No.1856/2021-2022

Lawngtlai, Thlazing ni 15, 2021: India ramin zalenna a hmuh ni, Independence Day vawi 75-na chu ram chhung hmun dangte rualin vawiin khan Lawngtlaiah pawh urhsun takin lawm a ni a. A lawmna pui ber Central YLA Playground-a buatsaihah Lawngtlai East bialtu MLA, Agriculture Development Board Vice Chairman Pu H. Biakzaua chu Khuallian a ni.

Zing ni chhuah rualin sawrkar pisa leh hmun pawimawh dangah te India hnam puanzar zar a ni a. Zing dar 8:00-ah CYLA Playground-ah Khuallianin hnam puanzar pawt pharhin, zahna chibai a buk a, Independence Day thuchah a sawi nghal a ni.

Khuallian Pu H. Biakzaua chuan pung khawmte leh Lawngtlai District mipuite chu zalenna chibai bukin, India ramin zalenna a hmuh theih nana beitu hnam pasalthate zahna chibai buk thar tur leh ram leh hnam tana an inpumpekna leh hmangaihna thinlung chhuanawm tak entawn theuh turin a sawm a. Zalenna chu hmasawnna rahbi pawimawh tak a nih thu sawiin, zalenna hnuaiah sawrkar chuan Lawngtlai District hmasawn nan pawh theih tawpin hma a la mek zel a ni, a ti.

Khuallian chuan COVID-19 vanga Lawngtlai District-ah vanduaithlak taka nunna chan eng emaw zat an awm ta chu pawi a tih thu leh an chhungte a tuarpui thu a sawi a. Hri kai leh vei mekte pawh dam thuai tura duhsakna hlanin, COVID-19 chungchanga ral hma tawnga awm, hriselna lam hna thawktu zawng zawng te, police, kohhran, VC, NGO, VLTF leh mipuite thawh rimna leh thu awihnaah lawm thu a sawi a. Hma lam hunah hri leng do hneh ngei tura tan la thar turin District mipuite a fuih thar bawk a ni.

Khuallian chuan Lawngtlai District-ah District Administration leh District Council te'n thawh hona tha tak an neih thu a sawi a. LADC hnuaia hmasawnna hna thawh hrang hrang zingah NLCPR atangin kum 2020-21 chhungin sikul building 10 sak a nih thu te, Excluded Area Grant Fund leh NEC atanga sum hmuh hmanga hmasawnna hna eng emaw zat thawh a nih thu leh Lawngtlaia ran vulh tana ultrasound machine hmasa ber leh awm chhun chu LADC AH&Vety Department-in LADC Complex-ah an bun thu te a sawi.

Khuallian chuan January ni 19, 2021 atangin Lawngtlai District-ah COVID-19 hri danna (vaccine), Covishield pek chhuah tan a nih thu sawiin, August ni 12, 2021 thlengin hri danna (dose 2) la kim tawh mi 9,891 awmin, dose 1 la tawh, dose 2-na lak hmabak mi 27,877 an awm thu a sawi a. A zavaia Lawngtlai District chhunga COVID-19 hri danna pek chhuah tawh zat chu dose 47,659 a nih thu a sawi.

Khuallian chuan District mipuite hrisel nana Health Department hma lakna fakin, District Hospital Lawngtlai building thar luah a nih tawh thu te, Sangau PHC building sak zawh a nih tawh thu leh Bualpui 'NG' PHC building leh Quarters pakhat sak mek a nih thu a sawi a. Health worker training-na, ANM School-in Mizoram Nursing Council exam-a result tha tak an nei thin leh faina kawnga lawmman dawng khawpa hma an la tha thin chu fakawm a tih thu sawiin, an hostel building vertical extension tih mek chu luah theiha peih fel tep a nih tawh thu a sawi bawk.

Khuallian chuan District ralmuan nana thawktu District Police-te hma lakna fakin, mipui thlamuantu leh venghimtute an nih thu a sawi a. Zirna kawnga hma laknaah, NABARD sum atangin Govt Modern H/S Lungtian sak zawh a nih tawh thu te, Govt Region HSS Lawngtlai sak thatna tur sanction a nih tawh thu te, Govt Blue Mountain H/S Sangau leh Govt Lai H/S Vawmbuk additional classroom sak zawh a nih tawh thu te, Samagra Shiksha hnuaiah DIET Lawngtlai building horizontal extension leh hostel sak hna thawh mek a nih thu te, Sangau HSS upgrade a nih thu leh Bualpui 'NG' HSS pawh upgrade tura approval hmuh a nih tawh thu te a sawi.

Khuallian chuan MGNREGA hnuaiah Lawngtlai District-ah job card 35,237 a awm mek thu leh kum 2021-22 sawrkar kum kal mekah ni 35 inhlawhna siam a nih tawh thu a sawi a. PMAY-G hnuaiah thingtlang mi chhungkaw 2,622 hnenah in sak tanpuina pek a nih tawh thu leh kum 2021-22 chhungin chhungkaw 3,755 hnenah tanpuina pe leh tura ruahman a nih thu a sawi.

Khuallian chuan kum 2021 January atanga July thla chhungin Lawngtlai District-ah nau piang 1,333 leh mitthi 216 chhinchhiah a nih thu te, Lawngtlai District-ah ration card 19,515 (AAY - 2,304; PHH - 9,213; Non-NFSA 7,998) a awm thu leh kum 2021 August ni 7 thlengin Lawngtlai District-ah lirthei 7,905 chhinchhiah a nih tawh thu te a sawi a. KMMTTP kawngpui KM 87.180-a thui sial mekah hna 95.7% zawh a nih tawh thu sawiin, Agriculture hma laknaah RIDF hnuaiah Lawngtlai District-ah leilet hectare 50-a zau siam hna thawh mek a nih thu leh Cheuralah alu quintal 200 chintir ni a, an seng tep tawh thu a sawi bawk.

Lawngtlaiah Legal Metrology Department dah thar a nih thu leh an office pawh hawn thuai tum a nih thu sawiin, Khuallian chuan PMJVK hnuaia sports infrastructure atana hma lakna tur project siamte a hlawhtlin nual avangin Lawngtlai District chuan sports infrastructure-ah hma a sawn ngei dawn a ni tih a sawi.

Khuallian chuan tlawmngai pawl, kohhran, thu thar theh darhtu leh mipuite'n District hma sawnna atana district administration leh sawrkar department hrang hrang an thawhpui thinnaah lawm thu sawiin, la thawhpui leh zel turin a ngen zui bawk a ni.

Kumina Independence Day lawmna hi COVID-19 hri leng avangin kum dang angin hman theih a ni lo va. Sawrkarin a ruahman angin sikul naupang leh mipui nawlpui tel lova hun hman a ni a. Hei vang hian Lawngtlaia Independence Day 2021 lawmnaah pawh hian guard of honour petu Mizoram Police contingent khat chauh awmin, ceremonial parade neih a ni lo.

Independence Day 2021 pual hian a hnuaia mi ang hian chawimawina leh lawmman hrang hrang sem a ni a, Khuallian Pu H. Biakzaua chuan a dawngtute kutah a hlan hlawm a ni.

1. HSSLC 2021 Toppers:
1) Jeffrey H. Lalhriatrenga, Lungtian,
(Commerce Stream-a 3-na)

2) Lalthanzami, Mualbu 'L',
(Arts Stream-a 4-na)

2. AB PM-JAY hnuaia Lawngtlai District chhunga damdawi in tha chawimawina:
1) Public Hospital - District Hospital Lawngtlai

2) Private Hospital - Lairam Christian Medical Centre & Hospital, Lawngtlai

3. Independence Day 2021 parade commander - SI (AB) K. Lallianuka, 2nd Bn MAP, Lawngtlai

Vawiina Lawngtlaia Independence Day lawmnaah hian Lawngtlai West bialtu MLA Pu C. Ngunlianchunga, Lawngtlai Bawrhsap Dr Andrew H. Vanlaldika, LADC CEM Pu Manghmung Chinzah, LADC Chairman Pu V. Zirsanga leh Lawngtlai SP Pu BKS Singh te bakah, LADC-a member eng emaw zat, state leh LADC official-te, ex-servicemen te, tlawmngai pawl ai awhte leh lawmman dawngtute an tel a. COVID-19 hri leng avangin kum danga neih thin VIP At Home erawh buatsaih a ni lo.

Kumin Independence Day pual hian Lawngtlai District Independence Day Celebration Committee chuan District Hospital Lawngtlai, Christian Hospital Lawngtlai, Lairam Christian Medical Centre & Hospital, Lairam Motherless Home, District Jail leh Covid Care Centre, Thingkah-ah te tanpuina Rs 2,000/- theuh an hlan a ni.

Attachment

  • Loading attachment...