Thian duh tak te u,

          Vawiin,  India ram Zalenna Ni ah hian Zoram mipui zawng zawng te chibai ka bukin duhsakna ka hlan a che u.

          Kum 72 chhung kan ram zalenna lawm tura kan lo kal khawm hian, ram dang awpbehna  atanga zalenna sual chhuak tura India ramin a beih dan leh ropui taka ding chhuak tura a kawng zawh te hre rengin  India ram zalenna atana sulsutu, hruaitu hmasa te;  ram zalenna leh a hmalam hun atana an nunna hlu tak hlantu mi huaisen kal tawhte kha kan rilru in zahna chibai i buk ang u.

          Vawiin ah hian India ram chu khawvela ram ropui leh thang duang ber pakhat niin,  tehna hrang hrang atanga thlirin khawvela ram chak leh thiltithei ber te zinga lang pha thuai tura ngaih a ni a. India ram bung tinte hian he ram chhunga chengte inpumkhatna tur te, a chakna leh hmasawnna  tur te a theihtawp chhuah hi kan mawh phurna pawimawh tak a ni.

          Vawiin ni lawmawm takah hian ram hmasawnna atana sawrkar laipui leh state sawrkarin hma an lakna kawng hrang hrangah,  tha leh zung thawh a, mipuiin sorkar hmalakna an tawiawm a ngaihna  apiangah theih tawp chhuah a, New India 2022 hmathlir ti puitling tura ram pumin chak taka  ke a pen lai hian, India ram hmun dangte ruala Mizoramin  ke a pen ve  theih nan turin thahnem ngai taka sawrkar hmalakna te tawiawm turin  Mizo mipui te  ka sawm che u a ni. He hun pawimawh tak ah hian Mizoram hma sawnna tura state sawrkar hnuaia hmalakna tlemte chauh han tarlang ila :

1.     Kum sawm kalta ah khan Mizoram  dinhmun siamtha a, mipui huapzo hmasawnna kan neih thuai theih nan beiseina sang tak nen New Land Use Policy (NLUP) kan kalpui tan a. Kum 2011 atanga hlawhtling taka kalpui NLUP leh kum 2016 atanga kalpui NEDP hmanga hma kan lakna chuan hmuh theihin ram hmel a thlak danglam a. Vawiin ah hian Mizoram chu India rama state thang duang bera chhiar tel niin state dang 3, Gujarat, Jharkhand leh Tripura te nen, kum li chhunga kan economy thanna hi 8% aiin a sang a ni. World Bank Group leh NITI Aayog buatsaih Health Index ah Mizoram chu state tenau (small states)zingah pakhatna niin ram pum huapin pahnihna kan ni a. Ziak leh chhiar thiam tam ber pahnihna state kan ni bawk.

2.     Hmasawnna ruhrel din hi New Economic Development Policy thil tum lai mu pariat zinga pakhat a ni a. Chung zingah chuan Mizoram kan hnufualna heng - kawlphetha, inkalpawhna kawng leh inbiakpawhna tih hmasawnna hi ngaih pawimawh zual a ni a. Kum 2016-2019 chhunga State Sawrkarin NEDP atana sum a dah cheng vaibelchhe 2,000.00 atanga  85% chu hmasawnna ruhrel thar din belhna leh a awmsa thawm that leh enkawl zui nan dah a ni. Mizoramah a vawi khatna atan Mizoram Economic Enclave 2018 chu April ni 6, 2018 khan buatsaih niin ram sum leh pai dinhmun siamtha tura kan hmabaka chona awm thei leh remchanna kan neih, a bik takin agriculture lamah thiamna tihpun leh thar chhuahte hmanga sumdawnna lian tham kalpui dan tur zirchianna neih a ni. ‘My Project, My NEDP - MiMIR (Mipui Mamawh Intawm Ruahmanna)’ hi NEDP hnuaia hmalakna  pawimawh tak niin mipui mamawh intawm siamna tur ruahmanna ah a chhawrtu tur mipuite an tel ve ngei theihna tura duan a ni.

Sumdawnna kawnga hmasawnna rahbi thar pawimawh tak Magnetic Mizoram Investors Summit chu Aizawlah neih a ni a. Mimal sumdawngte nena thawhhona turin Solar Energy ah cheng vaibelchhe 600.00 leh Hospitality lamah cheng vaibelchhe 1500.00 hu zet Mizoram-in a ziak a ni. Indian Film Festival chu Mizoramah pui tham taka neih a ni a, India ram hmun hrang hrang atangin film siamtu lar te an lo tel a ni. Entrepreneurship Development Scheme (EDS) chu Mizoram Entrepreneurship Development Monitoring Committee (MEDMOC) in hlawhtling takin a kalpui a. North Eastern Council (NEC) chuan NEDP hi tha a tiin hmarchhak state sorkar dang ten an entawn leh hman ve atan NEDP document-te chu a thawn darh a ni. 

3.     Hmasawnna tluantling nei turin ram chhung boruak a ralmuan a pawimawh ber a. Mizoram Police Department chu a theih ang chinah thawktu leh hmanraw changkang zawk te nen thuam that niin thawktu te pawh training chi hrang hrang pek an ni a. Tun hnaia remna leh muanna kawnga mel lung pawimawh tak pakhat chu kumin March ni 7&8-a Mizoram Sawrkar leh HPC(D) ten State Guest House a  inbiakna an neih leh chumi rah chhuah,  Inremna Thuthlung,  April ni 2, 2018 a ziah tak kha a ni a. Inremn thuthlung angin HPC (D) te chuan kumin April ni 13 khan CTI Sesawngah an ralthuamte Mizoram sorkar kutah an rawn hlan a ni. Mizoram Police chuan nikum khan Myanmar-a inkulh hel pawl mi 17 an man a. SP Crime hnuaiah Cyber Crime Cell din a ni a, thawktu 8 dah an ni a. National e-Governance Plan kaltlangin Crime and Criminal Tracking Network and Systems (CCTNS) Project chu CID Crime chuan chak takin a kalpui a. CCTNS CAS (Core Application Software)-ah Online Data Entry chu Mizoram District pariata (8)-a Police Station 39 zinga 20 ten khaihlak awm lovin an kalpui reng a ni. Kum 2017-2018 chhungin CID (SB) hnuaia Mizoram Police operation team leh police station hrang hranga thawktuten Rs.9,97,65,872.00 man hu zet ruihhlo leh dan lova bungraw lakluh an man a ni.

Mizoram Forensic Science Laboratory chu India ram laboratory te zingah online hmanga kuthnu chhuina case update reng thei awm chhun a ni a. Kum 2017-2018 chhung hian silai kah chhin na, bullet test firing room changkang tak cheng nuai 19.16 senga sak a ni.

Fire Station building leh Staff Quarters chu 13th Finance Commission sum hmangin Mamit, Serchhip leh Kolasib ah sak zawh a ni a, Mamit leh Serchhip ah te hian hawn a ni tawh a. NLCPR sum hmanga Aizawla Central Jail a Women Cell sak leh 13th Finance Commission sum hmanga Saitual Sub-Jail sak hna kal mek chu 97% thawh zawh a ni tawh a. Kumin ah hian CTI Sesawng atangin Home Guard volunteer mi 30  ten tha takin an training an pass chhuak a ni.

4.     Centrally Sponsored Scheme leh Mizoram sawrkar flagship programme NLUP/ NEDP ngawrh taka kalpui a nih avangin agriculture leh a kaihhnawih eizawnna pengah te hmasawnna tam tak a awm a. Kum ruk kalta chhung khan tlangram lo neih na hmun chu 31.37% in a tlahniam a, a chhan bulpui ber chu NLUP  a ni. NLUP/NEDP convergence thawh khatna ah mi 1500 leh,  a thawh hnihna ah mi 16,400 te chu an eizawnna atan tanpuina pek an ni a. He ruahmanna hnuaiah hian feh kawng  402.518 Km  a thui sialna tura sum dah niin kawng awm sa 487 Km a thui chu  kum tluana motor kal theih turin siam mek a ni a.  NEDP hnuaiah kum 2017-2018 chhungin Aizawl, Kolasib, Serchhip leh Mamit ah kum tluana motor kal theih kawng sialna tur sum cheng nuai 2,000.00 dah niin 60% vel hna thawh zawh tawh a ni. NEDP hnuaiah 405Ha a zau ah purun, chana hring, vaimim leh antam chinna hmun siam a ni a. Kolasib ah buh herna khawl lian - Rice Mill bunna tur buatsaih mek a ni.

National Mission on Oilseeds and Oil Palm (NMOOP) kalpui tan atangin fehkawng 87.611 Km a thui siam a ni tawh a. Oil Palm chinna hmun pawh kum 2016-2017 ah 2,502Ha atangin kum 2017-2018 tawp lamah chuan 25,923Ha. a zauvah a pung a. RKVY hmangin feh kawng 773Km a thui sial a ni tawh a. Kum 2017-2018 chhungin RKVY hnuaiah vek hian leilet (Wet Rice Cultivation) 54.5Ha a zau siam a ni a, kum 2017-2018 chhungin ram 740Ha zeta zau chu  chinai  hmanga enkawlin thlai chinna tlakah buatsaih a ni a. Kum 2015-2016 a kalpui tan, Soil Health Card Scheme Cycle-I chu thawh zawh niin soil sample 11,986 lak khawma enchhin a ni a. Cycle-II kalpui leh mek a ni.

Kum 2005 atanga kalpui tan, Centrally Sponsored Scheme - ‘ATMA’ chu district tinah kalpui a ni tawh a. MOVCD (Mission Organic Value Chain Development of North East Region) hnuaiah lei hanna chauh hmanga thlai thar chhuah certified organic products hlutna mipuiin an hriat theih nan a tih lar hna thawh a ni a. Krishi Vigyan Kendra (KVK) hnuaiah On-farm Demonstration (OFD) tum 77, Front Line Demonstration (FLD) vawi 80 leh, training programme vawi 60  neih a ni.

Kum 2017-2018 chhungin RIDF-XXI (NABARD) hnuaiah MI project 11 zawh fel niin ram 556Ha. a zauva chhungkaw 357 in a hlawkna an tel a. Kum 2018-2019 chhung hian project 5 zawhfel turin ruahman a ni bawk. PMKSY hnuaiah MI project sawmpali (14) thawh mek te chu kum kal mek 2018-2019 hian zawhfel tum a ni a. Khuaihnuai MI Project (Tlakal Zau), Sesih chei thatna tur cheng nuai 17 chu NEDP hnuaiah hmuh a ni a. MI Project 138 thawh zawh tawh chei thatna tur leh project thar 13 kalpuina tur cheng vaibelchhe 32.00 chu NEDP ah dilna thehluh a ni bawk.

5.     National Bank for Agriculture and Rural Development (NABARD) Rural Infrastructure Development Fund (RIDF) scheme hnuaiah rubber chin leh Mamit District huam chhunga ram 150Ha. chei that hna kalpui mek a ni a. Kum 2018-2019 chhung hian kum 4 chhunga thawh zawh tura ruahman, ram 220Ha zeta zauah Rubber chin tan a ni. RKVY hnuaiah thar chhuah tih pun leh lei chunglang luang ral tur venna hna hrang hrang thawh a ni a. Melriat khua atanga Tuirial inkar kea kalna concrete-a siam hna thawh mek a ni bawk.

6.     Horticulture eizawnna  lam tih hmasawnna turin kawng hrang hranga hma lak chhunzawm reng a ni a. Kum 2017-2019 chhunga Mission for Integrated Development of Horticulture (MIDH) hnuaia a hna thawh that avangin Horticulture department chu sawkar laipuiin cheng vaibelchhe 10 zet a rawn pek belh a. A tum sarihna atan kumin 5th – 8^th June chhung khan Assembly Annexe Building hnuaiah Horticulture Fair hlawhtling taka buatsaih a ni a. District tina farmer tha ber thlan chhuahte hnenah Best Farmer Award hlan a ni a, mi paruk hnenah Best Entrepreneur Award hlan a ni bawk. Centre of Excellence for Fruits chu Lungleiah March ni 7, 2018 khan hawn a ni a. He Centre hi loneitute  bakah loneitute training pe chhawng theitu tur te zirtirna hmun atan leh thlai hrisel phun tur tam zawk an neih theih nana din a ni. Kum 2017-2018 chhungin 770Ha zeta zauah dragon fruit chin hna ngawrh taka kalpui a ni a. A hunbi pangngai lova thlai thar(off-season) zikhlum leh tomato chin hna chu lian tham taka kalpui a ni bawk a, hei hian state pawn lam atanga heng thlai chawk luh hi nasa takin a ti tlem a ni. NEDP-NLUP hnuaiah  link road eng emaw zat siam a ni a; hei bakah hian loneitute te tana tui dahkhawlna zem 296 sak hna te, vantlang inhman tawm tur tuizem 11 sak hna te, thlai kung tar tawh tuai thar leh hna te, serthlum chinna hmun enkawl hna te, iskut thar chhuah tihpunna tur leh Siaha District-a Vahai khua a aieng chin hna te kalpui a ni bawk.

7.     Sawrkar-in sangha, arsa leh sa chi hrang hranga ram intodelh a ngai pawimawh a. AH&Vety Department kaltlangin thar chhuah tihpun leh ran natna ven leh enkawl na turin hma lak chhunzawm reng a ni a. Cheng nuai 321.00 senga Khatla-a Rural Epidemiological Centre sak hna chu peih fel tep a ni tawh a. Ramrikawn ah darkar tina 80MT ran chaw her chhuak thei Animal Feed Plant, cheng nuai 551.08 senga sak chu bun fel a ni a. Thenzawl-ah sial inthlah pun tirna controlled breeding programme kalpui a ni a. NEDP hnuaiah Lengpuia Arvulhna chu INDBRO Hatchery, Zoram Poultry Development Society, Tanhril atanga artui chaw lut a, mimal sumdawngte nen 50:50 intum sem a, thla tin arnote 8000 keu thei turin  buatsaih tum a ni a. Kum 2017-2018 chhungin NLUP leh NLUP-NEDP kaihkawp hnuaiah ranvulhtu mi 13,242 te tanpuina turin Rs.39,92,60,032.00 zet sem chhuah a ni.

        Sawrkar laipui hmalakna Blue Revolution leh RKVY scheme hmangin Fisheries Department hnuaiah hmasawnna ruhrel thar engemaw zat din belh a ni a. Chung zingah chuan Aizawl, Mamit, Champhai leh Serchhip district-ah sangha chi buatsaihna Carp Hatcheries siam hna te a tel a. Aizawl leh Kolasib-ah te  ice plant siam a ni a.  Serlui ‘B’ ah sangha vulhna cage pathum siam belh a ni bawk.

8.     Sericulture  eizawnna in a bik takin NLUP hnuaiah nasa takin hma a sawn a. Mizoram chu silk pangang chi (Dfls) tharchhuahah a intodelh tawh a. Mizo kutkawih silk puan, Mizo Brand Silk siama ti lar turin tan lak a ni. NERTPS hnuaiah cheng nuai 3,249.00 hu zet Integrated Sericulture Development Project chu headquarters atan Lunglei hmangin kalpui a ni a. Hei hian Hnahthial leh Lunglei block huam chhunga chhungkaw 600 lai a tuam a ni.  Cheng nuai 3,014.61 senna Intensive Bivoltine Sericulture Development Project chu NERTPS hnuaiah vek hian Champhai District chhunga Khawzawl leh Champhai Block-ah te kalpui niin beneficiary hmeichhia 1000 an awm a ni. NERTPS hnuaiah Muga Silk Development Project, cheng nuai 1,352.09 senna tur kalpui mek a ni bawk a, hei hian silk pangngang khawia eizawng mi 300 bakah a thar mi 200 a tuam a ni.

9.     March ni 30, 2018 khan Mizoram chu India rama Open Defecation Free(ODF) state 13-na ah puan a ni ta a. Thianghlimna kawnga hmalakna hrang hrang avangin kum 2019-ah chuan Mizoram hi India rama state fai ber leh, kan khawpui leh thingtlang khua te pawh mihring chenna hmun fai berah puan kan nih theih ngei kan beisei a ni. Swachh Bharat Mission hnuaia India ram pum huap district fai inelna, Swachh Survekshan Grameen-2018 chu Mizoram district zawng zawng ah kalpui mek a ni bawk.

        Tui thianghlim hnianghnar zawka in tinin an dawn theih nan PHE Department chuan in 3,337 hnenah tui connection a pe thar a. Kum 2018-2019 chhung hian NRDWP hnuaiah thingtlang khaw 54 tuam chhuak tura ruahman ah khaw pali chu tuam chhuah a ni tawh a. Khawpui lian 1 leh khawpui 22 ah te Urban Water Supply scheme hmanga tui pekah khaw 15 te chu nikhata tui litre 70 leh a aia tam pek (fully covered) an ni tawh a, khawpui dang 8 te erawh chuan PHE tuisem hi ni khatah litre 70 an la dawng pha lo a ni. Khawbung WSS chu kum 2018-2019 chhunga zawh fel tum a ni a. NIT Lengpui WSS, Sainik School Chhingchhipa tui pek leh Keilungliah-a Dam Reservoir & Development of Recreation Centre sak hna te kumin ah thawh a ni a. Vairengte WSS leh Sangau WSS Phase-II chu NEC sum hmanga thawh niin kumin chhunga puitlin hman beisei a ni.

10.   Zirna kailawn tinah zirna kalphung siam that sawrkar-in a ngai pawimawh a. Kum 2017-2018 chhung hian School Education hnuaia hmasawnna ruhrel siam nan NEDP atangin cheng vaibelchhe 10.55 dah a ni a. Zirna in leh hmunhma te chei that nan NABARD-RIDF-XXII hnuaiah cheng nuai 2,553.58 dah a ni bawk a. A tum hnihna atan February ni 5, 2018 khan Class X tan National Achievement Survey (NAS) kalpui a ni a, sawrkar leh private High School 269 ah language, mathematics, science leh social science subject ah te NAS hi neih a ni. He zirchianna hi naupang ten zirnaa hma an sawn theih nana ruahmanna, plan leh policy siam nan hman tum a ni. SSA hnuaiah hmun kilkhawr zawk atanga khawpui beltu zirlaite chenna tur hostel 12 siam a ni a; naupang rethei zualte leh zirna bansan tawh te tan Residential Special Training Centres(RSTC) hnuaiah centre 18, Non Residential Special Training Centres(NRSTC) hnuaiah centre 24 siam a ni bawk a. Naupang rualbanlo zirlai bul tan tir, a bika enkawlna mamawh te chu hmanrua a tanpuina pek an ni a. School Education, SCERT leh MBSE hmalakna te hi DDK Aizawlah Ningani zan apiangin special TV Programme hmanga puanzar thin  a ni.

        National Institute of Open Schooling (NIOS) hnuaiah kum 2017-2019 session atan D.EI.Ed online programme-ah zirtirtu 7,316 an inziak lut tawh a. Mit leh beng hriatna thalo te tan B.Ed Special Education chu kum 2018-2019 academic session chhungin chawl lova kalpui a ni a. He course bul tan tur hian Mizoram University chu provisional affiliation pek a ni a, hmar chhak state ah hetiang zirna nei thei hmasa ber kan ni.  Indian Space Research Organisation (ISRO) leh North Eastern Space Application Centre (NESAC)te chuan North East ah EDUSAT network tuaithar leh tihpuitlin nan, hmanraw mamawh te min rawn pe in tunah hian Mizoram ah Satellite Interactive Terminals (SITS) sawmnga (50) dah a ni a. District hrang hrangah SCERT leh DIET building sak zawh a ni tawh a. Mualpui-ah cheng nuai 1200.00 senna tur Aizawl College New Campus building sak hna thawh tan a ni a. MZU Southern Campus Lunglei dinna tur rawtna pawh thehluh a ni tawh.

11.   Khawvel boruak lum chakin kan chenna leilung leh a chhehvel boruak, thing leh  mau, nungchate a nghawng dan hriain National Programme hrang hrang leh Green Mizoram programme hmangin ram ngaw siam belh tur te, thing leh mau leh nungcha humhalh  a, reserve area venghim turin ngawrh takin hma lak a ni a. Ram bua 1,750Ha. zeta zau-ah National Afforestation Programme kaltlangin kum 2017-2018 chhungin thing phun belh a ni a. Intensification of Forest Management hnuaiah ram kang venna hna hrang hrang thawh nan cheng nuai 100.65 sen a ni. EF&CC Department chuan sawrkar laipui Ministry of EF&CC leh GiZ puihna in State Action Plan on Climate Change (SAPCC) ennawn hna a thawk tan a. National Adaptation Fund hnuaiah Mizoram Agriculture Department project ‘Sustainable Agriculture Development through Expansion, Enhancement and Modelling’ chu pawm a ni a, he project hi cheng vaibelchhe 10 (sawm) hmangin district pali (4)-ah kalpui a ni. Reducing Emissions from Deforestation and Forest Degradation (REDD) pilot project chu Reiek leh Ailawng ah te ICFRE, GiZ leh ICIMOD puihna a kalpui a ni a. Springshed Recharge Pilot Project pawh GiZ nena thawk hovin Sihfa khua leh a chhehvela kawr leh lui tui hna kang chat sawmhnih (20) tuai thar nan kalpui a ni bawk a. Mau hmanga eizawnna tih hmasawn nan National Bamboo Mission chu thar thawh a ni a. State Climate Change Cell kaltlangin boruak danglam zel chungchang inhril hriatna leh hmachhawn dan tur inzirtirna  kalpui a ni bawk.

12.   Sumdawnna lam chawikan na turin market  thar thahnem tak din belh bakah a awmsa te chei that hna thawh a ni a. Kum 2018-2019 chhung khan Commerce & Industries Department hnuaiah cheng nuai 45,00.00 hmangin  Aizawl City Centre, Dawrpui leh khawpui hrang hranga bazar (market yard) te sak a ni. NEC sum hmangin New Market-ah Market Building thar leh Mission Veng Bazar Complex sak hna thawh mek a ni bawk. Ministry of Commerce & Industry hnuaiah Export Development Fund (EDF) hmangin Seling-ah Mizoram Food Processing, Research and Training Centre (MFPRTC) sak a ni a; Lawngtlaiah Trade Facilitation Building Block ‘A’ sak hna leh a hmunhma chei that hna thawh zawh a ni a; AYUSH building Zemabawk-ah Food Testing Laboratory bun a ni bawk.

        Mizoram sawrkar chuan Indo-Myanmar ramri ah South East Asia ramte nena insumdawn tawnna kawng hawn a ngai pawimawh hle a, Border Haat sakna tur hmun li - Hnahlan, Zote, Vaphai (Saikhumphai) leh Sangau (Pangkhua)-ahte hmunhma thlan fel a ni tawh a. Tlabungah Trade Facilitation Centre chu sak zawh a ni a. Land Custom Station sak nan Zorinpui ah ram tih fel ni tawhin he hmun hi Kaladan Multi Modal Transit Transport Project hnuaia India ram lam atanga sumdawnna hmunpui tur a ni.

        Ram leilung hausakna hai chhuah tumin Geology & Mineral Resources Department chuan theihtawp a chhuah a. Tun ah hian Oil zawngtu company pahnih - ONGC leh OIL ten Mizoram-ah hna an thawk a. Kum 2017-2018 chhung khan mining atangin sum Rs.19,459,612.00 leh licence fee atangin Rs.43,412,002.00 Mizoram sorkar ah a lut a ni. India International Trade Fare (IITF), 2017, New Delhi a neih ah November ni 18, 2017 khan Hamsadhwani Open Theatre ah Mizoram Day hman niin Mizoram hnam ziarang pholang thei zawnga hun hman a ni.

13.   Sawrkar laipuiin mi retheite dawm kanna tur leh thingtlang khaw tih hmasawnna tur scheme hrang hrang a duan MGNREGS, NRLM, PMKSY-WDC, BADP, PMAY-G leh NLCPR te chu ngawrh taka kalpui chhunzawm a ni a.  Heng scheme hmang hian thingtlang thalaite tan hnathawh tur buatsaih sak leh eizawnna peng hrang hrang atan training te pek niin, thingtlanga chengte khawsakna dinhmun chawikang turin hmasawnna ruhrel tam tak siam thar a ni a. Mizoram chuan hmarchhak state zinga Shyama Prasad Mukherji Rurban Mission (SPMRM) kalpui tha ber lawman, Outstanding Performance Award 2017 a dawng a. State sawrkar hmalakna NEDP kaltlangin Chief Minister’s Rural Housing Scheme hnuaiah a bul tan nana district thlan chhuah Serchhip, Lawngtlai leh Saiha District-ah te mi 1,200 tanpuina pek an ni a. Tunah hian district dang zawng zawng te huamin mi 2,000 dang tanpui an ni bawk. East Lungdar, Saitual, Khawbung, Vairengte leh Aibawk-ah te Mini Sports Complex sak a ni a; Darlawnah aloe vera chinna hmun siam a ni bawk a. NEDP kaltlangin Social Education hnuaiah kum 2017-2018 chhungin Community Hall chei thatna tur cheng nuai 100 dah a ni a. RD Block pakua (9) ah Community Hall sawmhnih pali (24) sak leh thawm that hna  thawh a ni.

        NEDP Core Committee chuan cheng nuai 6663.20 chu thingtlang khuaa vantlang mamawh hmasawnna ruhrel din nan Local Administration Department (LAD) hnuaiah a dah a, hna chhi hrang hrang 2,619 thawh a ni a. Hlimen-ah Lalsavunga Park sak mek a ni bawk.

14.   Central sawrkar hnuaia ruahmanna lian tham tak tak panga (5) - Swachh Bharat Mission, National Urban Livelihood Mission (NULM), Atal Mission for Rejuvenation and Urban Transformation (AMRUT), Housing for All (Urban) leh Smart Cities Mission hmangin khawpui hmasawnna hna chak taka kalpui a ni a. Heng bakah hian Mizoram State flagship programme hnuaiah Aizawl khawpui chhunga hmasawnna atan State Sector Project  eng emaw zat thawh a ni bawk. Guest House-cum-Civil Services Club sak nan NEDP sum cheng nuai 3,000 dah a ni a. ADB sum hmangin NERCCDIP hnuaiah sum cheng vaibelchhe 698.17 hmangin  Aizawl khawpui chhung hmasawnna ruhrel pawimawh din hna chu thuang thuma thawh mek a ni a. Aizawl Municipal Corporation chuan khawpui chhunga in sak dan khuahkhirhna a kalpui atanga  in sak phalna(permission) 6,058 pek chhuah aa ni tawh a ni.

15.   Buhfai ah mipuiin harsatna an tawh loh nan FCS&CA chuan buhfai chawk luh leh rualkhai taka semdarh hna ngawrh takin a thawk a. Ration card zawng zawng computer-a chhinchhiah leh thlunzawm (digitalize) kim a ni tawh a, ration card thar siam leh pekchhuah pawh online hmanga kalpui a ni tawh. DCSO office zawng zawngah ration card leh Aadhar thlunzawm hna ngawrh taka thawh a ni a. Buhfai chhek khawlna kudam thar 65 sakna tur DPR thehluh tawh niin chak taka bawhzui a ni a. Mipui mamawh buhfai leh thildang pekchhuah hna te pawh khawl hmanga thawh vek tura hmalak mek a ni . Fair Price shop-ah department chuan e-PoS machine bun vek tumin DPR pawh sawrkar laipuiah thehluh a ni tawh a. National Food Security Act, 2013 a taka kalpui a nih atangin thla tina sawrkar sum cheng nuai 94.21 lai luang ral thin chu tih tawp a ni. Fur ruahtui tam laia thingtlang khaw kilkhawra cheng ten buhfai an tlakchham loh nan Supply Centre thlan chhuah 47-ah May atanga October thla chhung daih tur buhfai chhek ngah a ni.

        State leh UT te tana Legal Metrology ruhrel dinna tur atana ruahmanna hnuaiah sawrkar laipui atangin Aizawl-a Secondary Standard laboratory pakhat(1) sakna tur leh Aizawl, Kolasib, Hnahthial, Tlabung leh Chawngte ah te Working Standard laboratory sakna tur cheng vaibelchhe 1.60 dawn a ni a. Stamping fee atangin Rs.7,33,550 hmuh a ni a, dan bawhchhetu te hremna pawisa chawi tlingkhawm Rs. 1,84,450 hmuh a ni bawk.

16.   Cooperation kalphung tih chak na atan Mizoram Cooperative Societies Act, 2006 chu siam that turin Mizoram Legislative Assembly hmaah pharh a ni a. Sum cheng nuai 4,494.452 hmangin Mizoram chhunga district panga (5)-ah kum li (4) chhung Integrated Cooperative Development Project (ICDP) kalpui na turin ruahmanna siam a ni a. Mizoram Cooperative Apex Bank Ltd. chuan huang zauh zelin Khawzawl leh Zobawk-ah te branch thar hawn a ni a. Siaha, Lawngtlai, Lunglei leh Serchhip ah te ATM Booth thar dah a ni bawk. Mizoram State Agricultural Horticulture Forestry and Marketing Cooperative Federation Ltd. (MAHFED) hnuaiah hmunphiah hralh chhuahna tur market zirchianna neih a ni a; loneitu te inzir nan India ram hmun hrang hrang ah tirh chhuah an ni a. University a mithiamte leh Horticulture leh Agriculture department mithiamte zirtirna hnuaiah Mizoram hmun hrang hrang 9 ah Seminar on Innovative Ideas and Best Practices for Rural Working Class buatsaih a ni. Kum 2017-2018 chhunga MAHCO in a sumdawnna atanga hlep a neih chu cheng nuai 12.56 niin a sum lakluh zawng zawng chu cheng nuai 71.08 a ni a, MULCO pawhin cheng vaibelchhe 12.08 a lei chhuak a ni.   

17.   Ram hmasawnna hnuk pawimawh ber pakhat chu kawngpui tha a ni a. State Roads Project hnuaiah kawngpui 11 a zavaia belhkhawma 98Km a thui laih hna kalpui mek a ni a, kawngpui 36 kilometre 203.500 a thui blacktop hna zawh fel a ni. Cheng vaibelchhe 909.63 sengin PMGSY, NEC, NABARD leh NEDP hnuaiah kawngpui 72, kilometre 1,202 a thui siam hna thawh mek a ni bawk. MPWD Vision 2030 ang chuan Mizoram PWD hnuaia temporary bridge zawng zawng permanent bridge-a thlak vek tum a ni a, hemi atan hian CRF, NABARD leh MORT&H sum cheng vaibelchhe 137.97 sengin temporary bridge 21 chu  permanent bridge-a thlak hna thawh a ni. Kum 2017-2018 chhungin cheng vaibelchhe 507 sengin building 91 sak hna thawh a ni a, building 34 sak zawh tawh a ni a, building 57 sak mek a ni. Mizoram PWD in National Highway 11, kilometre 1,465.120 a thui a enkawl mek a. Kaladan Multi Modal Transit Transport Project a kilometre 99.83 a thui kawngpui siam hna chu March, 2019 hian zawh tum a ni. NH-44A zauh leh Lengpui Airport a Rock-fall-Area By-Pass siam hna thawh mek a ni a. World Bank hnuaiah Champhai-Zokhawthar kawngpui siamthat hna leh Tlabung-Kawrpuichhuah kawngpui siamthat hna thawh mek chu nakum February leh March thla chhung  khian zawh fel beisei a ni.     

18.   The Mizoram Goods & Services Tax Act & Rules, 2017 hnuaia chhiah lak dan thar hman a nih atangin sum hmuh hi nikum aia tam zawk tura beisei a ni a. Kum 2017-2018 chhunga chhiah lakkhawm zat chu cheng vaibelchhe 405.13 a ni a, sawrkar kum 2018-2019 chhunga lakluh tur chu kumin May thla thlenga lut chinah pawh  cheng vaibelchhe 97.93 a tling tawh a ni. New Secretariat Complex-a Commissionerate of State Tax building of Taxation Department Phase I chu sak zawh tawh a ni a, kumin June Ni 14 khan hawn a ni.

19.   Mizoram hi leimin leh lirnghing tawk their reng dinhmun ah kan awm a.  National Disaster Management Authority Scheme Aapda Mitra (Friends in disaster) hnuaiah chhiatrupna lo thlen thulh a chhanchhuah hna thawh dan tur May leh June, 2018 khan Central Training Institute, Sesawng-ah training batch hnih (2) tan neih a ni a. Sawrkar pisa, school leh khawtlangah te chhiatna thlen palha chetlak dan tur  inzirtirna te neih thin a ni a. April, 2018 khan National Management Disaster Authority (NDMA)  kaihruaina hnuaiah ‘Multi State Mock Exercise on Earthquake’ chu hlawhtling takin Aizawl, Mamit, Siaha, Lunglei, Champhai leh Serchhip-ah te neih a ni a. Aizawl District Disaster Management Authority leh Mizoram State e-Governance Society tangkawp chuan 21^st National Conference on e-Governance Hyderabad-a neihah ram pum huap hnathawk tha lawmman ‘Best District Level Initiatives’ an la a, hemi bikah hian Mizoramin award a lak vawikhatna a ni.

20.   Mi chanhai leh dinhmun harsa zawkte chawikan leh chhawmdawlna kawngah nasa takin hma lak a ni a. Mizoram State Commission for Protection of Child Rights chu February 2018 khan din a ni a. Naupang te venhim na tur atan Mizoram chhunga naupang chanhaite enkawlna in 52 chu Juvenile Justice (Care and Protection of Children) Act, 2015- hnuai ah ziah luh a ni. Naupang ten an mamawh chaw tha an dawn theih nan Nutrition Mission (Poshan Abhiyan) chu March 2018 khan kalpui tan a ni a, Mizoram Rights of Persons with Disability Rules, 2017 chu pawm a ni ta a. Accessible India Campaign (AIC) hnuaiah rualbanlo ten awlsam zawka sawrkar Pisa an dawr theih nan sawrkar pisa 23-ah rualbanlo te tan awlsamna siam sak a ni. Mizoram chhungah Unique Disability Identification (UDID) chu hman tan niin UDID card 340 pekchhuah tawh a ni a. Hnathawhna hmuna khuaikhem tawk ten an chunga thil thleng online hmanga thuneitute an hriattir zung zungna tur Sexual Harassment Electronic Box (SHe-Box) chu district hrang hrang-ah hawn niin Deputy Commissioner te chu nodal officer an ni a. Lunglei-ah One Stop Centre thar buatsaih mek a ni a. Luangmuala Old Age Home pawh lian zawka sak thatna turin NEDP hnuaiah ruahmanna siam a ni.

        Damdawi leh ruihhlo hmansual dona atan sawrkar department hrang hrang te leh tlawmngai pawl te nen tangrualin Aizawl District Bawrhsap kaihhruaina hnuaiah Project HIMNA-MADAT (Mizoram Against Drugs, Alcohol & Tobacco) chu kalpui mek a ni a. He project hmang hian naupangte hnena school leh Sunday school ah te zu, vaihlo leh ruihhlo chi hrang hrang laka fimkhurna leh dona tura inzirtirna beihpui kalpui mek a ni.

21.   Hriselna lama hmasawnna tehna ah Mizoram chu India rama state tenau te zingah pakhatna niin India ram pum huapin pahnihna a ni a. Hei hi kan zavai tan thil lawmawm leh chhuan tlak a ni. Mirethei ban phak hriselna kawnga inenkawlna hmunhma leh hmanraw tha mipui tana buatsaih sak turin NEDP, NLCPR leh NEC atanga sum hmuh hmangin district hospital te leh health centre te hmanraw changkang zawka thuam that leh tihchangtlun a ni a. District hospital te tih changtlunna turin kum 2018-2019 ah NEDP sum cheng vaibelchhe 20.00 dah a ni a; State Referral Hospital, Falkawn tan cheng vaibelchhe 20.00 dah a ni a; Lunglei Civil Hospital staff quarter sak nan cheng vaibelchhe 29.9 ruahman a ni bawk. NLCPR hnuaiah khum 100 awm theihna tur Siaha District Hospital sak hna tan thuai tur a ni a, khum 50 awmna Lawngtlai Hospital sak tan a ni tawh a. NEC hnuaiah khum 100 awmna tur Mamit Hospital sak na turin phalna hmuh a ni tawh a. Hemi bakah hian Aizawl, Siaha leh Lawngtlai-ah te trauma centre din tum mek a ni a. Mamit, Champhai, Serchhip leh Lawngtlai-ah Bio-Medical Waste Management System khawl bun mek a ni.

        National Health Programme hrang hrang te ngawrh taka kalpui chhunzawm a ni a. Hengte hian hmasawnna lawmawm tak tak a hring chhuak zel a.  Nau chunga nu thihna (Maternal Mortality Rate) leh nausen pianghlim thihna (Infant Mortality Rate)a tla hniam a. Global Tobacco Survey-2 tarlan danin puitling zingah vaihlo hmang mi za zela 67.2% chu 58.7% ah a tlahniam bawk a ni. Mizoram-in Medical college kan neih chhun leh a hmasa ber, Mizoram Institute of Medical Education & Research (MIMER) chu August ni 7 khan hawn a ni ta a. Kumin atanga academic session kalpui tan turin July thla atang khan admission kalpui a ni a. NEET UG exam result zulzuiin seat awm zinga 15% chu Non Resident Indian (NRI), 15% Central Pool leh 70% State tan ruahman a ni a. Tun dinhmunah hian State Quota hnuaiah zirlai 62, NRI quota atangin zirlai 11 leh Central quota atangin zirlai 6 in admission an tifel tawh a ni.

22.   Infiamna hmanrua leh hmunhma a hmasawnna in infiamna lamah nasa takin hmasawnna a thlen a. Kum 2017-2018 chhungin India ram pawna inelna chi hrang hrang ah Mizo infiammi ten medal 49 an dawng a, India ram chhung inelna ah medal 160 leh hmarchhak bial huap inelna ah medal 71 an dawng a ni. Infiamna lama mimal tithate hnenah Incentive Cash Award cheng nuai 173 sem chhuah a ni a. National Cadet Corps (NCC) Battalion thar cadet 3,520 awmna Lunglei-ah din a ni. Lunglei Sazaikawn-ah Mizorama Indoor Hall lian ber chu February 2018 khan hawn a ni a. April, 2018 khan Phulpuia Sports Centre leh Darlawna Multi Sports Centre for Northern Region hawn a ni bawk a. NEDP hnuaiah infiamna hmunhma chei that hna hrang hrang thawh a ni a, chungte chu-ITI Venga Aquatic Complex, Republic Playground, Venghnuai Playground, Sairang Football Field, Sports Guest House Mualpuia sak leh Vaikhawtlang public playground tihzau hna te a ni.

23.  Khualzinte hip a, Mizoram hi khawvel hmun hrang hrang atanga khualzin te tlawh chak rama siam turin nasa taka tan lak a ngai a. Tourism Department chuan tourist centre hrang hrangah hmasawnna ruhrel pawimawh te dinin khualzinte hip nan kum tin Kut leh intihhlimna hun te a buatsaih thin a. Tourist Facilities Centre awm sa 59 te bakah NEDP sum hmangin ‘Rural Homestay’ scheme kalpui a ni a. Ministry of Tourism bul tumin Swadesh Dharshan-North East Circuit hnuaia project pawimawh tak tak Integrated Development of New Eco-Tourism  leh Development of Eco-Adventure Circuit te chu Thenzawl, South Zote leh Reiek ah te kalpui a ni a. He scheme hnuaiah hian Chaltlang leh Durtlang thlun zawm tur ropeway sak mek a ni a. Tourism tih hmasawnna tura mipui inzirtirna atan YMA leh MHIP te nen thawhhona thuthlung siam a ni bawk.

24.   Mizo hnam ziarang chhawm nunna atana buatsaih,  Chapchar Kut, 2018 chu hlawhtling takin Sipai Lammual, Aizawlah March 2^nd 2018 khan lawm a ni a. A vawi khatna atan Mizo Hnahthlak International Cultural Festival, 2018 chu July Ni 5, 2018 khan buatsaih a ni bawk a, hei hian khawvel hmun hrang hranga Zofate inkarah inpumkhatna a thlen ngei beisei a ni. South Africa ram, Tswane khawpuia 10^thWorld Choir Games buatsaih ah India ram aiawh a tel, Mizo Cardinal Choir te chuan lawmman pahnihna, silver medal an dawng a. Nikum khan Colombo, Sri Lanka-a Asia Pacific Choir Games neih ah gold medal an lo la tawh bawk a ni. NEDP hnuaia Vanapa Hall chei that hna chu zawh fel a ni a, Bawngkawn South, Vaivakawn leh Lawngtlai ah Cultural Centre sak mek a ni.

25.   New Secretariat Complex chhungah cheng vaibelchhe 23.60 hmangin Aizawl District Court building sak mek a ni a. Ministry of DoNER chuan High Court Building, New Secretariat Complex-a sak nan cheng vaibelchhe 46.24 min phalsak a. April Ni 21, 2017 khan Additional District & Sessions Judge Court, Champhaiah hawn a ni ta a. Lokayukta din na tura inbuatsaihna neih mek chu a taka kalpui thuai beisei a ni.

        Kum 2017-2018 chhung khan Lok Adalat ah case 1,450 tihfel a ni a, Mizoram Victims of Crime Compensation Scheme hnuaiah zangnadawmna, cheng nuai 169.2 chu mi 52 hnenah pek chhuah a ni a. Zirna in 40 ah Student Legal Literacy Clubs din a ni tawh a ni.

26.   Sainik School Chhingchhip-ah kum 2018-2019 session atangin hmeichhe naupangte luh tir tan an ni ve ta a. Kum 2017-2018 chhung khan Indian Army leh Indian Navy-ah Mizo naupang 137 an lut a ni.

27.   Hna thawk thei tura thalai te chher hriam hi sawrkar-in a ngai pawimawh a. The Mizoram Skill Policy for Development & Entreprenuership chu June Ni 4, 2018 khan pawm a ni tawh a. Pradhan Mantri Kaushal Vikas Yojana ( PMKVY) project hnuaiah cheng vaibelchhe 56.46  senga mi 36,671 training pekna tur phalna hmuh a ni tawh a. Mizoram Employees State Insurance Society chu sawrkar hnuaia hnathawkte hamthat nan din a ni a. Mizoram Youth Commission hnuaiah UPSC exam leh service danga thalaite an luh theihna turin coaching programme hrang hrang buatsaih a ni.

28.   NEDP hnuaiah Aizawl khawpui  chhunga sawrkar pisa hrang hrang ten an hnathawh nan internet chak zawk an neih theihna tura hma lak mek chu kumin chhung ngeia zawh fel hman beisei a ni a. Digital India Week hman chhungin mipui tana service 15 lai pek chhuahna tur e-District roll-out chu hawn a ni a. Service-income certificate, residential certificate, permanent certificate leh tribal certificate te hi tangkai taka mipuiten an hman theih nan mobile application UMANG (Unified Mobile Application for New Age Governance) nen thlunzawm a ni. BharatNet project hnuaiah optical fibre cable hmanga thingtlang khaw hrang hrang thlunzawmna tur chu kalpui chhunzawm zel a ni a, kum 2019-a zawh fel beisei a ni. Mizoram State e-Governance Society (MSeGS) chuan application an duan chhuah hmangin  Department of Administrative Reforms and Public Grievances (DARPG) leh Ministry of Electronics & Information Technology (MEITY) te buatsaih,  21^st National Conference on e-Governance-ah silver medal an dawng a.  Tunah hian e-Bharat project kalpui mek niin hemi hnuaiah hian mipui ten mobile hmangin sawrkar atanga service chi hrang hrang 52 an mamawh te awlsam takin an hmu thei a ni. e-PAR(Electronic Performance Appraisal Report) pawh kalpui mek a ni.

29.   Kawlphetha siam chhuah na ah nasa takin hma kan sawn a. Tuirial Hydro Electric Project chu zawh fel niin Prime Minister Pu Narendra Modi chuan December Ni 16, 2017 khan a hawng a. 210 MW Tuivai Hydro Electric Project thawhna turin North Eastern Electric Power Corporation(NEEPCO) nen thawhhona thuthlung ziah a ni a. New Development Bank (BRICS Development Bank) tanpuina hmangin 24 MW Turini Hydel Power Project thawhna tur ruahman a ni bawk a. Kawlpetha sem darh leh pek chhuahna atan project hrang hrang zawh fel zingah Buarpui leh Saiphaia 2.5MVA, 33/11kV Sub-Station sak hna te, Thingsulthliah leh Vairengte-a 33/11kV Sub-Station thawm that hna te a tel a.  Siaha leh Lawngtlaia 2x2.5MVA,33/11kV Sub-Station leh a thlunzawm 33kV line te, Bairiabi leh W.Phaileng thlunzawmtu 132kV S/C line siam hna te leh Zaiawhthang leh Thenhluma 33/11 kV Sub-Station thawm that hna te pawh kalpui mek a ni a. Rural Electricity Distribution Backbone (REDB), Deen Dayal Upadhayaya Gram Jyoti Yojana (DDUGJY) leh Integrated Power Development Scheme (IPDS) hnuaia hmalakna hrang hrang te bakah NEDP hnuaiah  Aizawl khawpui chhung chawmtu 33/11 kV Sub-Station tih len hna te, Vankal-a Mega Solar Park siam te, Vathuampui leh Sailama Mini-Grid SPV Plant siam te, Melriat 132 kV Sub-Station-a Grid Connected Rooftop SPV Plant siam hna te thawh mek  a ni.      

        ‘Solar Power Policy of Mizoram 2017’ hmangin hna hrang hrang thawh a ni a, chung te chu- 3538 kWp pe chhuak thei tur solar power plant, solar street lighting system 5,300, solar home lighting system 9,359, solar lantern 10,512, solar power pack 6,299 sem chhuah te bakah 3000 kWp pe chhuak thei tur Grid Connected SPV Rooftop System hmun hrang hrangah bun te a ni. Tlungvel kiang ah 2 MWp pe chhuak thei tur Solar Power Plant siam te, N.Lungphera 30 MW SPV Power Plant siam te, Sihhmuia 10 MW SPV Power Plant siam te leh Lengte-a 22.5 MW SPV Power Plant siam hna te thawh mek a ni a. Thli chakna hmanga power siam chhuahna tur ruahmanna pawh siam tum a ni.

30.   Science & Technology Department hnuaiah hmasawnna thar thahnem tak a awm a. Thil thar siam chhuah leh thiamna tihpun kawnga hmasawnna atan NEDP hnuaiah Innovation Facility Centre , Aizawl-ah sak mek a ni a. NEDP leh NEC hnuaiah Lunglei Science Centre & Digital Planetarium Zohnuai, Lunglei-ah sak mek a ni bawk. Science & Technology International Travel Support Scheme hnuaiah Mizo scientist pathum (3) ten Shanghai, London leh Cairo-ah an research paper te khawvel pum huapa mithiam rual fuan khawmna ah an tarlang a. NEDP hnuaiah project pawimawh tak pakhat ‘Sawdust to Charcoal Making Project’ Chhuanthar, Baktawngah kalpui mek a ni a. New Secretariat Complex-ah ‘Development of Indigenous Technological Innovations in Mizoram’ (DITIM) din a ni.

Ministry of Culture hnuaia National Council of Science Museums (NCSM) tanpuina hmangin Mizoram Science Centre, Berawtlangah Innovation Hub leh Space Science Education Centre din a ni a, mipui hman theih tura hawn thuai tum a ni. Mi thiam zawkte research tihna senso phuhruk nan scheme thar Scientific Research & Technological Innovation Project duan a ni.

31.   Aizawl Chaltlang-a Transport Complex-ah MST Bus silna, siam hna peih fel a ni a. Khawl hmanga lirthei endikna (Automated Vehicle Inspection & Certification Centre) South Hlimen-ah din a ni a, hemi atan hian Mizoram sawrkar chuan sawrkar laipui leh CIRT Pune nen thawh hona thuthlung an ziak a. Aizawl Civil Hospital leh Referral Hospital, Falkawn inkalpawhna atan MST bus service pathum tih belh a ni a. Tun dinhmunah hian two wheeler taxi 227 inziak lut tawhin State Transport Authority (STA) chuan two wheeler taxi permit pekchhuah theih zat 500-ah a bithliah a. Transport Department chuan cheng vaibelchhe 36.22 sawrkar kum kal ta khan a hmuchhuak a ni.

32.   January Ni 15, 2015 atang khan Mizoram Liquor (Control & Prohibition) Act, 2014 hman a ni a. Hemi hnuaiah hian kum 2016-2017 chhunga chhiah tling khawm chu cheng vaibelchhe 65.68 a ni a. Lottery department-in kum 2017-2018 chhunga a sum hmuh chu cheng vaibelchhe 13.80 niin kumin 2018-2019  May thla thlenga a sum hmuh tawh chu cheng vaibelchhe 2.26 a ni.

33.   Land Revenue & Settlement Department hnuaiah Digital India National Land Record Modernization Programme (DILRMP)chu ngawrh takin kalpui chhunzawm a ni a. Kum 2017-2018 chhung khan inhmun 302 ramri chinfel a ni a. Registration fee, tax leh non-tax atanga LR&S department sum lak luh chu cheng vaibelchhe 12.65 a ni.    

34.   Sixth schedule hnuaia Autonomous District Council te hmasawnna tel lovin Mizoram hmasawnna hi a tluantling thei lo va. ‘SUBHAGYA’ scheme hnuaiah khaw hrang hrangin eng an neih theih nan hmalak a ni a. Autonomous District Council chhunga khua ten internet connection tha zawk an neih theih nan hmalak a ni bawk a. Hmasawnna ruhrel pawimawh din piah lamah Autonomous District Council inrelbawlna leh sum hman chungchang felfai zawka kalpui a nih theih nan hma lak a ni. ADC huam chhunga zirna tih hmasawnna turin NLCPR hnuaiah school building 49 cheng vaibelchhe 11.09 senga sak tum a ni a. Mara Students Hostel for Boys, Zotlang-a sak chu zawh fel niin kumin May Ni 22 khan hawn a ni a. Chawlhmun-a Girls Hostel sakmek pawh peih fel tep a ni.

        The Mizoram Pension for Members of the defunct Pawi - Lakher Regional Council chu siam that  niin kumin January thla atanga hman tan turin Council member te pension hlawh tih pun a ni a. Council member te pension hlawh thla tin a Rs 10,000/- chu Rs 20,000/- ah tih pun a ni a. Kum tin 5% a tihpun chhoh tur niin  Rs 35,000/ thleng tihpun tur a ni. Hemi rual hian Family Pension pawh thla tin Rs 6,000/- atangin Rs 10,000/- ah tihpun a ni a.  Hei pawh hi kum tin 5% a tihpun chhoh tur  ni in  Rs 20,000/ thlenga tihpun tur a ni.

35.   Information & Public Relations Department kal tlangin sawrkar thil tum leh hmalakna te print leh electronic media hmanga puanzar chhunzawm reng a ni a. NEC sum cheng vaibelchhe 10 hmangin Directorate of I&PR ram-ah Lianchhiari Run sak hna kalpui tan a ni.

36.   Printing &Stationery ah khawl thar changtlung tak SM 74 chu bun niin calendar, brochure leh a dangte chhut nan hman a ni a. Sawrkar office leh press a hman tur lehkhapuan hralhna P& S department sum lak luhna bul ber a ni.

37.   Tun hnaiah hian Mizoram chhunga Below Poverty Line (BPL) chhungkaw zat chu za zela 21% atangin 19.63% ah a tlahniam a. BPL chhungkaw awm lohna khua panga (5) a awm tawh a ni. Kum 2014-2015 chhunga State Domestic Product (SDP) chu tuna market price atanga chhutin cheng vaibelchhe 13,343.89 a ni a, kum 2015-2016 khan cheng vaibelchhe 15,101.57 a ni a. Sum leh pai dinhmuna ram than dan tehna ah kum 2014-2015 chhunga kan state thanna chu 15.76% niin kum 2015-2016 khan 14.53% a ni a. Per capita income pawh kum 2014-2015 khan Rs.1,03,049/- niin kum 2015-2016 ah chuan Rs.1,14,524/- ah a pung chho a ni.

Ram hmasawnna turin thil tam tak tih a ni tawh a, hmabak tih tur tam tak a la awm zel a. Ruihhlo dona chak zawka kalpui a pawimawh a. Thalaite thiamna leh theihna hai chhuah sak thei tura thil kalpui leh an eizawnna tur kawng buatsaih a pawimawh hle a ni.

Vawiin hun pawimawh takah hian, Mizo mipui te, tlawmngai pawl te leh kohhran hrang hrang ten he sawrkar ah rinna nghat a, term hnih chhunga a hmalakna hrang hrang ah te in tawiawmna avangin lawmthu ka sawi a. Hun harsa leh boruak hrang hrang hnuaiah pawh dan leh thupek keng kawh a, ram leh mipui te venghim tura thawktu Mizoram Police, Army leh Parmilitary Force te thawhrimna a chhuanawm ka ti a. Mizoram ralmuanna boruak vawnghim tura mipui vantlang leh pawl hrang hrang te inpekna hi a fakawm tak meuh a ni. Sawrkar hnathawk te thawhrimna leh inpekna ah lawmthu ka sawi a. Media leh Mizoram-a central sawrkar office hrang hrang ten sawrkar in tawiawm na ah lawmthu ka sawi a ni.

India ram ropuina eng hnuaia hlim taka zalenna kan lawm lai hian he rama cheng te inpumkhatna tur te, inremna leh muanna atana thawk turin rilru siam ila. India ram leh Mizoram in hma a sawn zel theih nan theihtawp chhuah a thawk zel turin  inhlan thar leh ang u.

Ka lawm e.

JAI HIND.