Thian duhtak te u,

Vawiin India ram Independence Day vawi 79-naah hian Champhai District mipuite leh ram puma India khua leh tui zawng zawngte chibai ka buk a che u.

He hun ropui tak in zinga ka hmang thei hi ka lawm hle a, he hun hman a nih theih nana in inbuatsaihna leh in thawhrimna avangin lawmthu ka sawi a ni.

He hun lawmawm tak kan hman theih chhan hi kan ram tana zalenna sualchhuaktu huaisen tak tak te, harsatna leh natna dawn lova mipuite tana inpe te kha an ni a. Vawiin niah hian kan zavaiin an hnenah lawmthu a tharin sawi ila, zahna chibai I buk thar ang u.

Champhai District mipui te leh Independence Day lawmtu ram mipui zawng zawng te vawiinah hian ngen duh che u ka nei a. Ruihhlo lakah inthiarfihlim ula, vawikhat tihchhin loh hi damna a ni tih i hre reng ang u. Kan ram run mek tu ruihhlo dona kawngah kan zavaiin tangrual ila, kan zoram hi a lo dam a, kan hnam a lo him zel nan theihtawp i chhuah zel ang u.

India ram hian hma nasa takin kan sawn mek zel a, kum 1947 a zalenna kan neih khan ram rethei leh harsa tak mai kan ni a, amaherawhchu, vawiinah chuan ram hmasawn chak ber leh changkang ber pawl kan lo ni ta. Sawrkar hruaitute hna thawh that zarah leh mipuite tawiawmna zarah hriselna kawngah te, zirna kawngah te, eizawnna kawngah te leh thil dang tam takah India ram hian hma a sawn zel a, khawvel pum huapah pawh India ram hi a langsar em em tawh a ni.

Chutiang chuan Champhai District-ah pawh hian mipuite hamthatna atan hmalakna pawimawh tam tak a awm tawh a. Heng hmasawnna hna thawh mek te leh hmachhawp awm mek langsar zual te hi vawiinah hian tarlan ka duh a.

* Champhai Bawrhsap Pisa chuan mipuite hmasawnna tur leh sawrkar department hrang hrang te hmalakna khaikhawmtu ni turin theihtawp a chhuah zel a. Khuarel chhiatna tawk tu te chhawmdawl nan chhinchhiah theih chinah cheng nuai 31.33 (Rs 31,33,000) a seng tawh a. Sawrkar laipuiin Tribal te hamthatna tura a duan DAJGUA scheme hnuaiah khaw pariatah department hrang hrang te nen tanghoin inzirtirna hun a buatsaih a, he scheme hnuaiah vek hian khaw hrang hranga sikul leh hostel-te chei leh sak thatna tur project cheng vaibelchhe 10.69 man State Level Executive Committee hnenah a thehlut a. Tribal Multipurpose Marketing Center khaw panga a sakna turin cheng nuai 500 man ruahmanna thehluh a ni bawk. Hei bakah hian Article 275 (1) hnuaiah hmasawnna hna hrang hrang kalpuina turin cheng vaibelchhe 18.98 man ruahmanna thehluh tawh a ni bawk. Thalaite nun suat mek tu ruihhlo do kawngah pawh theihtawp chhuaha hmalak mek zel a ni a, June ni 26 khan International Day Against Drugs Abuse and Illicit Trafficking denchhenin sawrkar department, tlawmngai pawl leh zirna in te nen tangkawpin Walkathon hlawhtling tak a buatsaih bawk a ni.

* Mizoram sawrkar chuan kuthnathawktute leh mahni kutkawiha eizawng te tan ‘Handholding Scheme: Ban a Kaih’ chu chak takin a kalpui mek zel a. Champhai District-ah pawh Bawrhsap pisa kaihhruaina hnuaiah line department hrang hrang ten chak takin hma an la mek a. Pilot Phase hnuaiah Progress Partner 41 thlan an ni tawh a, Chief Minister Special Package hnuaiah Progress Partner 96 ( Agriculture 26, C&I 28, Fisheries 28, LRS&WC 2, Sericulture 2 leh UD&PA Department-ah 1) awmin, an zavai hian training pek an ni tawh a, pawisa pawh pek chhuah tawh a ni.

* District Agriculture Marketing Committee hnuaiah thlai thar lakkhawmna hmun – Secondary Collection Center 10 buatsaih a ni a. Sawhthing lak khawm thawhkhatnaah quintal 13,286.8 lakkhawm niin, cheng vaibelchhe 6.6 (Rs 6,64,34,318) chu kuthnathawktute account-ah pek chhuah a ni tawh a. Sawhthing lak thawhhnihna ah hian July ni 15 thleng khan quintal 73,342 lak khawm a ni a, cheng vaibelchhe 27.47 (Rs 27,47,52,267) hmuhchhuah beisei a ni.

* Champhai District Hospital hian Mizoram Universal Health Care Scheme (MUHCS) hnuaiah hian damlo mi 943 an enkawl tawh a, damlo bill cheng nuai 30.28 (Rs 30,28,873) pek chhuah tawh a ni. August thla chhung hian la inziaklut hman lo te tan Grace Period hawn mek a ni a, mipuite inziaklut zel turin ka sawm a che u. District Hospital-ah hian a tumkhatna atan - Orthopaedic Surgeon (ruh lam thiam Doctor) leh Radiation Oncologist (Cancer Doctor) te dah thar an ni a. Champhai tan hriselna kawnga mel lung pawimawh leh chhinchhiahtlak tak niin ka hria. Tunah hian khum 50 awmna Critical Care Block leh Integrated Public Health Laboratory-te sak mek a ni bawk.

* Champhai District a lo ralmuan theih nan Superintendent of Police Champhai kaihhruaina hnuaiah Champhai District Executive Force te chuan theihtawpin hna an thawk a. August 2024 atanga August 2025 chhung hian heroin kg 33.63, methamphetamine kg 683.92, crystal meth kg 5.17 leh caffeine kg 3000 te an man a, heng kaihhnawiah hian case 144 ziah luh niin, mi 173 leh motor 65 man a ni. Silai leh a mu kaihhnawihah case 4 ziak lutin mi 3 an man a. Mizoram Liquor Prohibition Act hnuaiah zu leh a kaihhnawihah mi 27 man an ni a, zu man zawng zawng hlutna hi cheng nuai 92.64 (Rs 92,64,590) ni a chhut a ni. He mi hun chhung vek hian Champhai District Police te hian pawisa lem kaihhnawihah case pahnih ziak lutin mi pahnih an man a. Dan phal loha puak thei thil kawl leh tawlh ruk thubuai pariatah mi sawm man an ni a. Heng puak thei thil man hlut zawng hi cheng vaibelchhe 1.89 (Rs. 1,89,55,500) ni a chhut a ni. Ram dang mi (foreigner) dan bawhchhia 60 man niin, an zavai hian Myanmar lam mi an ni.

* Excise & Narcotics Department chuan August 2024 atanga August 2025 inkarah hian heroin kg 12.317 leh methamphetamine kg 25.653 an man a, rakzu leh BEDC litre 4,271 leh beer can 8,303 an man bawk. Heng an thil man kaihhnawihah hian thubuai 315 ziah luh niin, inhnamhnawih mi 300 man an ni bawk.

* Champhai Forest Division chuan Bethel Vengah Conservator of Forest Auditorium an sa zo tawh a. Zotlang hmun hluiah Botanical Garden din tumin theihtawpin hma an la mek a. National Mission for Himalayan Studies hnuaiah Nature Learning Centre kalpuiin, zirlai naupang leh tlawmngai pawl te tan training leh workshop tum engemawzat an lo buatsaih tawh a ni. Ramhmul damdawi te ching pung a, kan neih sa te pawh humhim turin - Medicinal plants project pahnih, Responsible Antibiotics Manufacturing Platform (RAMP) leh Medicinal Plants Conservation and Development Areas (MPCDA) te kalpui mek a ni a. Dan lo a ramsa lakluh te dahkhawmna hmun tur ‘Satellite Wildlife Rescue Centre’ chu Tlangsamah buatsaih mek a ni bawk. North Eastern Council kaltlangin ‘Afforestation of Denuded Hills in Champhai District’ project hnuaiah ramngaw chereu tawh te thuam that mek a ni a. Forest Survey of India report hnuhnung bera tarlan anih danin, Champhai District chhunga ramngaw zau zawng hi sq. km 86.69 in a pung a, hei hi thil lawmawm leh chhinchhiahtlak tak a niin ka hria.

* Fisheries Department chuan sangha khawitu ten lei rem an rah theih nan theihtawp chhuahin hma a la mek a. Pradhan Mantri Matsya Sampada Yojana Scheme (PMMSY) hnuaiah buh hmuna sangha khawi (paddy cum fish culture) na atan te, sangha dil thar siamna atan te leh sangha chi inthlahpunna tur hmun siamna atan te kuthnathawktu te hnenah tanpuina sum fai a pe chhuak thin a. Kum 2024-25 chhung khan sangha dil thar siamna atan kuthnathawktu mi 20 te hnenah tanpuina cheng sing kua zasarih sawmhnih (Rs 90,720) theuh an pe chhuak a ni. National Fisheries Development Board hnuaiah sangha khawitute pualin inzirtirna (Awareness Campaign leh Training) buatsaih thin a ni a. Mizoram State Rural Livelihood Mission (MzSRLM) nen tangkawpin Self Help Group hmeichhia mi 18-te hnenah sangha atanga ei siam dan inzirtina an buatsaih bawk a ni.

* Sericulture Department hmalaknain Champhai District chhungah pangang khawi chhungkua 217 an awm mek a, anni hian September 2024-July 2025 chhung hian silk la zai kg 875.59 an thar chhuak tawh a ni. Silk Samagra-2 Project ‘Sustainable Livelihood through Ericulture in East Mizoram’ hnuaiah chhungkua 142 enkawl mek an ni a, ‘Augmentation of Muga-culture in Mizoram’ hnuaiah chhungkua 25 enkawl mek an ni bawk. Ni za Inhlawhna nen tangkawpin khaw pathum – Khawbung, Ngur leh Dilkawnah te pangang khawitute tui lakna tur siam a ni a. EF&CC te nen tangkawpin Bul Nursey siam a ni a, SELCO Foundation te nena thawhhona kaltlangin pangang khawitu chhungkua 51 te hnenah solar light pek chhuah a ni bawk.

* Land Resources, Soil & Water Conservation Department chuan Springshed Development Work kaltlangin Tlangsamah tuihna tihpun hna a thawk mek a. N. Khawbung-ah lei chung hang luang ral tur ven hna - Soil Conservation Work hna thawk mekin check dam te, bench terrace te an siam bawk. Hei bakah hian mipuite nitin khawsak chawisanna (socio-economic uplifting) chak takin an kalpui mek bawk a; balhla chin te, vawk leh ar vulh kawnga hma an lak nan chhungkaw 71 te hnenah tanpuina a pe bawk a ni.

* Agriculture Department chuan National Food Security Mission hnuaiah vaimin chi tha kg 750 leh buh chi tha kg 40 an sem chhuak tawh a. District chhunga lei that dan zirchianna neih mekah - Soil Health Card 2,770 an pe chhuak tawh bawk. Rainfed Area Development Scheme hnuaiah Tlangsam leh Tualchenga kuthnathawktute chhawmdawl hna thawh a ni a, he scheme kaltlang hian chhungkaw 40 hnenah cheng sing thum (Rs. 30,000) theuh pek niin, a vaiin cheng nuai 12 pek chhuah tawh a ni. RKVY Sub Mission on Agricultural Mechanization (SMAM) kaltlangin District huamchhunga zau 9 ten tractor an hman theih nan hmalak a ni a. PM KISAN Instalment vawi 20-na August ni 2, 2025 a pek chhuahah, District chhunga loneitu chhungkua 11,078 ten tanpuina an dawng bawk a ni.

* Horticulture Department hmalaknain kum 2025 chhung hian Champhai District-ah zikhlum quintal 5,880 thar chhuah tawh niin, cheng vaibelchhe 2.02 (Rs 2,02,25,000) hmuhchhuah a ni a. Mizo hmarchate quintal 5,852 thar chhuah atangin cheng nuai 22.82 hmuhchhuah a ni a, grape quintal 1894.86 thar chhuah atangin cheng nuai 1.13 hmuhchuah a ni a; serthlum quintal 2,336.40 thar chhuah atangin cheng nuai 23.3 (Rs 23,36,400) hmuhchuah a ni bawk. Kuthnathawktu ten huan thlai tha zawk an neih theih nan thal laia thlai tui pekna tur - drip irrigation, sprinkler irrigation leh Micro-Irrigation fitting-te hmun engemaw zatah bun tawh a ni a. AES of Passion Fruit MIDH Special Intervention Scheme kaltlangin ram hectare 150 a zauah Sapthei ching tura hmalak mek a ni a. Tlangsamah Solar Dryer 14 bun fel tawh niin, a vawikhatna atan Farmgate Agro Processing ten sawhthing zai lep pho ro nan enchhinna ‘trial run’ an kalpui mek a, Grape leh Zikhlum dahna tur Solar Cold Room Tlangsam leh Samthangah te bun fel tawh a ni bawk.

* AH & Vety Department chuan Champhai District huamchhunga ASF vawk hri avanga vawk thi (suat) chhungkua 652 te hnenah zangnadawmna Direct Benefit Transfer (DBT) hmangin cheng vaibelchhe 1.13 (Rs 1,13,36,450) a pe chhuak tawh a. Hei bakah hian African Swine Fever chu State Disaster a puan anih tak avangin, Village Council te nen tangkawpin khua/veng tina vawk awm zawng zawng te chhinchhiah hna thawh a ni a, thla thum dan zelah ennawn thin a ni. AH & Vety Department hian Animal Vaccination cum Animal Health Campaign chu Bungzung, Khuangthing leh Selamah te an buatsaih a, District chhunga khua/ veng zawng zawngah ran natna hrang hrang CSF, FMD leh PPR laka invenna beihpui (vaccination drive) an kalpui bawk a ni.

* Rural Development Department chuan MGNREGA (ni 100 inhlawhna) hnuaia job card nei mi 18,697 te tan tun sawrkar kum kal mekah hian ni 36 inhlawhna an siam sak tawh a. Pradhan Mantri Awas Yojana-Grameen (PMAY-G) 1.0 hnuaiah chhungkaw 613 te tan chenna in sak tura ruahman niin, in 554 sak zawh tawh a ni a. PMAY-G 2.0 kalpui turin inbuatsaihna kalpui mek zel a ni a, survey zawh fel tawh a ni a, chhungkaw 1,643 te in sak sak turin ruahmanna kalpui mek a ni. Kuthnathawktu ten hnianghnar zawka tui an neih theih nan Champhai District chhunga khaw pali - Ngur, North Khawbung, Khankawn leh Farkawnah te Pradhan Mantri Krishi Sinchayee Yojana (PMKSY) kaltlangin hma chak taka lak mek a ni a. Tun dinhmunah hna za zela 75% thawh zawh a ni tawh a ni.

* District Local Adminstration Office chuan kum 2025-26 chhung hian District chhunga Village Council 62-te hnenah khua leh veng chhunga hmasawnna hna thawhna tur - 15th Finance Commission grant cheng vaibelchhe 6.26 (Rs 6,26,24,000) an pe chhuak tawh a. Panchayat Bhavan sakna turin VC pasarih – Dilkawn, Electric Veng, Champhai Vengthar, Leithum, Vaphai, Dungtlang leh Samthang ten cheng nuai 20 theuh an dawng tawh bawk a ni.

* UD&PA Department chuan Champhai khawpuiin faina kawnga hma a sawn theih nan hma nasa takin a la mek zel a. Bawlhhlawh mumal zawka thliar anih theih nan Mualkawi-ah Solid Waste Management Centre din turin hmalakna chak takin a kal mek a, tunah hian Composting Shed leh Dry Waste Processing Shed sak zawh tawh niin Bawlhhlawh sawngbawlna khawl bun tura ruahmanna kalpui mek a ni. National Urban Livelihood Mission hnuaiah khawpui chhung Park 3 – Rohmingthanga Recreation Centre, Bethel YMA Park leh Sub-Hqrs YMA Park, Zion Veng te cheithat a ni a. Housing for All – Pradhan Mantri Awas Yojana (PMAY 1.0) hnuaiah chhungkaw 2502 te chenna tur in sak zawh tawh a ni a, PMAY 2.0 hnuaiah chhungkaw 128 te tan chenna in sak tuma hmalakna kalpui mek a ni bawk. Champhai Truck Terminal, Ruantlang ami chu sak zawh thawkhat tawh a ni a, hman theiha peihfel thuai beisei a ni.

* PWD Department chuan Pradhan Mantri Gram Sadak Yojana (PMGSY) scheme hmangin kilometer 16.97 a thui Khuangleng-Sesih-Lianpui kawng leh kilometer 14.17 a thui Champhai-Hmunhmeltha-N. Khawbung kawng te chu thawm that hna an thawk mek a. Tuipui khua atanga NH-06 (New Eden) panna kawng siam hna thawk mekin, he kawngin Tuimuk lui a kanna-ah Bailey Bridge an dawh mek bawk a ni. PWD Department hian SASCI hnuaiah cheng vaibelchhe sawmhnih senna tur - Champhai Ring Road Phase-1 sial hna leh cheng vaibelchhe 12 senna tur Khankawn atanga Champhai khawpui luhna kawng tihzauh hna thawk tan turin hma an la mek bawk a ni.

* PHE Department hian NABARD-RIDF hnuaiah Farkawn Water Supply Scheme (WSS) sak hna chu zo tawhin, Ruantlang Water Supply Scheme (WSS) hi nakum November-a zawh hman tumin hma chak takin hma an la mek a. Swachh Bharat Mission - Grameen hnuaiah mimal inah inthiarna 100 siamin vantlang tan Community Sanitary Complex sak a ni bawk. AMRUT 2.0 hnuaiah Greater Champhai Water Supply Scheme siamthat hna an thawk mek bawk a ni.

* P&E Department hmalaknain Tuipui Small Hydel Project atangin May 2024 atanga November 2024 thleng khan Power 412.437 Mega-Watt Hour (mWH) tharchhuah a ni a. Rooftop Solar Scheme tia hriat lar, PM Surya Ghar hnuaiah dilna 12 a lut tawh a. Kum 2024-25 chhung khan eng chhit man atangin cheng vaibelchhe 18.8 (Rs. 18,80,80,801) hmuh chhuah a ni a, kumin June thla thleng hian cheng vaibelchhe 6.13 (Rs 6,13,00,179) hmuhchhuah tawh a ni bawk.

* Irrigation & Water Resources Department chuan Minor Irrigation Scheme hnuaiah project hrang hrang sawmruk (60) a thawk zo tawh a, National Hydrology Project hnuaiah Vaphai leh Hnahlanah te Automatic Rain Gauge bun fel tawh niin, Tuipuiah Automatic Water Level Recorder leh Champhaiah Automatic Weather Station a bun fel tawh bawk. Ground Water Irrigation Project hnuaiah bore hole hmun 47-ah a lai tawh a, Zotlangah Phaizau Ground Water Irrigation Project kalpuiin bore hole 20 laih a ni tawh bawk a ni.

* Taxation Department chuan Champhai Zone hnuaiah 2024-25 chhung khan chhiah cheng nuai 931.89 an khawn a, hei hi kum hmasa lama khawn chhuah aiin cheng nuai 146.24 in a tam zawk a ni. Sawrkar kum kal mekah hian thla 3 chhungin chhiah cheng nuai 661.54 khawn chhuah tawh niin, hei hi Champhai Zone target cheng nuai 956.60 atanga chhutin 68.51% zet a tling tawh a. September 2024 atanga Tuialhthei man atanga cess lak a nih tan atangin Road Maintenance Cess-ah leh Social Infrastructure & Services Cess-ah cheng nuai 41 ve ve hmuhchhuah tawh a ni bawk.

* District Civil Supply Office chuan Champhai District chhunga National Food Security Act (NFSA) hnuaia card nei te tan June – August 2025 chhung atan buhfai a sem chhuak tawh a. Antyodaya Anna Yojana (AAY) leh Priority Household (PHH) card nei te tan Ration Card leh Aadhar Card thlunzawm fel tawh a ni. Mipui ten ration buk dik tak an chan theih nan retailer zawng zawngah epos (electronic point of sale) machine leh bukna khawl (digital weighing scale) te pek chhuah tawh a ni.

* Legal Metrology Office chuan mipui ten kan chanvo – thil buk dik leh teh tling kan hmuh theih nan hma nasa takin an la mek zel a. Dan bawhchhia te pawisa chawi tling khawm hi cheng sing nga sangkhat (Rs. 51,000) niin, verification leh stamping fee atangin cheng nuai hnih, singkhat leh sangriat (Rs. 2,18,975) a hmu chhuak bawk. Dan lova cigarette lak luh (Contraband) carton 7,500 man a ni a, tuialhthei phur lirthei (tanker) 920 endikin eirawngbawlna gas phur lirthei (LPG truck) 228 a endik bawk.

* Commerce & Industries Department chuan SASCI hnuaiah Infrastructure Development for Border Trade Facilitation, Zokhawthar chu kalpui mekin, tun dinhmunah hian hna thawh zawh thawkhat tawh a ni a. Prime Ministers Employment Generation Programme (PMEGP), Pradhan Mantri Formalisation of Micro Food Processing Enterprises (PMFME) leh PM Vishwakarma Scheme kaltlangin kuthnathawktu leh mahni kutkawiha eizawngte tanpui turin chak takin hma lak mek zel a ni bawk.

* Land Revenue & Settlement Department chuan kumin July thla thleng khan LSC 107, WRC LSC 1, House Pass 267, P.Patta 21, Garden P. Patta 2 leh Land Lease (Misc) 2 a pe chhuak tawh a. Ram then, neitu leh hming thlak kaihhnawih 463 chinfel a ni bawk a ni. He hun chhung hian Stamp Duty atangin cheng nuai 34.90 (Rs 34,90,770) hmuhchhuakin, Registration atangin cheng nuai 34.17 (Rs 34,17,403) hmuhchhuah a ni a. Ram kaihhnawih chhiah chi hrang hrang atangin cheng nuai 51.10 (Rs 51,10,858) hmuhchhuah a ni bawk.

* District Child Protection Unit chuan Sponsorship & Foster Care Programme kaltlangin naupang 129-te hnenah tanpuina a pe tawh a, Naupang tanpui leh venhim ngai te case 127 ching felin naupang dan kalha che te chungchang case 38 chin fel a ni bawk a ni. Champhai Observation Home leh Rose Children’s Home-a naupang awm thei zat chu 25 atangin 50 a tihpun ve ve a ni a, naupangte dikna chanvo leh hursualna lam kawnga an himna dan inzirtirna (Awareness Campaign) hi tum 65 neih zet an nei bawk a ni. Specialized Adoption Agency (SAA) kaltlangin naupang fa atana lak theih awmna tur - Rose Adoption Agency dah belh a ni a, naupang 10 thleng awm theihna tura duan a ni.

* District Social Welfare Office chuan a tumkhatna atan tar, hmeithai leh rualbanlo pension te chu Public Financial Management System (PFMS) kaltlangin a pe chhuak a. A hmutu tur ngeiin hamthatna an hmuh theih nan leh sawrkar langtlang zawk dinna kawnga hmalakna chhinchhiahtlak tak a niin ka hria. Assistance to Persons with Disabilities for Purchase/Fitting of Aids /Appliances (ADIP) leh Rashtriya Vayoshri Yojana (RVY) scheme kaltlangin kum upa te leh vohbik ten an mamawh hmanraw hrang hrang (bengdar, wheelchair etc) te pek chhuah tum mek a ni bawk.

* District Project Office (Samagra Shiksha) chuan kum 2024-25 chhung khan an hnuaia sikul pahnih - Govt. Zotlang Middle School leh Govt. PS-1 Zokhawthar Building an sa tha a Hei bakah hian sikul 15 thuam tha (major repair) in, inthiarna in 69 (mipa – 39, hmeichhia 23 leh vohbikte pual 7) an sa zo bawk a ni. PM-POSHAN hnuaiah District chhunga sikul 146-a zirlai naupang mi 10,344 te tan chhun chaw buatsaih thin a ni bawk.

* Kum 2024-25 chhung khan Government Champhai College chuan graduate thar zirlai 141 neiin, department 5 atangin University rank holder 6 an nei a ni. Mizoram University Sports Meet-ah athletics huangah medalist 1 an nei a, Pradhan Mantri Uchchatar Shiksha Abhiyan (PM-USHA) hnuaiah building sak mek a ni bawk.

* General Nursing & Midwifery School, Champhai hi kum 2023 khan din a ni a. Indian Nursing Council leh Mizoram Nursing, Council pawmpuina hmu tawhin, kum tin zirlai 20 lalut thei turin phalna pek an ni a. Mizoram Nursing Council hnuaia exam an hmachhawn hmasak berah, zirlai za zela 70% chu 1st Division-ah pass-in, top 10 a tling pahnih an nei a ni.

* DIET Champhai chuan NIELIT nen tangkawpin an zirlai te tan Computer Study Centre an hawng a. Hei bakah hian zirlai te mamawh phuhru turin hostel building sak mek a ni bawk.

* Sawrkar hmalakna ten mipuite hnen a thlen a, a dawngtu tur dik tak nen an dawn tur an dawn theih nan te, langtlang sawrkar a lo awm zel theih nan te Information & Public Relations Department chuan hma nasa takin a la a. Sawrkar kum 2024-2025 chhung khan Press Coverage tum 290 neiin, press release 347 a siam tawh a ni a. Media te nen thawhhona tha tak neiin, Social Media lamah pawh zau thei ang berin sawrkar hmalakna leh hmachhawp te hi puan zar thin a ni.

Tuna kan han tarlan tak te kha hmasawnna tlangpui chauh a ni a, tarlan loh thil dang tam tak pawh a awm tih ka sawi duh a. Mizoram sawrkar chuan Champhai leh ram mipui zawng zawng te hmasawnna atan theihtawp a chhuah zel dawn a. Hmasawnna hna thawh tawh na a sawrkar mipui ten an thawhpui tawhna zawng zawngah lawmthu ka sawi duh a, hmasawnna lo thleng mek leh lo awm leh zel turah pawh in thawhpuina leh tawiawmna ka ngen nghal bawk a ni.

Champhai District vul zel se, India ram dam reng rawh se.

Ka lawm e. Jai Hind.