Assam Administrative Staff College, Guwahati a North Eastern Council (NEC) neih mek chu vawiin khan chhunzawm a ni a. Nimin khan tan niin Mizoram atang pawhin Governor leh Chief Minister leh Lok Sabha MP te an tel a. Vawiin hian hmarchhak state atangin Chief Secretary te leh Central Ministry thlanbik sawmpathum atangin presentation ngaihthlak leh sawihona nen vawiin hian hun hman a ni.

Secretary Pu Ram Muivah report atangin NEC project hrang hrangah Mizoram chuan hna a thawh that thu ngaihthlak a ni a. Mizoram chu Hmarchhak state pariat zingah hna thawk tha in, Pending UC (Utilization Certificate) nei tlem ber a nih thu a sawi a. Tun dinhmunah project hrang hrangah pawisa an hmuh belhkhawm atanga la hman loh chu Rs. 8.59 crores niin Pending UC 8 chauh Mizoram hian a nei tawh a. A hnaih ber state Sikkim chuan pending UC 20 neiin chu chu crore 16.36 a ni a. Arunachal Pradesh leh Assam te chuan crore 60 chuan pending amount an la nei a ni. Mizoram chuan project atan a pawisa hmuh te a hmang tha in hna a thawk chak hle tih a entir thu a sawi. NEC hian UC portal a nei bawk a; Mizoram chu hmang tangkai ber tu a ni.

Kumin 2019-20 chhung hian NEC chuan Aspirational District hrang hrangte chu a rang thei ang bera district hmasawn zawkte tluk thei tura khaikan te, Tourism, Thingpui, Bawnghnute, Sangha khawi leh Bamboo ah chak zawka hmasawn hna thawh te, foreign trade lama hmasawn theih nana thawh te, boruak sik leh sa inthlang danglam chak lutuk do tura tui hna leh tui hnar dang humhalh leh border road siamthat te a tel a ni.