Indian Chamber of Commerce ten ni 23 & 24 August, 2010 chhunga Hotel Hyatt Regency, New Delhi-a 4th India Energy Summit 2010 an huaihawt turah Mizoram Chief Minister Pu Lal Thanhawla chu ni 24  August kharna programme 'Valedictory' session ah Khual Zahawm (Guest of Honour) atan an rawn sawm a. He programme ah hian Union Minister of Power Pu Sushilkumar Shinde leh Union Minister of State for Coal Pu Sriprakash Jaiswal te bakah Central sorkar mi pawimawh tak tak leh Company lian hotu rual an tel dawn a, India rama mithiamte bakah USA, Poland, Australia, Germany leh Bhutan aiawh palai ten hun an hmang dawn bawk a ni. India leh ram pawn atangin palai 250 aia tam mah tel tura beisei an ni a, Mizoram Chief Minister hi hun hmang tura ruat zinga Chief Minister awm chhun a ni. Amaherawhchu Pu Lal Thanhawla hian Lunglei lamah programme pawimawh tak duansa a lo neih avangin he sawmna zahawm tak hi a tihlawhtling thei dawn lo va, pawi a ti hle a ni.