16 leh Residential Building 6 sak te a tel a. Lengpui Airport Terminal Building chei that hna chu 92.5% zawh tawh niin Elevated road siam pawh 85% zawh a ni tawh.

8. Mipui hriselna leh inenkawlna in hma a sawn belh zel nan kawng hrang hrangah hma lak a ni thin a. National Health Mission hmalakna te pawh tluang taka kalpui thin a ni. ‘Remna Ni, 2023’ pualin Free Health Camp leh Blood Donation Camp te buatsaih a ni a. Siaha district ah General Nursing & Midwifery (GNM) School leh Hostel sak zawh niin, Champhai ah GNM Hostel sak mek a ni bawk. SEDP atangin Primary Health Facility thuamchakna tur Cheng nuai 537.75 chu pek ni bawkin hna a kal mek a ni.

Lunglei, Lawngtlai, Siaha, Kolasib leh Serchhip ah te Trauma Care Facility (Trauma Centre) sak zawh a ni tawh a. Aspirational district Mamit ah khum za awmna ‘In–patient department (IPD)’ block chu Cheng nuai 1793 senga sak mek niin zawh thuai beisei a ni.

Zoram Medical College (ZMC) a MBBS batch hmasa berte pawh an pass chhuak ta a. Exam hmachhawn mi 97 zinga 95 chuan hlawhtlinna changin internship an ti mek a ni. Teaching leh Non- Teaching staff rawih thar ni bawkin, New Academic Block pawh sak zawh a ni tawh a; OPD Block thar pawh sak zawh thuai beisei a ni. SEDP atangin Vertical Extension of Hospital Building, Diagnostic Block, Old OPD Block leh Vertical extension of Boys and Girls Hostel thawh mek a bawk.

9. Department of Food, Civil Supplies & Consumer Affairs chuan ‘hlawkna neilo, hloh neilo’ (No profit, No loss) thupui hmangin Public Distribution System enkawl hna a thawk a. January 2023 thleng khan Targeted Public Distribution System hnuaiah chhungkaw 2,85,016 awm tawhin, thla tin buhfai 77,000 qtls. an dawng thin a ni. Fur chhunga buhfai indaihlohna a awm loh nan department chuan kudam 79 ah buhfai thahnem tak a dah hlawm a. Tun dinhmunah department hnuaiah hian kudam hman lai 119 leh Fair Price Shops 1258 a awm bakah, Ration Card pekchhuah zat hi 2,85,016 a ni bawk a. Beneficiary zawng zawng zat hi 11,64,005 niin LPG Distributor mi 60 (force/police telin) an awm bakah state pumah Filling Stations 68 a awm bawk.

Fair Price Shop retailer te hlawkna turin department chuan kawng hrang hrangin hma a la a. 5 kg LPG cylinder an hralhchhuah theih na tur ruahmanna a siam bakah Bank awm lohna khua ah FPS thlan bikte chu Business Correspondence ah siam theih an ni bawk. He hmalakna hnuaiah hian district tinah model FPS tur 75 thlangchhuak in, March ni 1, 2023 khan Hualngohmun VC House ah tlangzarh a ni.

10. Rural Development Block thar pahnih - Kawrtethawveng R.D Block leh Tlabung R.D block-te chu January ni 20, 2023 ah leh April ni 5, 2023 te khan hawn an ni a. District thar pathumah District Rural Development Office hawn a ni bawk.

Mahatma Gandhi NREGA hnuaiah chhungkaw 2,15,649 hnenah Job Card pek niin, chawhrualin kumin chhung hian ni 27.97 chhung inhlawhna siam a ni tawh. Pradhan Mantri Awaas Yojana Gramin (PMAY-G) hnuaiah chenna in thar 6,969 sak zawh niin, in sak mek 13,543 a awm bawk. Ministry of Rural Development chuan Awaas+ (2022-23) hnuaiah in sak tanpuina dawng tur mi 9,462 a thlang a.Aibawk, Thingsulthliah, East Lungdar leh Khawzawl cluster tan Ministry chuan Shyama Prasad Mukherji Rurban Mission (SPMRM) kaltlangin Critical Gap Funding (CGF) sum cheng vaibelchhe 15 a rawn approve a. SPMRM hnuaiah vek hian India ram chhunga cluster 300 inel naah Aibawk Cluster, Aizawl district chuan lawmman pakhatna a la a, ka lawmpui hle a ni.

Kum 2022-23 chhung khan MzSRLM hmalakna in R.D block 26 hnuaia chhungkaw 10,543 te chu Self Help Group 1,417 ah an intelkhawm a. SHGs leh Village Organisation te hnenah hian Community Fund atan cheng nuai 2,751.77 pek a ni bawk. Farm Livelihoods Intervention hnuaiah hmeichhiate dawmkan a, an sum lakluh a lo tam zawk nan khaw 61 atangin Mahila Kisan thar atan hmeichhia 10,318 zet chhinchhiah an ni. Non-farm sector ah thung chuan enterprise 264 din thar niin, Start Up Village Entrepreneurship Programme (SVEP) kaltlanga puihna pek an ni a. SHG 1053 tan Bank Loan cheng nuai 2808.35 pek a ni bawk.

Mizorama WDC-PMKSY 2.0 project kalpui mek chuan ram 49,600 hectare a zau huamin, project man hi cheng nuai 13,888 a ni a. He project hi kum nga (5) chhung kalpui tur niin, khua 52 in hamthatna an hmuh phah dawn a ni. He project hnuaiah hian contour trenching, bunding, check dam siam leh ruahmanna dang hrang hrang hmangin tui dawh khawlna 141 siam a nih tawh bakah Amrit Sarovar (dil) 70 leh hetiang ang thildang 83 siam a ni. Ramngaw chereu tawh din thar nan leh horticulture plantation atan thing tiak 4,88,595 phun a ni a; hei hian farmer 3,260 tan hamthatna a thlen dawn a ni.

Sawrkar laipuia Ministry of Home Affairs chuan cheng vaibelchhe 13.956 chu BADP hmalakna atan approval a rawn a pe tawh bawk.

11. Sawrkar laipui atanga Excluded Area Grant cheng nuai 1624 dawn hmangin Village Council te’n an huamchhung cheibawl hna an thawk a. State Finance Commission ruahman angin Local Administration Department chuan grant Cheng nuai 61.04 a dawng bawk a, hengte hi Village Council huamchhunga mamawh leh tul dangte thawh nan hman a ni.

12. Agriculture Department chuan Pradhan Mantri Kisan Samman Nidhi (PM-KISAN) Scheme hnuaiah loneitu 2,02,677 te ziaklutin an zinga 41,465 chuan March, 2023 thleng khan installment vawi 13 an dawng tawh a ni. Rastriya Krishi Vikash Yojana (RKVY) hnuaiah kum 2022-2023 chhung khan District 11 ah Community Water Storage 12 siam a ni a, Serchhip ah Oil Processing Plant leh Maize Milling Plant siam a ni bawk.Alu chi siam chhuahte vawnthatna tur Tonne 5 dawng Solar Cold Storage System 6 leh Tissue Culture Laboratory Building chu Thingdawl Farm-ah bun mek a ni.

Loneitute mamawh huna hman mai theih tur bio-agent te chhawpchhuak turin leh Entrepreneurship kaltlanga Bio-agent hnianghnar zawk siamchhuah a nih theih nan Biological Control Laboratory din tura hma lak a ni a. Hemi atana sum ruahman Cheng nuai 273 atangin Cheng nuai 230.88 (85%) hman tawh niin, Laboratory pawh hawn thuai beisei a ni. RIDF-XXVI hnuaiah School of Agricultural Sciences, Hnahthial thuamthatna tur sum cheng nuai 700 hmuh a ni a, building thar sak pawh July ni 17, 2023 khan hawn a ni.

Family Oriented SEDP kaltlangin District 11 ah hamthatna dawngtu mi 9,161 te hnenah tanpuina 2nd Installment Rs 25,000/- pek chhuah a ni a. Loneitute hnenah an vaimim thar chhuahte ran chaw atana herna tur khawl 31 pek chhuah a ni bawk.

13. Mission for Integrated Development of Horticulture kalpuina turin Sawrkar laipui chuan sawrkar kum 2023-2024 atan cheng nuai 4,444.44 a dah a, kumin thlai phun hun lai khan Loneitu 600 chuang chu Thingfanghma chintir niin, mi 200 chu Dragon fruit chintir an ni a, Mandarin Orange ching 200 an awm bawk. Loneitute hi Department hnuaia Horticulture Centre leh Centre of Excellence atanga thlai tiak hrisel leh mamawh dangte pek an ni. Thei leh thlai tiak chin tur tha zawk a awm tak avangin Department chuan loneitu tam zawkte hnenah thlai chi tha zawk pek chhuah zel a tum a ni. IFAD-FOCUS nena thawkdunin Chawngtlai leh Khawhai khuaa sapthei chingtu chhungkaw 221 hnenah sapthei zamna tur GI wire quintal 663 sem chhuah a ni a. District zawng zawngah nizung chakna hmanga thei leh thlai vawnthatna khawl hlawhtling taka bunfel a ni a. Thei um hminna khawlAizawl (Sesawng, Thingsul, Tlungvel), Serchhip (Khumtung, Baktawng) leh Lunglei (Mausen) District ahte bun a ni.

Loneitute thei leh thlai thar chhuahte phochhuahna tur leh man man zawka hralhchhuah theihna turin May ni 30 atanga June ni 2, 2023 chhung khan Aijal Club-ah ‘Horticulture Fair - 2023’buatsaih a ni a. Loneitute pual Stall (dawrte) 177 siam niin, Loneitu, Self Help Group, Private Entrepreneur leh Firm thahnem tak an tel a. District tin atangin Loneitu hma la tha ‘Best Promising Farmer’thlan an ni bawk.

14. Family Orientated SEDP hnuaiah Animal Husbandry & Veterinary Department chuan beneficiary 25,399 thlang chhuakin, a vaia beneficiary te hnenah tanpuina pekchhuah hi cheng vaibelchhe 126.995 a ni. Beneficiary te hian vawk, ar, kel, sial leh bawng vulh an thlang tlangpui a, an khawsak pawh a ziaawm phah hle a hriat a ni.

Kan state chhungah hian tum hnih ngawt mai vawk hri -African Swine Fever (ASF) a leng tawh a. Vanduaithlak takin tunah hian a vawi thumna thleng leh thei dinhmunah kan ding mek a. AH & Veterinary Department chuan he hrileng hmachhawn tur hian theihtawp a chhuah a ni. Kum 2021 khan ASF hrileng avanga vawk vulh lai 12,568 chu suat a ngaih tak avangin sawrkar laipui atangin zangnadawmna cheng nuai 1,169.94 hmuh a ni a, chhungkaw 2,488 hnenah sem a ni a. Kum 2022 a ASF hrileng thawh hnihna avanga vawk 11,686 suat tak atan zangnadawmna cheng nuai 526.633 chu sawrkar laipuiah dilna thehluh a ni.

National Animal Disease Control Programme (NADCP) hnuaiah February ni 1, 2023 khan Mobile Veterinary Unit (MVU) tlangzarh a ni a. Ran vulhtute’n mamawhna an neih chuan phone kaltlangin man chawi ngai lo (toll free) Call Centre number ‘1962’ ah bia in, an kawtkaiah MVU chu a thleng thei tawh a ni. He hmalakna hi state chhung R.D. Block 26 ah kalpui mek a ni.

15. State in infiamna (Sports) lam a hma kan sawn zel nan leh thalaite tan eizawnna hnar dang siam belh nan tunah hian sports hmasawnna tur ruhrel sak mek leh peihfel tawh engemawzat kan nei a. Chung zingah chuan Sports Hostel sak te, sports stadium awmsa thawmthat leh football artificial turf phah te a tel a ni. Ministry of Minority Affairs atanga sum Cheng nuai 140 hmuh hmangin Vaipuanpho ah State Training Centre for Adventure Sports siam hna a kal mek a, India hmarchhak state zinga adventure sports tana training centre tha ber ni tura duan a ni.

April ni 18, 2023 khan sports discipline hrang hranga infiammi 160 te hnenah Mizoram Sports Incentive Cash Award, 2021-22 chu sem a ni. NSS Mizoram chuan kumin chhung khan thingkung 2,657 phun in, blood bank hrang hranga an thisen pek belhkhawm chu unit 6,082 a tling a; AVBD chuan Blood Donation pe tha berah a thlang nghe nghe. Heng bakah hian khawtlang tana tangkai - zun in, waiting shed leh water shed te Mizoram hmun hrang hrang 60 ah siam in, khawtlangah Cleanliness Drive tum 270 chuang an lo buatsaih tawh bawk. Thalaiten kan ram tan an theihtawp an chhuah thin hi an fakawm hle a ni.

16. Department of Higher & Technical Education hnuaia Government College leh Higher Institution te’n NationalAssessment & Accreditation Council (NAAC) endikna hnuaiah grade an hmu tha thin hle a, a lawmawm hle a ni. State sawrkar hnuaia college leh higher institution zinga 83% chu accredited an ni tawh a, percentage a lak in India ram puma accredited Higher Education Institution neih ah Mizoram chuan pakhatna dinhmun a hauh a ni. Tun hnai mai khan Govt. J. Thankima College chuan A+ Grade NAAC Accreditation hmu in, State Government hnuai College zingah rank hmu sang ber a ni. RUSA hnuaia ‘educational infrastructure facilities’ tih hmasawnna tura state in sum a hmuh zat a pun chhan pawh tun hnaia Government College hrang hranga hmasawnna tam tak kan hmuh vang a ni pakhat ang.

National Education Policy of India 2020 hlawhtling taka kalpui a nih theih nan Higher & Technical Education Department chuan theihtawp a chhuah a. July, 2023 atang khan tun academic session 2023-2024 atan hian Four Year Graduate Programme (FYUGP) kalpui tan a ni. Zirtirtu indaihlohna phuhruk turin Contract Assistant Professor 68 dah ngheh an ni a. UPSC hnuaia All India Civil Service Examination a Mizo candidate inziaktling te tana Incentive Cash Award ruahman chu kumin khan UPSC Preliminary Examination paltlang mi pathum (3) hnenah hlan a ni.

17. School Education lamah chuan kumin khan Department of School Education chuan Science Teachers’Association Mizoram (STAM) nen tangkawpin district tinah ‘Children Science Congress’ a buatsaih a. Elementary leh Secondary zirlaite tan District Level Science and Maths Quiz Competition buatsaih a nih bakah Science zirtirtute tan Sensitization programme neih a ni bawk. Primary school zirtirtu 550 hnenah an zirlaite hmasawnna enzui nan leh kawng dang hrang hranga an hna puitu atan tablet sem a ni a. Sawrkar school 946 ah Sanitary Pad Vending Machines & Incinerators dah ni bawkin, sawrkar school tinah First Aid Kit sem a ni.

Mizoram Board of School Education (MBSE) chuan tun academic session kal mek a Class-IX leh Class-X zirlaite hman turin Mathematics leh Science Textbook (Mizo Tawng version) chu a siam a. Hetiang anga hmalakna hi India ramah chuan a hmasa ber pawl a ni. MBSE hian zirlai mitdel leh khaw hmuh thalo te tan Braille textbook leh textbook print lian zawk a siam a. Sawrkar school 500 a zirlaite’n cricket khelh an zir theih nan Samagra Shiksha leh Cricket Association of Mizoram chuan thawhhona thuthlung an ziak bawk.

State Council of Educational Research and Training (SCERT) chuan tun academic session atan hian Class VI, VII leh VII zirlaite’n Mizoram leh Zonun zemawi an zirchian theih nan supplementary reader a buatsaih a. PM e-Vidya TV Channel pahnih siam bawkin, Elementary School zirlai te tangkaipui tur ‘Zirna Kailawn’ (Learning Ladder) leh Secondary school zirlaite tan ‘Zirna Lamtluang’ (Learning Pathway) TV channel te chu July ni 29, 2023 khan NEP 2020 kum thum tlin lawmna pualin tlangzarh a ni. Kumin chhung hian Capacity Building of Health and Wellness Ambassadors Programme chu Aizawlah kalpui tum niin, he hmalakna hian Middle School, High School leh Higher Secondary School 427, zirtirtu 854 leh School hotu 427 te a huam ang.

18. Information & Communications Technology Department chuan PMJVK hnuaiah ‘Establishment of Smart Classroom in Minority Concentration Areas of Mizoram’ project chu minority tamna school 20 ah hlawhtling takin a zo fel ta a. Internet Service a lo that zawk nan Bharat Net Phase-II hnuaiah wireless router 500 semchhuah a ni bawk. Kumin chhung hian 4G connection la awmlohna khua 66 leh aspirational district chhungah mobile tower 60 bun tum a ni a. JIO leh Airtel chuan Aizawlah 5G network hman theih turin hma an la mek a; mipui tana thil tangkai tur a nih avangin State sawrkar pawhin a tulna apiangah a lo pui zel a ni.

State chhunga internet connection leh telecommunication rintlak tak pekchhuah a nih theih nan ‘Improvement of Backbone Connectivity of Districts and Blocks in Mizoram’ tih proposal siam a ni a. He project atan hian Cheng vaibelchhe 50 approve a ni tawh. He project hian fiberisation of telecom tower leh state chhunga 5G data lakluh kawngah hmasawnna nasa tak a thlen beisei a ni. Mizoram e-services portal leh Mizoram State Data Center & Cloud enablement project thuamthatna tur atana dil Cheng vaibelchhe 22.50 chu Ministry of Finance atangin phalna hmuh a ni tawh bawk.

ILP exemption leh Temporary Stay dil a awlsam zawk nana hmalakna Online Inner Line Pass (ILP) Portal Phase-I chu zawh a ni tawh a. Deputy Commissioner office tin a hman turin Myanmar Refugee Registration System (MRRS) siam a ni bawk. Hei hi online portal niin, samkhai zawka raltlan te hnena Identity Card pekchhuah leh digital record vawnhimna tur a ni.

19. Environment, Forests & Climate Change Department chuan tuna la dam mekte chauh nilo, chhuan lo awm leh zel te tana kan ramngaw neih sa te hum a, a chereu tawh te din thar leh nan Centrally Sponsored Scheme hrang hrang, heng Green India Mission (GIM), National Afforestation Programme (NAP) leh adangte ngawrh takin a kalpui thin a. Serchhip, Kolasib, Champhai lehAizawl district ah te Green India Mission chu kalpuiin, he hmalakna hian ramngaw humhim leh agro forestry hmanga eizawnna siam te leh, kuthnathawktute sum lakluh tih pun chu a thiltum a ni a. Heng district pali bakah hian district dang pasarih ah pawh kalpui zui zel tum a ni. Tun dinhmunah wood-based industry 21 bun ni tawhin, state chhung mi engemawzat tan eizawnna siam a ni.

EF&CC department chuan India leh Myanmar inrina paltlanga dan phalloh ramsa tawlhruk do turin hma nasa takin a la a. Sawrkar laipui atangin Champhaia ‘Satellite Animal Rescue Centre of Aizawl Zoo’din phalna hmuh niin, hmalak mek a ni. He centre hi peihfel a nih hunah chuan ramsa chhanchhuah leh harsatna tawkte humhim leh enkawlna hmunpui a ni dawn a ni.

Ram kang tih tlem leh ven kawngah Mizoramin hma a sawn zel a. Chak leh zuala hma lak a nih theih nan Champhai leh Lawngtlai district thuamthatna tur Cheng vaibelchhe 20 chu Ministry of Environment, Forests & Climate Change ah a thehlut.

20. Land Revenue & Settlement department chuan sawrkar kum 2022-23 chhung khan Residential LSC 4286, House Pass 1772, Agri Land Periodic Patta 178 leh DPL 290 a pe chhuak a. Ram neitu nihna thlak sak 9180 awmin, land holding 788 chu siamthat a nih bakah ram inchuh thubuai 361 chinfel a ni. Chekbawk House Site Plan ennawn a nih hnuah in sakna tur plot 1308 dah niin, vantlang mamawh community hall, school, thlanmual leh adangte tan house plot 5 ruahman a ni a. Maumual House Plan pawh ennawn mek a ni. Tuivamit House Site Plan hnuaiah MURA member-te chu in hmun pek an ni.

Mizoram chu India hmarchhak state zingah Central Sector Scheme hnuaia SVAMITVA kaltlanga Property Card pe hmasa ber a ni a; hei hi thingtlanga  ram neitu tihchianna a ni a, he hmalakna hnuaiah hian April ni 24, 2023 khan ram neitu 420 hnenah property card sem a ni. Hetihrual hian Digital India Land Record Modernisation Programme chu chak taka kalpui mek a ni bawk.

Aizawl chhungah chuan Bawngkawn Brigade Area chu khawtlang leh thil pawimawh bik atan hman turin reserved area a puan a ni a. State sawrkar chuan pass valid lo zawng zawng cancel turin thutlukna a siam bakah valid pass nei lo chunga ram lo luahte chu fee an chawi a ngai bawk a ni. District Administration nen tangkawpin Land Revenue & Settlement Department chuan Aizawl Bypass road siamna tur survey a nei a. SEDP hnuaiah Saitual ah survey kalpui a ni a, Khawzawl, Biate leh Sialhawk te la hmabak a ni.

21. Mizoram sawrkar chuan Irrigation & Water Resources Department chu State Water Informatic Centre ah puang in, heihi ‘online water resources management system’ a ni a; hmasawnna tur atana plan hrang hrang siam naah a tangkai phah dawn a ni. ‘PMKSY-Har Khet ko Pani’ hnuaiah Cheng nuai 5,097.78 man Minor Irrigation Project 45 kalpui mek a ni a, Command Area 242.83 hectare a zau tuamin farmer 1,222 in hamthatna an hmuh phah dawn a ni.

Minor Irrigation Project paruk (6), Cheng nuai 1,046.59 a thawh tura ruahman chu NABARD RIDF- XVII (2022-23) ah telh a ni a. Heng project hian 262 hectare a zau Culturable Command Area a tuam ang a. Surface Minor Irrigation (SMI) Project 33 tih hmasawnna atan Cheng nuai 1,000 man Development & Watershed Management Programme Project chu NABARD RIDF-XXVIII hnuaiah vek sanction a ni.

PMKSY-HKKP (Groundwater Irrigation) hnuaiah district paruk (6) a tube-well laih nan leh Solar & Electric Pump hun nan Groundwater Irrigation Project 13 (estimate Cheng nuai 1,604.89) kalpui a ni a. Tun dinhmunah tube-well 209 siam tawh niin solar pump 127 leh electric pump 6 dah a ni tawh. RIDF-XXVI hnuaiah Serchhip Chawmzau ah Groundwater Irrigation Project (estimated Cheng nuai 227.15) kalpui mek a ni bawk.

22. Fisheries Department hnuaia scheme hrang hrangte tih changtlun nan Sawrkar laipui chuan Pradhan Mantri Matsya Sampada Yojana (PMMSY) hnuaiah Cheng nuai 2,168.12 hu project a rawn pawm a. Mamit leh Serchhip District ahte Sangha note tharchhuahna Fish hatchery thar pahnih din tum a ni a. District hrang hrangah beneficiary thlanchhuahte tan Dil thar hectare 100 a zau siam tum a ni. Tualto sanghate chawilar a nih theih nan Hnahthial District-ah Raceway Culture System unit khat leh Mamit District- ah Water and Fisheries based Recreational Site unit khat din tura hmalak chhoh mek a ni a. Sangha thar chhuahte vawnhima dahthatna Ice Plant, sangha tonne 10 thleng dah theihna turAizawl leh Kolasib- ah pakhat ve ve din tum a ni.

Kum 2022-2023 chhungin Mizoramin Sangha Metric Ton 5029.85 a thar chhuak a, hrileng avanga Sangha thar chhuah tlahniam karah nikum chhunga thar chhuah aiin za zela 6 in a tam a ni. Kum 2021-2022 chhungin private leh government sector atanga Sangha no thar chhuah zat chu nuai 150 a ni a. Hri darh tur ven leh tui quality endik nan Disease Diagnosis and Quality Testing Laboratory din tum a ni a. Sangha tharlam tak takte lei theiha chhawpchhuahna tur hmun Live Fish Vending Centre, ITI Veng, Aizawl-ah din tum a ni.

23. SEDP kaltlangin Commerce & Industries Department chuan puantah chhungkua 438 te hnenah tanpuina sum cheng nuai 260 a sem chhuak a. Heng bakah hian SEDP Family Oriented Program hnuaiah chhungkua 13,266 te tanpuina sum Rs. 50,000/- theuh pek an ni bawk. PM Formalization of Micro Food Processing Enterprises Scheme (PMFME) kaltlangin SHG member 1092 hnenah tanpuina Cheng vaibelchhe 30.79 hu pek a ni. PM Gatishakti kaltlangin Industrial Growth Centre (IGC), Luangmual leh Export Promotion Industrial Park (EPIP) Lengte te tihchangtlunna tur sum cheng vaibelchhe 20.96 dawn a ni bawk.

SASCE Scheme sum Cheng vaibelchhe 15 sengin Zokhawthar Land Customs Station tihchangtlun a ni a. Smart City Project hnuaiah Cheng vaibelchhe 42.83 senna tur Aizawl City Centre, New Market-ah sak mek a ni. Aizawl City Centre Annexe- ah tho hian New Market (Foreign Lane), cheng vaibelchhe 36.41 senga sak mek a ni bawk a. Kum 2022-2023 chhungin Commerce Wing, Commerce & Industries Department chuan chhiah Rs. 1,13,77,410/- a khawn chhuak a ni.

24. Labour, Employment, Skill Development & Entrepreneurship department chuan Mizorama kuthnathawktu (unorganised worker) ten nunphung pangngai taka an hman theih nan anmahni tuamhlawmna scheme pawimawh tak takte chak takin a kalpui a. Labour Law engemawzah kalpui mekin heng zingah hian an hnena inziaklut kuthnathawktute, nitina inhlawha chhuak thinte tan social security scheme a kalpui a ni. January ni 31,2023 khan Online Employment Exchange Portal (Empex Mizoram) leh July ni 7,2023 khan Mobile Application tlangzarh a ni a. Tun dinhmunah he portal hmangtu mi 2,03,307 an awm mek a ni.

Mizoram Building & Other Constructions Workers’Welfare Board (MBOCWWB) hnuaiah financial year kalta chhung khan hamthatna hrang hrang Rs. 14,39,52,000/- sem chhuah a ni a. MBOCWWB hnuaiah MINECO ah Multipurpose Centre cheng vaibelchhe 15 senga sak niin hei hi July ni 7, 2023 khan hawn a ni.

25. Urban Development & Poverty Alleviation Department hnuaiah Aizawl Smart City Ltd. kaltlangin cheng vaibelchhe 119.2 senga sak Integrated Command & Control Centre (ICCC) chu hawn fel a ni a, cheng vaibelchhe 193 senna tur Laldenga Cultural Centre sakna tur lungphum chu Hon’ble Union Home Minister Pu Amit Shah chuan April ni 1, 2023 khan a phum. Aizawl Smart City siam turin hmasawnna ruhrel leh service pawimawh tak takte kalpui chhoh mek zel a ni bawk a. Heng bakah hian Multi Utility Centre, Thakthing Veng, Drainage System Zotlang leh Artificial Turf & Pavillion Khawzawlte sak zawh fel a ni tawh bawk.

Lunglei Municipal Council office atan Lunglei Convention Centre chhawng li-na chu chei that a ni a, January ni 13, 2023 khan hawn a ni.

Family Oriented SEDP kaltlangin kum 2022-2023 chhung khan trade 4 hnuaia hamthatna dawngtu mi 828 te hnenah tanpuina sum Rs. 50,000/- theuh instalment hnih hmanga pek chhuah a ni.

26. Kum 2022-2023 chhungin Transport Department chuan chhiah cheng nuai 4903.26 a hmu a. Tlabung, Serchhip leh Vairengte-ahte Commercial Vehicle Terminal cheng nuai 690 senga sak niin, December ni 9, 2022, April ni 12, 2023 leh April ni 13, 2023 ahte khan hawn a ni a. Govt. Mizo High School Aizawla Multi Level Car Parking & Multipurpose Hall sak chu May ni 17, 2023 khan hawn niin, School Education Department kutah hlan a ni.

27. Judiciary tihchangtlun kawngah pawh hmalak chhoh mek zel a ni a. Tun atanga reiloteah MINECO a High Court Building sak chu hawn tum a ni a. cheng vaibelchhe 49 senna tur Champhai Vengsanga District Court building sakna tur first phase chu buaipui mek a ni a. Heng bakah hian Kolasib-a Court building sak hna buaipui mek niin Judge-te chenna Residential Quarters leh Fast Track Court sak hnate chu zawhfel tawh a ni.

Kumin January atanga June thla thleng khan State Legal Services Authority chuan dan lam kaihhnawiha puih ngai mi 315 te a tanpui tawh a. Hemi hun chhung vek hian case 5036 ziahluh niin heng zinga 1814 te chinfel a ni. Lok Adalat pawh a zing thei ang bera buatsaih thin a ni a, kumin June thla thleng khan Registrar of Marriages 735 an awma, chung zinga 26 chu ruat thar an ni.

28. Social Welfare & Tribal Affairs Department kaltlangin Ministry of Social Justice & Empowerment-in National Action Plan for Drug Demand Reduction (NAPDDR) hnuaia programme pawimawh hrang hrang a duante kalpui thin a ni a. Thalai, nu leh pa tiamin mi 1800, College Zirtirtu 725, YMA hruaitute, De-addiction cum rehabilitation centre NGO kaltlanga kalpuite leh a dangte hnenah ruihhlo hmansual kawnga hriat tur pawimawh inhrilhhriatna leh inzirtirna buatsaih thin a ni.

PMAAGY (Special Central Assistance to Tribal Sub- Scheme) hnuaiah Ministry of Tribal Affairs chuan khaw 344 thlan chhuahte hmasawnna ruhrel pawimawh zual sector hrang hrang 8 - Anganwadi Centre, Tui thianghlim in tur, electricity leh adangte hmanga tihchangtlun an nih theih nana rawtna awmte a pawmpui tawh a. Ministry vek hian zirna, hriselna, agriculture leh sum lakluh theihna scheme leh research lam hawi project 107 te a pawmpui tawh bawk. Accessible India Campaign kaltlangin Sawrkar Pisa leh mimal chenna in 10 te vohbik/rualbanlo te tana kal awlsam zawkna turin wheelchair ramp, toilet, elevator, tactile floor leh tul dangte hmanga thuamthat a ni.

29. Mission Shakti, Mizorama kalpui tura June ni 12, 2023 a hawn a nih atangin Women & Child Development Department chuan hmeichhiate venhimna leh inchhung khura hleilenna tawkte zirtirna leh tanpuina tur ‘Hub for Empowerment of Women (HEW)’ changtlung tak a din a, hengahte hian anmahni puitu tur Protection Officer tha tak takte an awm a ni.

Tun dinhmunah hian Mizoramah ICDS Project 27,Anganwadi Centre 2244 awm mekin ICDS hnuaia hamthatna dawngtu 1,51,457 (2023 July thla thlengin) an awm a. Tribal Welfare hnuaia fund dawn Cheng nuai 151.70 hmangin Anganwadi Centre 29 sak a ni a. PMJVK kaltlangin Anganwadi Centre thar 35 sak niin, Poshan Abhiyaan Award kaltlanga fund dawn hmangin Anganwadi Centre 657 te chei that a ni bawk.

‘Children with special needs’ te pualin Mizoram State Sawrkar chuan Home 4 a kalpui mek a, Police Station/Out Post 29 ahte Police Department nena tangrualin ‘Child Friendly Corner (CFC)’ siam a ni a. Heng bakah hian Child Friendly Corner hi Special Court 5 ahte siam a ni bawk. Law & Judicial Department nena tangkawpin Special Court 3 ahte POCSOAct hnuaia pawikhawihna tuartute tan ‘One-way Mirror’ dah a ni a. Zirna In leh naupang enkawlna hmunahte naupangte’n an hlim leh lawm dan ziaka thlenna ‘Happy/Sad Box’ hun a ni a. He bawm dawh hi thla tin hawn niin, engemaw rinhlelhte a awm a nih chuan District Child Protection Unit (DCPU) in tul angte a bawhzui nghal chat thin a ni.

30. SEDP hnuaiah Science and Technology Department chuan leiung hausakna haichhuak a, a tangkai thei ang bera hman a nih nan hma a la a. Hemi atan hian Biotechnology Centre din a nih bakah, hmalakna tichak turin NEC sum bultum ‘Infrastructure Development of Biotechnology Cell in Mizoram’ kalpui a ni bawk.

Biotechnology Centre hi CSIR-IHBT (Institute of Himalayan Bio-resource Technology), Palampur nen thawkho in IFT building, MINECO ah Mushroom Demonstration Centre din a ni a. He centre-ah hian ‘Oyster mushroom’ leh ‘Shiitake mushroom’ chin niin, hlawk zawka tharchhuah a nih theih nan zirchianna neih a ni. CSIR-IHBT, Palampur leh Thenzawl College of Horticulture nen tangkawp in Mizoram hmun hrang hrangah apple ‘low chilling variety’ chin a nih theih nan hmalak a ni bawk.

Institute of Bio-resource & Sustainable Development (IBSD), Mizoram University leh Health & Family Welfare Department nen thawkhovin Mizo chawhmeh um thenkhat chu zirchian a ni a. State pawn leh ram pawnah kan Mizo chawhmeh te hralhchhuah a la nih theih nan tam tham taka ruahmanna siam mek a ni a, a taka kalpui theih thuai beisei a ni.

31. Excise & Narcotics Department chu NDPS Act, 1985 kengkawhtu nodal agency an nih angin ruihhlo do kawngah nasa takin hma a la a. Police, Social Welfare, DRI, Assam Rifles, Border Security Force te, YMA, YLA , MTP leh NGO dangte nen thawk ho thin in, tun sawrkar kum kalta chhung khan cheng vaibelchhe 10 chuang ruihhlo man a tihchhiat a ni. Inhrihhriatna ngawrh taka kalpui thin a ni bawk a, Core-Committee on Ruihhlo Do bultumin Mass Drug Awareness Campaign kalpui a ni bawk.

Mizoram Liquor (Prohibition) Act, 2019 hnuaiah mi 4614 chu dan kalh a an chet avanga man ni tawhin, case 3015 ziahluh a ni tawh a. September ni 9, 2022 atanga Mizoram Liquor (Prohibition) Rules, 2022 kalpui a nih hnu khan Mizorama thar grape wine siamchhuah, kawl, hralh, thawnchhuah leh in chungchanga zawm tur mumal takin ruahman a ni.

32. State sawrkar chuan Lungleia Geology & Mining Zonal Office din phalna a pe a. He Zonal Office hian district pali - Lunglei, Hnahthial, Lawngtlai leh Siaha District te a enkawl dawn a ni. Hemi kaihhnawih hian Zonal Office post thar 13 siam a ni.

Kum 2022-23 chhunga Directorate of Geology & Mining chuan Rs. 12,20,23,289 a lalut a. an target an khum a ni. Fur ruahtui in hmun hrang hrang 55 a chhiatna a thlen te zirchiang in Geotechnical investigation kalpui mek a ni bawk.

33. Sericulture Department chuan Defence Research and Development Organisation (DRDO), Ministry of Defence, Indian Institute of Technology (IIT), Guwahati leh Mizoram University nen tangkawpin, Armed force te leh an ui khawi te ei theih tura Eri buhchium sawngbawl tum a ni a.

SEDP hnuaiah chhungkaw 300 hnenah puihna cheng singnga theuh nikum khan pek a ni a. Kum 2022-2023 chunga Cocoon (Reeling Cocoon) tharchhuah zat chu 698.982 Metric Tonne niin Raw Silk 55.237 Metric Tonne tharchhuah a ni bawk. Heng pangang ei tur sericulture food plant thar nan hian ram 5,262 acre a zau hman a ni.

34. Art & Culture Department hnuaiah document pawimawh digitize hna Mizoram State Archives chuan a thawk zawm zel a. Mizo culture chawi lar nan Cultural Meet leh Border Area Programme engemawzat hmun hrang hrangah buatsaih a ni. Kumin Chapchar Kut lawmnaah khan B-20 Summit delegate-te pawhin March ni 3 a lammual a cultural exposition min telpui hlawm a ni.

35. Cooperative Sector hi economy hmasawnna atan ke pawimawh tak a ni a. Tun dinhmunah Cooperative Society in register zat hi 1,306 a ni. Cooperative Sector chuan thil man khuahkhirh kawngah te hna pawimawh tak a thawk a. Multipurpose Cooperative Society dinna ah te chuan vantlang sum khawl chu kum khata Cheng vaivelchhe 3 te tling anga chhut a ni a. Mamit district ah Integrated Cooperative Development Project (ICDP) kalpui mek niin, hemi atan hian National Cooperative Development Corporation (NCDC) atangin cheng nuai 523.74 hmuh a ni.

36. Assembly Session hunlai leh nidangah Legislative business tluang taka a kal theih nan Parliamentary Affairs Department chuan tha takin hna a thawk thin a. Kum 2022-2023 chhung khan Eighth Mizoram Legislative Assembly session 10 leh 11 na te koh a ni a. Assembly Session a pharh turin 10th Session ah khan Legislative proposal pasarih (7) thehlut in, 11^th Session ah Legislative proposal 21 chu Mizoram Legislative Assembly Secretariat ah an thehlut a ni.

37. General Administration Department hnuaiah km 153 a sei, NH-54 Kaochao-Tipa atan Land Acquisition chungchang leh zangnadawmna chu chinfel a ni tawh a. Backyard Block thlanchhuah te tih hmasawnna atana DPR, cheng nuai 298.91 senna tura duanchhuah tak pawh NEC in a pawm tawh a ni. West Bunghmun Block chhunga bika Key Identified Services hnuaia hmalakna atan NEC atangin cheng nuai 492 dawn a ni tawh a. Mamit District chuan Aspirational District Programme hnuaia hna an thawh that avangin NITI Aayog atangin cheng vaibelchhe thum lai a dawng a bawk a ni. Mara Autonomous District Council, Lunglei Municipal Council leh Village Council sawmthum (30) inthlanna bakah Local Council paruk (6) by-election te chu hlawhtling takin neih a ni. Kawngpui pawimawh tak, NH-54 leh NH-06 kawngpui tihlen leh siamthat hna chu 3G estimate hnuaiah zawh fel a ni tawh a. Secretariat Administration Wing pawhin Multi-level Car Parking building leh hmun dang atanga parking fee lakkhawm amangin Rs. 11,63,290/-, lai a hmu tawh bawk a ni.

Kum 2022-2023 chhung khan DP&AR hnuaiah post thar siam tura rawtna 154 pawm a ni a. DP&AR hian promotion atangin post ruak 695 a hnawhkhat thei a. Heng te hi LDE atanga hnawhkhah post 163 leh post 543 Direct Recruitment kaltlanga hnawh khah te a ni.

DP&AR chuan contract hmanga hnathawktu chhawr mek mi 154 leh Provisional Employee anga chhawr mi 809 te a dah nghet tawh a. MACPS (Modified Assured Progressive Scheme) 2020 hnuaia State Sawrkar hnathawk 10240 te upgrade na tur check slip pawh a tifel tawh bawk a ni.

38. Kum 2022-2023 chhung khan Mizoram Subordinate Service Selection Board chuan direct recruitment exam vawi 51 leh Limited Departmental Examination vawi 45 a buatsaih tawh a. PWD hnuaia JE, Overseers leh Section Assistant-te tan Departmental Exam a buatsaih bawk. Heng bakah hian MSSSB chuan thawktu 983 tana kaisanna tur ching felin contract hnathawk 53 te dah nghehna tur a buatsaih fel tawh bawk a ni.

39. Aizawl Bung Bungalow-a State Institute of Hotel Management (SIHM) sakna atan Ministry of Tourism chuan Cheng vaibelchhe 10 min rawn pe a. He Institute hi degree level course leh food craft course zirna tura duan a ni. Tin, Cheng vaibelchhe 1000 lai mai Externally Aided Project hnuaiah Mizoram chhunga Tourism leh Sports infrastructure tihhmasawn turin district 11 atan hmuh a ni. Tour Guides’ Federation of India 24th Annual Convention chu Mizoram Tourism Department chuan May ni 26, 2023 khan Aizawl- ah hlawhtling takin a lo thleng tawh a ni.

40. Kum 2018 atanga kalpui tan, Group A leh B (Gazetted) officer-te Property Return online-a thehluh, chu Vigilance Department hnuaiah tun thlengin hlawhtling takin chhunzawm a ni.

41. Kum 2022-23 chhungin Taxation Department chuan chhiah an lakluh tur zat bituk Cheng vaibelchhe 900.03 chu khumin Cheng vaibelchhe 1020.66 lai an tlin thei a. Hei hi kum khata chhiah lakkhawm tam ber tum a la ni rih a. Taxation Department chuan kumin kum 2023-2024 chhungin chhiah lak luh tihpun nan nasa takin tan a la chhunzawm zel a, July, 2023 thlenga chhiah lakkhawm tawh chu cheng vaibelchhe 415.84 a ni tawh a ni.

42. Printing & Stationery Department pawhin printing works atangin Rs. 19,63,778/- leh stationery bungrua hralhna atangin Rs. 1,03,37,407/- chu kum 2022-2023 chhung (June, 2023 thleng) khan a lalut a ni.

43. Kum 2022-2023 chhung khan District Council & Minority Affairs Department chuan grant-in-aid (non salary) Rs. 12,33,00,000/- LADC tan, Rs. 11,05,99,000/- MADC tan leh Rs. 5,85,00,000/- CADC hnenah te a pe chhuak a. Heng bakah, grant-in-aid (non-salary) Rs. 1,27,50,000/- LADC hnenah leh Rs. 1,24,62,000/- MADC hnenah a pek belh a. Tin, Rs. 77,98,000/- Autonomous District Council 3 (pathum) hnuaia Village Council-te hnenah pek chhuah a ni tawh bawk.

44. SEDP hnuaiah Land Resources, Soil & Water Conservation Department chuan chhungkaw 2300 tan Kuhva (Arecanut) Plantation a kalpui tan a. Chhungkaw 10 tan Coffee Plantation leh chhungkaw 3316 tan Hmunphiah Plantation siamin heng hmalakna atana sum hman zawng zawng chu cheng vaibelchhe 14.20 a ni.

45. Ministry of Home Affairs thupek angin Disaster Management & Rehabilitation Department chuan vanduaithlak taka Covid-19 vanga nunna chan ta mi 709 hnenah ex gratia, mi pakhat tana Cheng Singnga zel a pe tawh a. Tin, Mizoram sawrkar chuan frontline worker-te, duty laia Covid-19 vanga thite ralna atan, an chhungte hnenah Cheng nuai 20 zel a hlan bawk a ni.

District hrang hranga DC Office tinah Disaster Control Room emaw District Emergency Operation Centre (DEOC) emaw siam a ni tawh a. Heng Centre-ah te hian MPRO mi leh sa te duty tir an ni a. WT Set te, chhanchhuahna hmanrua te thil tul dang te pawh chhawp a ni. Tin heng Centre te hi rikrum thilah Emergency toll free telephone ‘1077’, etc. ah te biak pawh theih reng a ni bawk. Chhiatrupna lo thlen thulh a rang taka chetlak a nih theih nan District Disaster Management Plan duan a ni a; heng ruahmanna te hi kumtin ennawn a ni thin. Tin, chhiatrupna a lo thlen thulh a chhanchhuah hna thawk hmasa ber tur, Quick Response Team, mi 14 awmna chu Aizawl District Disaster Management Authority chuan a din tawh bawk a ni.

46. Information & Public Relations Department hnuaiah art, film leh fine arts huangah Mizoram chhunga mimal talent nei tha deuh te tih hmasawnna atan theihtawp chhuah a ni a. He hmalakna hi state chhung leh pawnah te pawh a remchan dan anga kalpui zel a ni. Mizo film siamtu mi 2 (pahnih) chu May, 2023 khan khawvel hriat hlawh Cannes Film Festival-ah tirh an ni a. Mizoram Journalist Welfare Scheme hnuaiah hian journalist 47 leh an chhungte an damloh in inenkawlna atan tanpuina pek mek an ni a. Tunhnaiah khan journalist 2 (pahnih) boral ta chhungte te hnenah ex-gratia, Cheng nuai 1.5 ve ve pek a ni. Mizoram Press Accreditation Rules- in a tarlan angin media mi 140-te accreditation chu April, 2023 atanga March, 2025 chhung atan tihfel a ni bawk. NEC sum hmanga project Lianchhiari Run Multi Facility Centre, Tuikual, Aizawl ami chu Union Home Minister Pu Amit Shah-a’n kumin April ni 1 khan a hawng a. Tunah hian he building chhunglam hi bungraw tha tak taka chei mek a ni a, rei lo teah hman tan a ni dawn a. He building- ah hian mipuiin an chhawr tangkai tur mini theatre, art gallery, exhibition space, multi-level lirthei parking zau tak leh thildangte a awm dawn a ni. MIS officer thar 4 (pali) lak a nih veleh District thar 3-ah te officer lak thar te dah niin post ruak te hi hnawhkhah nghal a ni a. Tunah chuan I&PR Department pawh District 11-ah hna an thawk tan tawh a ni.

47. Mizoram sawrkar chuan mipui te tana dik taka hna thawh a nih theih nan tan a la zel a. Mizoram Lokayukta pawhin hemi kawngah hian hman an la mek zel a. Eirukna leh a nghawng mha lo laka mipui fimkhur turin NGO hrang hrang nen mangrualin eiruk dona awareness campaign chi hrang hrang 30 a buatsaih tawh a ni.

Pathian leh mipuite zarah vawiin hian kan sorkar chuan kum li leh a chanve hmel a lo hmu ta reng mai a. Heng hun reilote chhunga kan hnathawh te hi ka thlir let a, hrileng leh harsatna lian tak tak tawk mah ila kan thlen chinah hian hlawhtlinna pawimawh tak tak kan hmu niin ka hria a, a lungngawi thlak thawkhat in ka hria. Tlinglo tak chunga he hmalakna kawnga hruaitu ka nihna angin hlawhtlinna kan hmuh te hi kan tan chuan a lawmawm takzet a ni. Kawng tam takah hmalakna kan nei a, heng zinga tam tak hi tihhlawhtlin a ni tawh a. Hetih rual hian hmachhawp tam tak kan la nei a, kawng tinrengah tih tur tam tak a la awm a ni. Kan za in theih tawp chhuah chhunzawm zel ila, a hma aiin nasa zawkin tan kan la ang a, kan thil neih te tangkai zawka hman dan te dap chhunzawm bawk ila, kan state leh keini, a chhunga chengte tana kawng tinrenga hmasawnna siam i tum ang u.

Vawiin ni lawmawm takah hian Zoram mipui zawng zawng hnenah, a bik takin tlawmngai pawl hrang hrang leh kohhran mite chungah, kum 4 leh a chanve chhung zet, in thlawpna tha tak ka dawn avang te, in mi rintawkna lawmawm tak ka hmuh avang leh kawng hrang hranga sawrkar hmalaknaah te in phungbawmna ka dawn avang te hian, thinlung takin lawmthu ka sawi nawn leh a ni. Tun hnaia harsatna tawk, mangang leh tanpui ngai te tanpuina atana khawtlang leh mimal anga kan inpekna leh kan huaisenna te hi a ropui ka ti tak zet a. Tin, Sawrkar hnathawk te thawhrimna leh inpekna ropui tak te hi chhuanawm ka ti; chanchinbumite leh Mizoram chhunga sorkar laipui Pisa hrang hranga thawktu zawng zawngte chungah lawmthu ka sawi bawk a, kan state hmasawnna atana in hnathawh leh in mi thlawpna zawng zawngah lawmthu ka sawi bawk e.

Kan ram zalenna kan lawm a, a hlawhtlinna ropui tak takte avanga kan rilru a hlim lai hian hnam inpumkhatna, remna leh muanna atana thawk chhunzawm tu ni zel tura thutiam nghet tak siam nawn leh turin kan in chah leh a. Inpekna thuk zawk, rilru thar nen, kan ram leh Mizoram state tan hmasawnna lian zawk thawk chhuak tura hmalam pan zel turin kan insawm nawn leh bawk e.

Ka lawm e.

Jai Hind.