1511/2023-2024

Khawzawl, 15th August 2023: India ramin zalenna a neih champha phak vawi 76-na lawmna hun chu ramchhung hmun hrang hrang ah vawiin khan neih a ni a. Khawzawlah chuan Mualvawm Field-ah Independence Day lawmna hi neih niin; Deputy Chief Minister Pu Tawnluia chu khuallian a ni a, hnam puanzar pawt pharhin Parade Contingent 19 te chibai a chhang let a ni.

Deputy Chief Minister Pu Tawnluia chuan Khawzawl mipuite leh India ram puma Independence Day hmangtute chu chibai a buk a. Tun Ministry chuan mipuite tam tak te tahna hrethiamin chawhma lama Raj Bhavan-a sawrkar lakluh a nih hnuah CM Bangla-ah meeting neiin, zu zawrh khap kalpui a rel nghal a ni, Deputy Chief Minister chuan a ti a. Remna tluantling awm chu hmasawnna atan a pawimawh ziah sawrkarin a hre chiang hle a, he mi kawngah sawrkarin theihtawp a chhuah a; ‘Mizo Nationalism’ hnuaiah kan unau mangang taka Mizoram rawn bel tu te chu Pu Zoramthanga kaihhruai sawrkar chuan theihtawp chhuahin a lo kaihkuah a ni, a ti bawk. SEDP chu mitin ta tur, intodelh nan a sawrkar ruahman a ni a, he mi kawngah mipui te pawhin hnathawh tur an nei tih hriat reng a tul thu sawiin; Bru Voters Tripura-a inbengbel ta te chu Mizoram roll atanga paih vek an nih thu a tarlang bawk.

Khawzawl District chuan August ni 12 khan District a nih kum lina hmel a hmuh tak thu Deputy Chief Minister chuan a sawi a, Khawzawl District hmasawnna atana sawrkar hmalakna hrang hrang te tarlangin Independence Day lawmnaah hian hetiang hian thu a sawi a ni:

Thian duhtakte u, vawiin India Independence Day vawi 77 naah hian Khawzawl District mipuite leh ram puma India khua leh tuite duhsakna chibai ka buk a che u.

Khawzawl District hian August ni 12 khan district a nihna kum 4- na alo hmang ta a. Hetih chhung hian Khawzawl District hian naupang te in kawng hrang hrangin hma a sawn a,vawiin India ram Zalenna champha phak 76 na ah hian a bik takin Khawzawl District in a hma kan sawn dan hi han sawi uar deuh ka duh a. Pu Zoramthanga kaihhruai Ministry alo din khan kan intiam angin District thar pathum Khawzawl, Saitual leh Hnahthial te chu function tir an ni a. Kum 4 hnuah chuan heng District thar ah te hian hmasawnna nasa taka hmuh a ni a, sawrkar Office ringawt pawh 23 lai hawn a ni a hei hian District mipuite tan hmasawnna hna thawhnaah awlsamna a thlen tih hai rual a nih loh bakah sawrkar hnaah pawh Khawzawl District thalai te tan kawng a in hawng bawk a ni.Hetiang ang dinhmun hi Khawzawl leh a chhehvel khua a nu leh pa leh thalai ten District kan duh chhan leh kan demand chhan kha niin vawiin ni ah a taka kan hmu hi lawmawm ka ti em em a ni.

Vawiin ni ah hian Khawzawl District-a hmasawnna lama han tarlan zual duh bik ka nei a, a hmasa berin kan sawi thin angin thalai te khawvel a ni a Mizo thalai ten Infiamna lamah hma kan sawn a,a tui pawh kan tuiin eizawnna mumal hmuh nan kan ti a. Chumi ah chuan sorkar in tih tur kan nei ve niin kan hria a, thalai infiammi te tan a platform leh infrastructure te kan theih ang chinah siamsak hi kan tum tlat a.Khawzawl District thalai te tan Mualvawmah phullem kan phah bakah Pavillion changtlung tak kan siam a. Basketball ah pawh Mizoram in National level hma nasa takin kan sawn a chumi boruak chu tem pha ve turin kan thalai te tan Mizoram a a hmasa ber turin PP Tiles tha chi hmangin Electric Veng ah kan siam a,tin Dinthar Veng ah chhun leh zan a khelh theih turin Volleyball Court changtlung tak kan siam bawk a.hei bakah hian Tennis khel mi te tan Vengthar ah Tennis Court puitling kan siam bawk a,tunah hian MUlvawm filed sir ah hian Futsal Ground tha tak siam turin hma kan la mek bawk a,heng infrastructure hmang te hian sawrkarin thalai te kan cho chhuak duh a,midang te tan entawn tur nih mai bakah eizawnna tlak khawp thiamna an chher chhuah kan duh a.Infiammi te tan hmachhawp tam tak kan nei a vawiin ni ah hian sawi vek sen a nilo nangin Khawhai ah playground puitling siam turin hmalak mek leh Chalrang leh Sialhawk ah te leh hmun dang dang a kan hmalakna te ka han sawilang tel duh a ni.

Tunlai khawvel ah insumdawn tawnna a chak tawh hle a, thlai thar leh thildang te pawh kan in thawn kual zung zung thei tawh a, mahni ram a thar kher lo pawh kan ei in kan in thei tawh a, chu ti chung chuan ei leh bara intodelh hi kan Ministry thil tum pawimawh tak zing ami a ni a. Hemi kawng ah hian Khawzawl District hi Mizoram a chhunawm ber te zing ami a tih theih awm e. Agriculture Department hnuaiah kum 2022-23 chhung hian Sorkar flagship programme, SEDP – Family Oriented chu chhungkaw 628 hnenah 1st instalment leh 2nd instalment te pek fel vek a ni. Rainfed Area Development hnuaiah loneitu mi 160 hnenah tanpuina pek a ni tawh a. National Food Security Mission hnuaiah loneitute loah Dal lam thlai leh hriak nei thlai leh vaimim chindan tha demonstration neih sak a ni a. PMKSY hnuaiah tui dah khawlna tanky 84 loneitute tan siam sak niin, HDPE pipe 75 mm tlawn 629 leh 25 mm roll 136 sem a ni bawk a ni. FOCUS hnuaiah loneitu ten thlai tam zawk an thar theih nan te leh eizawnna mumal an neih theih nan kawng chi hrang hrang a hmalak a ni bawk a. Horticulture Deptt. hnuaiah hian Centrally Sponsored Scheme hrang hrang MIDH te, RKVY (Raftaar) leh PMKSY leh SEDP hnuai atangin kuthnathawktuten hlawk zawk leh tha zawk a thlai leh thei an thar chhuah theih nan hmalakna a kal pui reng a ni a. SEDP hnuai atangin Tualte Tomato Processing Centre sakna tur 50 lakh dawn niin hmalak mek a ni. Tunah hian a In sak hna 90% zawh tawh a ni a, a khawl hi IFAD-FOCUS hnuaia Innovation Fund 40 lakhs an dawn atanga lei tur a ni. Tunah hian Tualte Tomato Grower Co-Operative Society Ltd. chuan Bajaj Process Pack Company hnenah a khawl supply turin order an siam tawh a, tun atanga rei lo te ah Khawl hi lo thleng mai tura beisei a ni. Tin, AH&Vety Department pawhin nasa takin hma an la a SEDP hnuaia vawk leh Ar vulh thlangtu mi 342 hnenah Rs.50000/- theuh pek an ni a. District A.H & Vety Hospital ah hian ran case chi hrang hrang 3404 enkawl tawh a ni a, hetah hian Vaccination leh A.I (Artificial Insemination) te pawh telh a ni a, National Livestock Mission hnuaiah Kel, Vawk leh Bawng vulhtu thahnem tak te tanpuina pek niin FOCUS hnuaiah VAwk leh Ar vulh tanpuina sem a ni bawk a ni. Tunah hian District A.H & Vety Hospital sak mek a ni a, hemi rual hian DVO quarters leh VO quarters tur sak mek a ni bawk a, Brooder House sak fel tawh niin Boar Semen Station sak leh tur a hmalak mek a ni bawk a ni.

Khawzawl District ah hian ram pum huapa kan hriat lar angin Tualte ah tomato nasa taka thar a ni a ram chhung market a luah hneh hle a. Tin, Sialhawk leh a chhehvel khua Chalrang leh New Chalrang ah te leh Tlangpui thlengin Lakhuihthei nasa takin lonei tuten an thar a, Sialhawk ah hian Pineapple Processing Plant reilo te ah din tum a ni. Sorkar in Khawhai leh Chawngtlai ah awmze nei thamin Sapthei chin tir turin hma a la mek a, beneficiary te pawh thlan fel tawh niin a zam na tur Thirzai pawh sem fel tawh a ni.

2nd IR Battalion pawh venhimna lamah nasa takin tha an thawh a India ram hmun hrang hrang ah Election duty a an kal mai bakah Manipur tualchhung buaina ah mipui te sahim nan border ah an duty a tin, khuarel chhiatna a thlenin State Disaster Response Force angin an che chhuak thin a ni. District Child Protection Unit pawh April 2022 a Khawzawl a office bil an neih hnu ah chak takin naupang kum 18 la tling lo te tan Juvenile Justice Act 2021 a kalpui zel a. Child Welfare Committee leh Juvenile Justice Board ten naupang te dan hnuaiah an hamthatna leh dikna chanvo an hmuh theih nan hma an la a ni.

Education Department hnuaia NABARD kaltlangin Tualpui, Khawzawl leh Neihdawn ah te School Building sak a ni a. RMSA hnuaiah Secondary School Kawlkulhah leh Rabungah hawn thar an ni a, Khawzawl Higher Secondary School thlangah Building thar sak mek niin kumin chhung ngei hian hawn hman tum a ni. RD Department pawhin thingtlang mite hmasawn nan scheme hrang hrang kaltlangin hma an la a, MGNREGS hnuaiah kum 2023-24 chhungin Khawzawl District chhungkaw 8825 te hnenah Ni 34 inhlawhna pek a ni tawh a. MGNREGS hnuai atang hian mipui vantlang tana rohlu thil tam tak siam a ni a. Tui dahkhawlna te, Khawchhung kawng pawimawh, step leh culvert te siam a ni a. Amrit Sarovar pond pawh 116 lai siam a ni nghe nghe. Tin, DRDO Building pawh Rs.150 lakh senga sak zawh a ni a, tunah hian PD Quarters Rs.157 lakh senga sak mek a ni a, hawn mai theih tura peih fel tep a ni. Hei bakah hian Officer Quarters Rs.136.32 lakh hmanga sak mek a ni bawk a ni. PMAY-G Scheme hmangin chhungkaw 293 te thlan an ni a, chhungkaw 293 te insak bul tanna tur atan Rs.45,500/- theuh pek an ni tawh bawk. Sum hi hnathawh chak dan mila pekchhuah thin a ni. Tin, kum 2023-24 chhung hian mi 458 insak tanpuina pe tura ruahmanna engkim peih fel a ni.MzSRLM hnuaiah Self Help Group 397 awm in, Village Organisation 29 leh Cluster Level Federation 4 an awm mek a, SHG te bultan nan hian Rs 2500/- theuh pek niin Revolving fund hi Rs 4,20,000 pek chhuah ani tawh bawk, Training hrang hrang buatsaih sak an ni a. Community Investment Fund hi Rs 7,50,000 pek chhuah ani tawh bawk.MzSRLM hnuaia SHG 10 ten bank Loan Rs 37,50,000 la tawh in, BC Sakhi (mini ATM) 16 khaw hrang hrangah dah an ni mek bawk a ni. Enterprise Financing PM-FME, MUDRA Loan and PMEGP NRLM FI Initiative ah hian bultan tur in kan in pe chhuak tan mek a ni a,Custom hiring Centre hi Ngaizawl leh Lungtan ah din ni in, Rs 2,20,000 ve ve pek an ni. CHC hi hmeichhia kut hnathawktu ten awlsam zawk , rang zawk leh hlawk zawk a, hna an thawh theihna tur a ruahman a ni.

Khawzawl ICDS Project ah hian Naupang 0 – 6 years-3015; Nu, Naupai-272 leh Nu, Naupawm(0-6m)-176 enkawl an ni a.Hmeichhe tleirawl (11 – 14yrs Out of School) 6 enkawl lai a nei bawk a, heng ho hi Rilru leh Taksa hrisel taka an than chhoh zel theih nan enkawl an ni a. Nutrition hi englai pawha sem reng a ni a, Naupang Normal phak lo te hi Double Ration pek an ni. SAM (Severely Acute Malnourished) hi mi 13 enkawl lai kan nei a, Kumin 2023 June thla ah Normal ah hlan kai chhoh vek an ni a, Tunah chuan SAM Naupang Khawzawl ICDS Project hnuaiah an awm lo a ni. PMMVY (Pradhan Mantri Matru Vandhana Yojana) Nu, Naupai tanpuina hi Khawzawl Project hnuaiah mi 618 in an dawng tawh a, Dil mek hi mi 20 an awm mek a ni. Nutri- Garden hi Anganwadi Centre tin in an siam vek a, Naupangin Thlai, Theirah tharlam, Vitamin tamna te englai pawha an ei theih nan siam a ni. Co-Ordination Committee, Mother’s Committee leh V.C. ten theihtawp min chhuahpui avangin kan hna ah hlawhtlinna tam tak kan hmu a, kan lawm hle a ni.

Khawzawl District chhungah Green India Mision atangin Hectre 2280 a zau Ram enkawl mek a ni a, heng Ram chhungah hian thing phun belh hna te, samfai hna te, leilung luangral tur venna hna bakah kangmei venna hnate kum tinin thawh thin a ni. CAMPA leh JICA hnuaiah sik leh sa venhim nan te, tuihna humhalh nan te Ram zau zawk enkawl thei turin State sawrkarah Proposal lian zawk thehluh leh mek a ni a, tin, mipuite mamawh phuhru turin Nursery-ah thingtiak (Seedlings) chi hrang hrang eng emaw zat enkawl mek an ni a, kumin Green Mizoram Day 2023 pual hian thingtiak 929 sem chhuah a ni bawk.

District Sericulture Office, hawn thar kaltlang in Sericulture Department, Khawzawl District hnuaiah kum 2023 chhungin farmer 216 ten Thingtheihmu, Mutih leh Nauthak pangang khawi hna tluang taka kalpui a ni a. Farmer ten thingtheihmu pangang tui 1600dfls layings vulh in cocoon 153.3kgs. an thar a, Mutih pangang tui 400dfls layings vulhin cocoon 19.5kgs. leh buhchium 38.8 kgs. thar ni in , pangang te hi la vulh mek zel a ni a,cocoon pawh la thar belh zel beisei a ni.Tin, Silk Samagra-2, Central Silk Board hnuai a Eri Development Project kalpui mek ah chhungkua 136 enkawl mek an ni bawk.

Khawpui hmasawnna kawng ah UD&PA pawhin DUDO kaltlang in hma nasa takin ala a. Mzioram Cleanliness Competition 2022 ah District Fai lawman Pakhatna chu Khawzawl District in a la a,hei bakah hian Other Urban Town Category ah Biate Pahnihna niin Khawhai chu Pariatna an nip ha a,Khawzawl Dinthar Veng in Best Village Council Lawmman a dawng nghe nghe a, District Khawpui Fai ber lawman dawng tur hian SBM,MLALADS leh MGNREGS te convergence bakah mipui te inpekna vang liau liau a lawman la kan ni.Heng balkah hian Hman Khat Daih Single Use Plastic hman khapan kalpui a ni a, tin, Bawlhhlawh te Dry leh Wet thali niin hemi hi reilote a Sorkar hmalakna Solid Waste Management Centre nen kalkawp tur a ni.DRDO leh BDO te nen tan gkawp in Home Compost 700 siam an ni tawh a,MLA Fund kaltlang in Khawzawl Town a chhung tin te hnenah Bawlhhlawh Bawm pahnih theuh sem a ni bawk a ni a SBM hnuaiah Community Toilet 8 leh Indivisual Household latrine 891 siam a ni tawh bawk a ni.DAY-NULM hnuaiah SHG 38 din tawh niin Training hrang hrang pek an ni tawh a.Skill Training pawh chak taka kalpui mek a ni a, Special Shelter pawh Dinthar ah sak zawh tawh a ni.PMAY Urban ah Insak tanpuian Khawzawl,Khawhai leh Biate ah 2045 semchhuah mek a ni bawk a ni.UD&PA hnuaiah hian kan tarlan tawh angina Muavawm Playground leh Pavillion te sak zawh a ni tawh a, DUDO Office ,Multi-Purpose Hall,Zuchhip leh Khawzawl Auditorium pawh sak tan mek an ni.

Irrigation and Water Resources Deptt. hnuaiah Lo neituten awlsam zawka tui an phai zawla an lak luh theih nana hma la tu ber an ni. Ground water solar pumping project Tuisen phai, Khawzawlah hmun li-ah verh zawh niin chhungkaw sawmpahnih in tangkai takin an hmang mek a ni. NHIDCL (Widening) kawng laihin a tih chhiat Choâk bûk zau, Khawzawl leh Tuimuk zau (Haidai lui), Khawzawl-a lo neitute hman tur pipe line chu fitting zawh tawh niin tangkai takin lo neituten an hmang tawh bawk a ni. January thla chhung khan Phaisen hnar MIP, Khawzawl leh Khuangthli MIP, Pâwlrang lamah department works Tender chhuah a ni a, May thla chawhnu lam khan zawh vek tawh a ni.

PWD hnuiah hna engemawzat SEDP leh SASCI hnuaiah thawh mek a ni a, PHE Deptt. Hnuaiah JJ leh NABARD kaltlangin Vangtlang WSS (Solar Pumping);Sialhawk FHTC;Tualte WSS (Gravity);Hmuncheng WSS;Tlangpui FHTC;Tlangmawi (Tlangpuite) FHTC;Khualen WSS ( Gravity);Rabung WSS (Solar Pumping);Kawlkulh i/c Tawitawkawn Solar Pumping;Chhawrtui WSS (Solar Pumping);Tualpui WSS (Gravity);Ngaizawl WSS (Gravity);Pamchung WSS (Solar Pumping);Aiduzawl WSS (Gravity); Vankal WSS; Arro WSS (Solar Pumping); Chawngtlai WSS (Gravity);Dulte WSS;Neihdawn WSS (Solar Pumping);New Chalrang WSS;Puilo WSS (Solar Pumping);Riangtlei WSS (Solar Pumping) te thawh zawh leh thawh mek an ni.

District Hospital pawh tih changtlun mek zel a ni a, theih ang tawkin an mamawh te CSR kaltlang te in ngaihtuah sak an nih bakah District Hospital Puitling ni turin a tul angina post creation pawh sorkar in a ngaihtuah in a ti hlawhtling mek zel a ni. Khawzawl Police te hian ruihlo dona kawngah nasa taka hma la in tunhnai ah Khawzawl District chhung khaw hrang hrangah leh Khawzawl khaw chhung zirna in hrang hrangah Awareness Campaign neih a ni a. Khawzawl Police te hian tunhnai ah ruihhlo Heroin 1830.11 grams, a hlut zawng Rs 91,509,500/- (Cheng nuaih zakua sawmpanga sangkua leh zanga) an man a, Zu 188 litres, a man Rs. 98,900 (Cheng singkua sangriat leh zakua) an man a, Dan lova Kuhvarah (Arecanut) phurh 1995 bags, a hlut zawng Rs. 1,28,12,400/- (Cheng Nuaih za sawmhnih leh pariat sing khat sanghnih leh zali) an man a, Dan lova Leichi (fertilizer) phurh 3524 bags, a hlut zawng Rs. 35,24,000/- (Cheng Nuaih sawmthum panga, sing hnih leh sang li) an man bawk a ni. Tin Exotic Animal Zawng(monkey) 4 leh Sava 13 an man bawk a ni.

Thiante u, in hmuh leh hriat angin India zalenna champha vawiina kan hman mekah hian inpekna leh ngaihtuahna thar nen he hun hi hmang ila. Thawh hreh nei lo ila, eng hna pawh hi a zahawm a ni. Keimahnin kan tuma kan beih phawt chuan Mizorama district hmasawn ber kan ni thei tih hria ila, sorkar lam atanga kan tih turah chuan sorkarin theihatwp a chhuah zel dawn a ni. Tiang taka sorkar hmalakna thlawp tur chuan in zavaiin thinlung leh tih tak zetin ka sawm a che u.

Khawzawl District mipuite u, Independence Day vawi 77-na ah hian duhsakna sang ber ka hlan a che u.

Vawiina Khawzawla Independence Day lawmnaah hian khuallian Pu Tawnluia chuan a hnuaia mi te hnenah hian chawimawina a hlan:

Parade Commander- S.I. Lalhmuakliana

Parade

1st Position: JNV Boys & Girls Contingent
2nd Position: Khawzawl HSS Boys & Girls Contingent
3rd Position: Far East Experimental School Girls Contingent
Participation Prize : ( Armed Contingent)

2nd IR Battalion Armed Contingent

NCC Govt. Khawzawl College
NCC Govt. Khawzawl High School
Student Police Cadet, Govt Khawzawl HS
Participation Prize (Unarmed Contingent)

Khawzawl Higher Secondary School (Boys & Girls Contingent)
Khawzawl Higher Secondary School (Girls Contingent)
Govt. High School, Khawzawl (Boys & Girls Contingent)
Model High School, Khawzawl (Boys & Girls Contingent)
Govt. Middle School-II, Khawzaw! (Boys & Girls Contingent)
PES Khawzawl, Boys Contingent
PES Khawzawl, Girls Contingent
PES Khawzawl Vengthar, Girls Contingent
PES KhawzawlVengthar, Boys Contingent
Grace Foundation School, (Boys & Girls Contingent)
St. Joseph High School, (Boys & Girls Contingent)
Far East Experimental School, Boys Contingent

Khawzawl tihmingthatu zaithiam Vanlalfela (Young Fella) hnenah chawimawina hlan a ni bawk.

Mualvawm Ground-a hun hman zawh hian Khawzawl DC Bungalow tualzawl-ah ‘VIP at home’ hun hman a ni a, Deputy Chief Minister hian sawm bik te pualin Independence Day lawmna zanriah a buatsaih dawn bawk a ni.