No.1857/2021-2022

Mamit 15th August, 2021 : India ram hmun dangte rualin vawiin khan DC Complex Mamit-ah India Independence Day vawi 75-na urhsun taka hman a ni a. Pu Lalrinliana Sailo, Speaker, Mizoram Legislative Assembly chuan khuallian niin hnam puanzar a pawtpharh.

Khuallian chuan India Independence Day lawm tura kalkhawm mipuite duhsakna chibai bukin India Hnam Pa Mahatma Gandhi, Subash Chandra Bose, Baghat Singh, Bal Gangadhar Tilak leh mi huaisen dang tam takte zarah zalenna kan lo nei ta a. Vawiinah hian heng mi ropui, zalenna kawng lo sialtute hi zahna chibai ka buk a, an hnathawhte chhunzawm a, an hniakhnung zui tur leh remna leh muanna hlu tak kan chante humhim tura theihtawpa thawk zel turin kalkhawmte a sawm a. Ram dang awpna atanga zalen ringawt erawh zalenna tluantling a ni lo tih hre thar a, kan ram leh hnam hian engtiklai pawhin do tur kan nei reng a. Kan khawtlangah sualna leh kan ram himna tiderthawng thei thil hmachhawn tur kan nei reng a, Burma ram zalenna sualtu ropui Aung San Suu Kyi-i'n "Zalenna dik tak chu hlauhna atanga zalenna a ni" a lo tih angin mimal tin hian kan nitin nunah, chhungkua leh khawtlangah, kan rilru leh taksain eng hlauhna mah nei lo-a zalenna tluantling an lo neih theuh theih nan, te lua awm lova thawk tlang turin kalkhawmte a sawm bawk.

Zalenna Ni kan lawm mek lai hian Covid-19 hripui leng kara Doctor leh hriselna lama thawktu, ralhmatawnga awm zawng zawngte hnathawh ropuizia hriain kan thlawp tlat a, abikin Mizoram leh Mamit District tana thawktu ngei te, Department hrang hranga thawktute, VLTF te, tlawmngai pawl leh kohhranhote, mimal thahnemngai tak tak leh mipuite, theihtawp kan chhuah avanga tun hi thleng kan ni a. Hrileng kara kan inhmangaihtawnna leh inchhawmdawltawnna lang thin hi chhawmnung zel ila, kan pi leh pute'n "Dam leh tlang khatah, thih leh ruam khatah" an lo tih thin a taka kan hmu hi a lawmawm takzet a ni tiin hripuiin kum khat leh a chanve dawn min chenchilh tawh karah Sorkar chuan hmasawnna kawng hrang hrang zawh turin theihtawp a chhuah a, chung hnathawh tlangpuite chu han tarlang ila:

Agriculture Department hnuaiah kan hriat angin State Flagship Programme SEDP hnuaiah hma eng emaw zat lak a ni tawh a. Tin, National Adaptation Fund for Climate Change hnuaiah kuthnathawktute tui dah khawlna tur leh a awmsa thawmthat hna eng emaw zat thawh a ni tawh bawk. RKVY-RAAFTAR hnuaiah pawh loneitute tan hectare 42-a zaua hmalak anih bakah he scheme hnuaiah vek hian Tel Antam chinna tur hectare 6 a zauah loneitute chu hmalaktir an ni bawk. Heng bakah hian Sub Mission on Agro Forestry hnuaia chhungkaw 400 hnena thing tiak sem te, NSFM Oil Palm hnuaia Oil Palm chi 11,000 sem chhuah leh metric tone 2532 lai thar chhuah a nite hi a lawmawm hle a, he scheme hnuaiah vek hian link road 7 leh tui dah khawlna 7 siam a ni bawk a ni. Agriculture hnuaiah vek hian PMKSY scheme hmangin tui dah khawlna 69 siam a ni a, Rural Infrastructure Development Fund hnuaiah pawh leilet thar, hectare 50-a zau khaw panga-ah siam a ni bawk. Tin, National Food Security Mission hnuaiah buh chin dan mumal zawka kalpui a ni a, buh chi tha Gomati sem chhuah anih bakah vaimim pawh acre 150 a zaua chin a ni a, vaimim chi tha leh lei tha chi hrang hrang sem chhuah a ni bawk. Hei bakah hian loneitute tan rainted area development hnuaiah loneitute tan integrated farming system chu khaw pathumah hectare 314 a zaua kalpui a ni a, Capital Expenditure hnuaia special assistance hmangin tin 150 hmunah loneitute vaimim chintir an nih bakah a chi tha leh lei tha a thlawna sem an ni bawk.

AH&Vety Department hmalaknain Mamit District chhunga SEDP hnuaiah Ar vulh tur mi 32 thlan an ni a, Rainbow Rooster note 1600 chu kumin March thla khan sem niin Broiler note pawh 4800 sem a ni bawk. Ar chaw leina tur mi 34 hnenah sem niin mi pakhatin cheng 37,800 theuh an dawng a. Tin, vawk vulhna tur hi mi 3 hnena sem a ni bawk a, mi pakhat tan hian Rs 1,19,280 zel sem a ni. Progressive Farmer Scheme hnuaiah vawk in sakna tur Rs 8,18,672 pek chhuah a ni tawh a, hei bakah hian AH&Vety farm atangin arpui tui lai 179, ar pakhat zel Rs 500-a hralh chhuah a ni bawk a. ZPDS Tanhril atanga layer note lak atang pawhin nikum July thla atanga vawiin thlengin Artui 11,928 hralh chhuah a ni tawh bawk. Vawk farm tihchangtlun nan pawh hma lak mek zel a ni a, vawk pa vulha a chi lakna tur leh kah raina tur sak mek niin hemi atan hian Cheng nuai 80 dah a ni a. A thawktu turte pawh lak an ni tawh a, kumin March thla atang khan hna pawh an zawm tawh a ni. Tin, vawkpui no neihna hmun tur pawh Rs 10 lakh man hu chei that mek a ni bawk.

Hei bakah hian Rs nuai 80 mana sak District AH&VETY hospital pawh 98% peih a ni tawh a, 5kVA Solar power plant pawh Boar Semen Station, Mamit AH&VETY farm-ah bun a ni tawh bawk a. Tin, Rural Animal Health Center pawh Kanghmunah dah tel niin hei hi Satellite Boar Semen Station atana ruahman a ni. Kum 2020 July atanga kumin 2021 July thla chhung hian hospital-ah case singhnih chuang treat a ni tawh a, vaccination singkhat chuang pek niin tun thleng hian revenue cheng 3,10,000 chhun a ni tawh bawk.

Fisheries Department Mamit District chuan kum 2020-2021 chhung khan 44 lakh a hmu a, tui khuah thar te, sangha note khawina tur te, water logged area siamna tur leh sangha khawitute thlam sak tanpuina tur mi 53 -te hnenah Rs 44 lakh chuang pek a ni a. Hei bakah hian sangha note siam chhuahna hatchery atan Rs 15 lakh hmuh niin kumin May thla khan siam zawh a ni tawh bawk. RKVY-RAAFTAR scheme hnuaiah pawh rearing pond siam nan mi pahnih hnenah Rs 1,20,000 pek chhuah a ni bawk a, PMMSY hnuaiah pawh kum 2020-21 atan Rs 66.69 lakh dah niin hmalak mek zel a ni.

Land Resources, Soil & Water Conservation Dept hnuaiah NABARD funding hmangin Rengdil leh Kanghmunah te private rubber plantation atan hmalak mek a ni a, Mamit District chhung atan SEDP hnuaia Kuhva hectare 62-a chin tura ruahman pawh chak taka hma lak mek zel a ni bawk.

Sericulture Department Mamit hnuaiah Northeastern Regional Textile Promotion Scheme kalpui mek a ni a, khaw -14 ah beneficiaries 500 an awm a. Hemi atan hian Rs. 1156 lakh dah niin hrileng vanga pawhfan deuh ni mahse chak taka hmalak mek zel a ni.

Horticulture Deparment chuan Mission for Integrated Development of Horticulture hnuaiah scheme hrang hrang atanga hlawhtlinna tam tak hmuh a ni a. Area expansion scheme of Papaya hnuaiah hlawk zawka Thingfanghma thar chhuah a nih theih nan a chinna hmun zauh a ni a. Kuthnathawktu mi 100 hnenah thingfanghma tiak 20,000 a thlawna sem a ni bawk. Tin, dragon fruit chinna atan pawh Area Expansion Scheme hnuaiah vek Mamit District tan hian unit 45 dah a ni a, hei hian ram hectare 45-a zau huam tura ruahman a ni. He scheme hnuaiah vek hian balhla leh tualchhung thlai chi hrang hrang chu kuthnathawk thlan bikte hnenah sem a ni a, Serthlum huan 70 chuang chu Rejuvenation of Sensitile Plantation hnuaiah chei that a ni bawk. Expansion scheme hnuaiah vek hian Mamit District tan Mizo hmarcha unit 40 ruahman a ni bawk. Integrated Post- harvest Management 2020-21 hnuaiah Rural market sak a ni tawh bawk. PMKSY scheme hnuaiah kuthnathawktu 60 chuang hnenah thlai tui pekna vuahsak niin hei hian thlai thar chhuah kawngah nasa takin a pui dawn a ni.

Cooperative Societies hnuaiah kum 2020-21 chhung atan PMVY scheme hnuaiah primary cooperative society parukte tihchangtlumn nan Rs. 90 lakh hmuh a ni a. Reiekah hlawhtling taka Aieng sawngbawlna hralh chhuah mek a nih bakah West Phailengah pawh Sawhthing leh Mizo hmarcha sawngbawlna khawl bun fel a ni tawh bawk a ni. Kuhva skop siamna atana tui dah khawlna pawh Darlak, Tuidam leh Zawlnuamah te siam zawh tawh a ni bawk.

Food, Civil Supplies and Consumer Affairs Department chuan National Food Security 2013 zulzuiin beneficiaries te hnenah buhfai tluang taka sem zel a ni a, National Food Security Act hnuaiah pawh Non- beneficiary-te tan man tlawm zawka buhfai pek a ni bawk a. Covid hrileng avanga sawrkar laipuiin PMGKAY a thlawna sem chu nikum 2020 April atanga November thla thleng khan kalpui a ni a, hemi hnuaiah hian buhfai, dal leh chana quintal engemaw zah sem a ni. Sawrkar laipui ruahmanna angin Mamit District-ah hian Aadhar leh Ration card 83.09% thlun zawm a ni tawh bawk. Mamit DCSO hnuaiah Rengdil, Tuidam leh Pukzingah te kudam leh staff quarter pahnih theuh sak mek a ni. Centre 13-ah fur chhunga ei tur buhfai tih thlen vek a ni tawh bawk a ni.

UD&PA Department hnuaiah pawh Shelter for Urban Homeless Scheme hnuaiah Mamit khawchhunga Children Shelter Home-te hnenah chhawmdawlna engemawzat pek a ni. Lungsir vengah mi 20 thlen theihna tur Dharamsala Rs. 35 lakh a sak mek a ni bawk. Social Mobilization and Institution Development hnuaiah Self Help Group 59 din a ni a, Area Level Federation pathumte'n enkawlin sahbawn siamna, chhang ur, pickle siam leh pa khawi thlengin zirtirna an pe mek bawk. UD&PA hnuaiah hian kawng sir dawr tete hamthatna tur ngaihtuahsak niin mi 109 hnenah ID pek a ni. Employment through training & placement hnuaiah kumin hian course hrang hrangah beneficiary 90 awmin chak taka bawhzui tum mek zel a ni bawk. Self Employment Programme hnuaiah khawpuia cheng mi harsate puih nan kum 2020-21 chhung khan applicant 55 thlan chhuah niin bank pathumah loan sanction tura thawn a ni tawh a, hmachhawp dangte bawhzui mek zel a ni. Swach Bharat Mission ( Urban ) hnuaiah Mamit khaw chhunga vantlang inthiarna zawng zawng thuam that tura hmalak mek a ni a, tun financial year kal mekah hian (Open Defecation Free) ODF+standard-a hlankai vek tum a ni. Bawlhlawh sawngbawlna tur pawh vaiza ramah hectare 1.50-a zau awmin vermin-composing centre leh resource centre-te sak zawh tawh a ni. Urban Housing for All hnuaiah kumin June thla thlengin Housing Loan Mamit leh Zawlnuama Beneficiary 90-te hnenah sanction a ni tawh a, Beneficiary Led Construction Scheme hnuaiah pawh khawpuia in leh lo nei lote tan Mamit-ah mi 528 leh Zawlnuamah mi 239-te approval hmuh a ni tawh a, kumin June thleng khan Rs. 299 lakh pek chhuah a ni tawh a ni. SEDP hnuaiah pawh hma hrang hrang lak mek zel a ni. Chhimveng Mamit Playground, Mini Sports Complex chei that te, Culvert, retaining wall, YMA Hall chei that leh MUP House leh hna dang engemaw zat thawh a ni. Zawlnuamah PCC flooring, retaining wall leh culvert hnate thawh niin 90% vel thawh zawh tawh a ni bawk.

Chief Medical Office (Health & Family Welfare Department) te chuan mipuite hriselna lamah theihtawp chhuah zelin Mamit District-ah hmasawnna a thleng mek zel a, MMU te'n khaw parukah free medical check-up neiin damdawi a thlawna sem nghal a ni. National Tobacco Control hnuaiah awareness programme vawi engemaw zat neih niin zuk leh hmuam nghei tura hmalakna-ah quit rate 12.93% a ni mek a, TB umbo tuma sawrkar hmalakna pawh a hlawhtlinna rate 92% lai a ni. National Blindness Control Programme hnuaiah pawh mi 352-te a thlawna tarmit pek niin mi 28-te free cataract surgery pek an ni bawk. Kum 2020-21 chhungin Malaria avanga thi kan la awmlo chu a lawmawm hle a. Tun dinhmunah Mamit District chhungah Covid Care Centre (C3) pathum function mek a ni a, a dang panga function tura hmalak mek a ni a. Hei bakah hian C4 hmun 8-ah function tura hmalak a ni bawk. Aspirational District kan nih ang leh kan DC hmalakna-in REC Ltd hnuaiah Bolero Camper 11 lai dawn a ni chu a lawmawm hle a. District Medical Superintendent (District Hospital) chuan DC, Mamit hnen atangin mobile laboratory, EECO ambulance, refrigerator pathum leh labour room thawm thatna tur Rs. 20 lakh dawn a ni a, nikum September thla khan Covid-19 test-na tur Truenat Laboratory pawh siam zawh niin OST Doctor pawh dah a ni tawh bawk. Nikum 2020-a Kayakalp intihsiakna-ah commendation Award, Best Team Work leh Mera Aspataal atangin Special Award- te dawn a ni tawh a. Hei bakah hian Power Finance Coorporation Ltd. CSR atanga Rs. 17 Crore-a sak, khum 100 awm theihna tur Mamit District Hospital pawh sak chhunzawm mek a ni bawk.

Zirna lama hmasawnna turin Mamit District chuan hmalakna kalpui chhunzawm zelin Samagra Shiksha hnuaiah Govt. Higher Secondary School Mamit-ah Science leh Commerce stream hawn belh a nih bakah Building pawh sak tura ruahman mek a ni a, Kawrtethawveng leh Phuldungsei-ah Govt. Secondary School-te upgrade-in Art stream hawn belh a ni. Govt. Mamit College-ah Geography subject hawn thar a nih bakah faculty te hlawh pawh MLA Fund atanga tumsak rih an ni. RTE hnuaia Retention leh quality intervention scheme hnuaiah pawh zirlaibu a thlawna sem niin grant chhenfakawm tak tak pek an ni bawk. Transformation of Aspirational District scheme hnuaia education volunteer mi 50 lakte, school 20-a smart class kalpui te, master trainer 16 lakte, hmeichhe zirna lama hmasawn nan full time worker 278 lak leh total literacy drive a tante nasa taka hmalak a ni bawk.

Power & Electricity Department chuan Zawlnuamah project cost Rs. 841.40 lakh sengin Sub-Station thar leh hna pawimawh dang engemaw zat thawh mek a ni a, Bairabi atanga W. Phaileng-Mamit kaltlanga 132kV single curcuit siam hna Rs. 5495 lakh senga thawh mek a ni. W. Phaileng leh Marpara-ah te Rs. 10, 183.04 lakh sengin sub-station pahnih leh a thlunzawmna tur NERSIP hnuaiah thawh mek a ni. Mamit chhevela power infrastructure tihchangtlunna turte, Mamit leh Zawlnuam 33kV line thara thlun zawmna tur leh Rawpuichhip leh Zamuang sub station thawm thatna tur sum tam tak senga thawh mek a ni bawk. Public Health Engineering Department Jal Jeevan Mission atangin khaw 9-ah chhungkaw tin tui connection pek zawh tawh an ni a, khaw 18-ah sanction hmuh tawh niin thawh mek a ni, NABARD - RIDF hnuaiah Augmentation of Greater Mamit Supply scheme part -I atan Rs. 670 lakh sanction niin 71% thawh zawh a ni tawh bawk.

Public Works Department kaltlangin kawngpui tha kan neihna turin a theih ang angin hmalakna kalpui a ni a, Mamit Town Road, Cross drain leh pavement siam hna SEDP hnuaia Rs 45 lakh hmanga thawh mek a ni a, W. Phaileng-a PWD Complex Approach Road-a Protection wall, W. Phaileng leh Marpara inkar kawng thawmthat hna Rs 907.19 lakh leh hmasawnna hna dang thawh mek a ni. PMGSY hnuaiah Mamit - Phaizau, Kawnmawi - Chhippui, Phuldungsei - Parvatui, Tuipuibari - Andermanik leh Andermanik -Belkhai inkar kawngte pawh sum tak tak senga thawh zawh tawh a ni. Tuipuibari to W. Kawnpui kawng Rs. 4870 lakh senga thawh mek a ni bawk. PWD hnuaiah hian Kum 2020- 21 chhungin NH 44 kilometre 98.36 a thui siam that te, Dampui leh NH 44A inkar 2.35 km te, Rawpuichhip leh NH 44A inkarte, Sairang-Lengte-Nghalchawm PMGSY kawng leh SEDP hnuaia Rawpuichhip kawng thar laih hnate thawh a ni a. District Rural Roads Development Agency, MNREGS hnuaiah central leh State sawrkar atangin Rs. 5880.77 lakh dawn a ni a, avaiin Job Card Holder mi 22120-te hnenah ni 100 inhlawhna pek a ni a. PMAY-G hnuaiah Mamit District chhunga hmeithai leh mi retheite in thar 139 lai saksak an ni bawk a, mi pakhat in sak nan hian Rs 1,30,000/- zel pek a ni.

Environment, Forest and Climate Change hnuaiah ramngaw humhalh leh kangmei laka kan him theih nan theihtawpa hmalak a ni a, kumin kangmei chhuak nasa tak karah Mamit District chuan District Level Fire Prevention Award lawmman 1-na lain a lawmawm takzet a. Kumin Green Mizoram Day puala thing ?iak 250 phun a ni te, phun tura thing tiak 12492 zet pek chhuah a ni pawh a lawmawm hle a ni a ti. Zalenna kan lawm mek lai hian mimal leh khawtlang kan him zawk nan kan police-te an hah hle a, kum 2020-21 chhung hian thubuai 147 registered niin dan phal loha silai tawlh ruk 30 zet man a ni bawk a. Hei bakah hian kan khawtlang nun tichhia a, kan ?halaite suattu Heroin leh Ganja eng emaw zat man a ni. State border leh quarantine centre hrang hranga duty police - te hian lawmthu sawiin abik takin ramria duty- te an tha te tichak a, kan theihna zawn apianga thawhpui turin kalkhawmte a sawm bawk. Kan hriat ?heuh angin tun hnaiah ramri buaina kan tawk zing hle a, nikum October ni 9 khan Karimganj District atanga Officials lo kalte chu Thinghlun area-ah lo lutin kan thlai leh thlamte an ti chhia a. Rang takin 4th IR Battalion te tirh nghal an ni a, buaina punlun zel tur thelh mih a ni a, Tin 93rd Bn, BSF Company khat, a hmuna awmchilh tura tihte pawh an ?angkai hle a ni. Hei bakah hian Tripura nena kan inrinna Zampui leh thaidawr chhehvel buaina thleng thei pawh rang taka kan police-te an thlen nghal avangin buaina nasa thleng thei pumpelh a ni bawk a. Kan ram humhimna kawnga kan police-te hnathawh a chhuanawm hle a ni a ti.

District Child Protection Unit Mamit District chuan kum 2012 atang khan nasa takin hma an laba, institutional care hnuaiah Joshua Children Home leh Buannel Home- te awmin adoption buaipui tur Emau Specialised Adoption Agency leh Mamit Observation Home- te a awm bawk a. Hei bakah hian Foster Care leh Sponsorship kaltlanga naupang chhawmdawlna hna thawh mek zel a ni bawk. DCPU, Mamita thawktute hian programme hrang hrang sensitization, Counseling, kawngkam Library leh Child Friendly Police Station thlenga hmalak a ni a. Poshan Abhiyaan leh PMMVY scheme hnuaiahte naupang chhawmdawlna tura project tha tak tak kalpui a ni bawk.

Local Administration Department chuan Mizoram Finance Commission Grant 2019-2020 1st instalment leh 2nd instalment chu Mamit District chhunga Village Council 87- te hnenah an khaw chhung theuha hmasawnna hna hrang hrang thawh nana pek chhuah a ni a. Fire and Emergency Services Mamit chuan Kum 2020-21 chhung khan ram kang vawi 11 , transformer kang vawi 1, in kang vawi 1 leh bawlhhlawh paihna kang vawi 1, a vaiin call vawi 14 an dawng a, heng kangmeite hi a vaia thelh mih niin a lawmawm hle a ni a ti.

4th IR Luangpawl hmunah hmasawnna hmel kan hmu nasa hle a, Rengdil a kan sipaite awmna tur RCC building sak mek te, Luangpawla Battalion Main building office sak mek leh Kolalian leh Zawlpuia Border Outpost sak zawh tawh te hi hmasawnna ropui tak a ni a. Hei bakah hian Battalion- te hian anmahni kutkawih ngeiin Type-II Quarter pali, sak pum loha awm chu an sa zo vek bawk a, tunah hian luah nghal vek niin heng chanchin hriatte hi a lawmawm hle a ni. Kan hriat theuh angin nikum October thlaa Bihar Legislative Assembly inthlannaahte khan duty tura tirh chhuah an ni a. Hei bakah hian ramri buainaah pawh kan hmatheh leh ralsutu ber niin an chhuanawm hle a ni a ti. Mamit District hi ramri depa awm kan nih avangin ruihhlo tawlhna luh leh chhuahna remchang tak a ni a, hemi dona kawngah hian Excise & Narcotics Dept a thawktute an hah hle thin a. Nikum April leh kumin June thla chhunga Excise and Narcotics station, Mamit District record-ah erawh tun hnaiah Mamit District chhungah zu leh ruihhlo tawlh rukna nasa takin a hluar tih a lang a. Chuti chungin khaw chhung leh khaw hrang hrang NGO leh mi thahnemngaite puihna nen, Excise & Narcotics Dept, Mamit chu kum kal ta chhunga station hna thawk tha ber zingah a tel a, a lawmawm takzet zet a ni. Kan khawtlang nuna, kan thalaite suat mektu bei let tur hian Mamit mipuite khuallian hian a sawm nghal bawk.

DIET Mamit chuan kum kal ta khan Pre Service Training Education pass chhuak eng emaw zat a neih bakah Rs. 163 lakh sengin Boys Hostel sak mek a ni a. Hei bakah hian DIET Mamit Office zauh hna sak mek a nite pawh a lawmawm hle a ni a ti bawk.

Heng a chungah tarlan bakah hian NEC fund atanga Govt. Mamit college campus chhung inkalpawhna siam that hna te, nikum August thla Bethel venga Judicial Officer Residential Quarter hawn a ni te, District Panchayat Resource Centre-a thawktu hrang hrang vawi eng emaw zat training pek an ni te, Economics & Statistics Department, Transport, Taxation leh Land Revenue & Settlement Department atanga sawrkar sum bawma revenue eng emaw zat hmuh a ni te, Khadi and Village Industries, State Bank of India leh Mizoram Cooperative-te'n scheme leh project hrang hrang hmanga hmasawnna hna eng emawzat thawh a ni te, Sports lamah pawh infrastructure hrang hrang Sports School, Athletic stadium, Multipurpose indoor stadium sak leh Mamit playground cheithat mek te chu hun rei lo teah zawh thuai beisei a nih thu a sawi bawk.

Khuallian chuan hripui leng meka kan himna leh damna tura chhun leh zan zawma rim taka hnathawktu - Doctor, Nurse leh Healthcare Workers zawng zawngte zahna chibai a buk nawn leh a. Hrileng avanga kan inkharkhip laia ei tur kan tlakchham loh nana kut hnathawktute thil phalna te, sum leh hlawkna um lova a mamawhtute tana an thawhrim rah phal taka pe thin tute kan chawimawi a, mipui himna tura sawrkarin inkaihhruaina a tihchhuah thin te tha taka zawm tlan a nih theih na atana - Task force te, khawtlang hruaitute, tlawmngai pawlte, Covid-19 volunteer te leh Kohhran hruaitute thawhrimna leh hlawhtlinnaah lawmthu a sawi a. Vawiina kan lawm mek zalenna champha hian mitin nunah a tharin zalenna dar khawng ri leh se, kan tih apianga Pathian rawn chung zela Mamit District mipuite zalenna dik tak hnuaia hmasawnna kawng zawh zel tura duhsakna hlan chungin a sawm a ni.

Vawiina India ramin zalenna a hmuh champha Mamit-a lawmna hunah hian hrileng avanga March Pass Contingent neih a rem loh avangin Guard of Honour 4th IR Battalion te chuan an pe a, Commander hi SI. Satya Prakash Singh a ni. Hei bakah hian Ayushman Bharat Pradhan Mantri Jan Arogya Yojana (AB PM-JAY) hnuaia titha lawmman Mamit District Hospital hnenah khuallian hian a hlan bawk.

Khuallian hian District Hospital Mamit, District Jail bakah khawpui chhunga Home hrang hrangte tlawhin thilpek a hlan bawk a ni.

Pu Lalrinliana Sailo, Speaker hi Er. H. Lalzirliana, Mamit bialtu MLA chuan a tawiawm a ni.

Attachment

  • Loading attachment...