Zoram mipui duhtakte,

Chibai ule

He state mawi takah hian Krismas vawikhat ka hmanna tur a lo ni ta reng mai. Kum chanve awrh emaw chiah ka la awm nain inngaihnatawm piahlamah in  bula chen nuam ka tih tawh tak zet a. In hawihhawmna te leh in mi ngaihsakna zawng zawngah a hmasa ininchungah  lawmthu ka sawi a ni. He hun pawimawh takah hian Zoram dung leh vang a chhungkaw tinte hnenah Krismas leh Kumthar  chibai bakah duhsakna sang ber ka hlan nghal e.

Krismas hi hun lawmawm bik a ni a. He hunah hian kan mihringpuite hnena duhsakna hlan chiah hi kan tihtur a ni ang. He hun kan hman chhan chu Pathianin a Fapa mal neihchhun, Isua Krista chu Lei leh van inrem tawhlo te an lo inrem leh theihna na tura Khawvelah a rawn tirh ni kan hriatrengna atan a ni a. Chuvangin, he hun lawmawm a lo thlen hian kan in an lohna leh kan danglamna zawng zawngte dahtha in mi zawng zawng te nen inrem  takin i awm tlang vek ang u.

Hunpui a lo thlen a kan phurna zawng zawng te chu thuhran ni se; kan lawmna tizualtu pakhat leh mi zawng zawng tana entawn tlak chu Inthlanpui thianghlim taka kan zo thei kha a ni. Tumdang ang bawkin Mizoram chuan Inthlanna felfai taka neiin India ram chhunga state ralmual ber kan nih zia kan ti lang chiang leh hle a. MLA inthlan tha taka kan neih avangin mipui, khawtlang leh inthlanna buaipuitu sawrkar hnathawk zawng zawngte thinlung takin ka lawmpui bawk a ni.

Krismas vuakvetah sawrkar thar kan nei thei leh zel te, tluang takin sawrkar hlui pawh sawrkar thara kan thlak thei te  hi thilropui tak a ni a. Mipui thuneihna sawrkar  leh inthlang ram kan nihna ang pawhin kan hlawhtling thawkhat in  ka hria. Sawrkar thar hi tha takin kan thlawp zel ka beisei rualin Opposition Party te pawhin  sawrkar tha tak kan neih theihna leh hlawk taka sawrkarin hna a thawh theihna turin an chanvo leh mawhphurhna te hlen zel tur pawhin ka han ngen nghal a ni.

Hun kaltawh te kan thlir let chuan nikum hmasa lam atang tawhin kum 2018 kha hlawhtlinna hrang hrang nen kan chuang kai a; hlawhtlinna liantham zawk nen kan khar ta a ni ber e. Kan tlangval NT Lalbiakkima chuan World No 1 leh Olympic Gold Medallist nilai Boxer pakhat chu President Cup an khelh khan Boxing ring chhungah ropui takin a hneh a. Kan nula chhuanawm tak, kum 18 chauh a la upa, Lalremsiami chuan India tan Asian Games-ah leh Youth Olympic Games-ah te Silver Medal chhuanawm takin a rawn vawchhuak a. Tin, kan rawlthar thahrui ngah tak, Jeremy Lalrinnunga chuan India mi leh sa zinga a hmasaber ni turin Youth Olympic Games-ah tho, Rit inchawisiakah Gold Medal a rawn hawn bawk a. Heng te leh kan hlawntlinna dang zawng zawng te chuan kum 2018 chu kum chhinchhiah tlak takah min siamsak a ni.

Khai le, kum 2019 kan chuang kai dawn ta reng mai! Awmhmun atanga kan hmalam hun ka lo thlir hian beiseina eng tak ka neih bakah phurna in ka khat a ni. Hetih lai hian khua leh tui zawng zawng te hlawhtlinna nasa zawk leh hmasawnna liantham zawk thawkchhuak turin  sawrkar kan thlawp tlat a pawimawh ber tih hi hrethar leh turin kan inngen nawn leh ni se. Ka mimal ngaihdan phei chuan Agriculture, Horticulture, Food processing, Tourism, education, Handloom and handicrafts Industries leh thil thenkhatah te hian hlawhtlin theihna kan nei sang leh zual bik a ni.

Zoram mipui ten Kumthar kan chuankai hunah chuan kan Hriselna vawng uluk ngei ngei turin kan inchah nawn leh ni se. Thildang dangah kan that viau rualin  Hriselna kawng bika  kan chhe lutuk erawh hi chu thil pawi tak a ni a. Kan insiam that ngei ngei a ngai a ni.

Kan zain State hrisel leh thianghlim, achhunga chengte zawng zawng lungawi taka an khawsakhona hmun,  boruak thianghlim tamna, thing leh Mau humhalh thatna bakah Nungcha te pawh humhalh thatna hmun kan neih theihna tura intiam thar leh turin kan in ngen a ni.

Krismas leh Kumthar thuchahka tihtawp nan in zavaiin Krimas hlimawm tak hmang tur leh Kumthar duhawm tak hmachhawn theuh turin ka duhsakna sangber ka hlan a che u.

Ka lawm e.

Jaihind

 The hon'ble Governor Kummanam Rajasekharan