India British sawrkar awpna hnuai atanga a indanna champha “Independence Day “ vawi 64-na chu vawiin chawhma dar 10 : 30 khan District Playground Saiha-ah ropui leh urhsun taka lawm a ni.

He Ni lawmna inkhawm ah hian Pu P.C. Lalthanliana,  LAD Minister  chu khuallian niin Parade Contingents 14 ten hnampuanzar chibai an buk a chhang let a, Independence Day thuchah sawi nghalin mipuite chu India ramin zalenna a hmuh theih na tura theih tawp chhuaha hna lo thawktu kan hruaitu hmasa te hrereng turin a chah a, sawrkar tha leh rintlak dik leh felfai nei tura theihtawp chhuah an intiamthu a sawi bawk. Ram ralmuanna venhim kawngah pawh hma nasa taka lak an tum thu sawiin khawtlangnun ralmuanna leh ngelnghehna atan theih tawp chhuah a thawk zui zel turin mipuite chu a sawm ani.Kut hnathawktu leh mirethei zawkte inkhaichhuah theihna tura sawrkarin scheme hrang hrang leh ruahmanna hrang hrang a siamte tarlangin sawrkarin a hmachhawp hrang hrang te pawh a tarlang bawk ani. NLUP hlawhtlin theih na tura sawrkar hmalakna chu Central sawrkar pawh in a phurpui thu sawiin tun dinhmunah NLUP a hman tur cheng vaibelchhe sanghnih zariat sawmsarih pathum leh point sawmpathum (2873.13) min approved sak tawh ani ati bawk. Ram mipuite tihchak nan zirna tha a pawimawh thu sawiin zirna tih hmasawn nana sawrkar hmalakna leh hmachhawp chi hrang hrang te a tarlang bawk ani. Sawrkar chuan inkalpawhna tha a ngaih pawimawh thu sawiin thalaite hmakhua thlir chunga an talent te haichhuak turin sawrkar chuan theihtawp achhuah mek ani, ati bawk. Rural Water Supply (NRDWP) hnuaiah khaw hrang hrang sawm pathum tan cheng nuai 769.419 ruahman anih thu sawiin Greater Saiha Water Supply Scheme pawh UIDSSMT hnuaiah hma lak mek anih thu sawiin hemi atan hian cheng nuai 393.31 chu central sawrkar in an rawn released tawh ani, a ti bawk.

Independence Day lawmna pual hian infiamna chi hrang hrang buatsaih ani a, Air Rifle Shooting (Men) ah 1.S.Lalzamlova,New Colony 2. David L. New Colony 3. K.Lalrothara, New Colony ten lawmman an dawng a , Air Rifle Shooting (Women) ah S.Lalhmingrimawii, New Saiha in lawmman a dawng bawk a ni. Chess Competition-ah 1. F.Lalnunpuia, New Saiha 2. C.Lalrinngheta Tuipang 3. Anthony Lalthansanga, New Saiha ten lawmman an dawng bawk ani. Badminton Competition Special Category ah 1. Joseph L.Chinzah 2. Joseph Malsawmtluanga ten lawmman an la a, Women Doubles-ah 1. Zodinsangi & N.Noni 2. C.Lalnunpuii & HT Heni ten lawmman an la a, Men “A” Doubles-ah 1. R.Laldinsanga & C.Aisika 2. David Lalnunsanga & Ismaela ten lawmman an la bawk. Heng lawmman chi hrang hrang te hi Khuallian, District Bawrhsap, C.E.M.leh S.P.ten an sem ani. Volley Ball (Mipa) bikah Meisatla Youth Club te leh Southern YoungVolley Ball Club te an inkhela,hmeichhia  bikah B.S. Volley Ball Club te leh Zino Volley Ball Club te an inkhel bawk. Independence Day Football Final chu Siahatla Football Club te leh New Colony Football Club ten chawhnu lamah an khel a ni.

Independence Day lawmna Parade ah hian Contingents 14 awmin Uniform leh School Contingents a then hran an ni a, heng parade contingents te hi Sub-Inspector Kaphranga 2nd Bn MAP chuan a kaihruai ani. Uniform Contingents-ah Pakhatna Bharat Scout & Guide, Don Bosco School an ni, pahnihna Mizoram Home Guard, Saiha te niin pathumna 2nd Bn. Mizoram Armed Police te an ni. School Contingents ah pakhatna Foxall Higher Secondary School te niin pahnihna ECM Higher Secondary School te an ni a, pathumna Hill Gate School Saiha ten lawmman an la bawk a ni. Parade Contingents zawng zawngte hnenah Consolation Prize pek vek an ni bawk.

Independence Day lawmna pual hian sawmbikte tan Thingpui in hona “AT HOME” CEM,MADC Bungalow ah chawhnu dar 1 : 00 ah neih a ni a, sawmbikte an kal tha hle ani. He Ni lawmna hi Saiha District chhunga Sub-Division Tuipang-ah pawh Pu Zothangliana , Parliamentary Secretary chuan zing dar 10 : 30 khan Tuipang Playground ah hnam puanzar pawtpharhin thuchah a sawi a,Tuipang-ah hian parrade contingents 6 an awm a ni.