India sorkarin khawchhak ramdangte nena thawhhona leh insumdawn tawnna tur ruahmanna lian tak a kalpui mek zinga pawimawh ber pakhat Kaladan Multi Modal Project hnuaia India leh Myanmar insumdawn tawnna tur Lawngtlai District chhunga Zorinpui Land Custom Station hmun chu Nilaini kalta April 25, 2012 khan ram pahnih aiawh mi pawimawhten a hmunah an tlawh a ni. Heng mi pawimawhte hi Myanmar sorkar atangin - His Excellency U Zin Yaw, Ambassador of Myanmar to India, Ye Minn Thein, 1st Secretary, Embassy of Myanmar, U Tun Htay, Port Officer, Union of Myanmar, U Kyaw Soe Win, U That Naing, U Zaw Min Thein, U Myint Thein Win leh U Khin Maung Kyaw te an ni a. India ram sorkar aiawhin - Pu Harsh Vardhan Shringla, Jt. Secretary, Ministry of External Affairs, Pu V. Krishna Swamy, Dy. Director, Ministry of Road Transport & Highway, Pu A. K. Sharma, Chief Engineer, Ministry of Road Transport & Highway, Brig. S.P. Rawat, Commander 23 Assam Rifles, Pu D. Bandhopadhyay, Under Secretary, Ministry of DoNER, Pu P.C. Pande, Under Secretary, Ministry of Commerce & Industry, Pu Brojen Thamar, Commissioner Customs, Shillong leh Pi Anima Barnwal, Under Secreatry (BSM-2), Ministry of External Affairs te an ni thung.

Ram pahnih palai te Zorinpui an thlen hian Lawngtlai District DC Pu B. Lalhmingthanga leh Trade & Commerce, PWD, I&PR Department ten an lo hmuak a. Inkhawm urhsun leh tawi fel tak buatsaih ah Lawngtlai DC chuan palaite lawmna thu sawiin he Multi Modal Project ruahman mek hi Mizo mipuiin thinlung takin an lawm a, Mizoram state tan mellung pawimawh tak a ni, a ti.

Myanmar Ambassador U Zin Yaw chuan he Project hian ram pahnih inkara inunauna leh thawhhona tha tak a thlen mai bakah a bikin Mizoram leh ramri depa Myanmar khuate tan kawng hrang hrang - zirna, hriselna leh thil dangah nasa takin chhenfakawm dawn a ni, a ti a. India sorkarin a tih tur chin kawngpui sial chu thui tak hma a lo lak tawh fakin an ram chhunga an thawh ve tur lawngchawlhna hmun Sittwe Port cheibawl bakah kawngpui an sial ve tur te chu kum hnih chhung ngeia peihfel vek an tum a ni, a ti.

India aiawhin Ministry of External Affairs Jt. Secretary Pu Harsh Vardhan Shringla pawhin thu sawiin ram pahnih aiawh ramria an inhmukhawm hian thil duhawm tak a thlen tir ngei dawn a ni tih a lantir a, he Project hi zawhfel thuai a nih tur thu leh Myanmar lam chanah pawh a tul dan a zir zelin India sorkar hian tha a thawh reng a ni, a ti. Zorinpui an tlawhchhan tarlangin Land Custom Station hmunhma cheibawlna tur te, venhimna leh thil dang mamawh zawng zawng en thlithlai a nihdan te a sawi a. Mizoram sorkarin ram pahnih palaite a lo dawnsawn leh buaipuina zawng zawngah lawm thu a sawilang bawk.

Ramri en tura mi pawimawh lo zinte hi Mizoram sorkar aiawhin Lawngtlai DC Pu B. Lalhmingthanga bakah Mizoram PWD Chief Engineer Pu Vanlalduhsaka leh Trade & Commerce Director Dr. C. Lalzirliana ten an tawiawm a ni.