Vawiin chawhma dar 10:30 khan Serchhip District Bawrhsap Pu P. Lalchhuanga chuan CMO Conference Hall Serchhip ah, Janani Shishu Suraksha Karyakram (JSSK) chu May 1, 2012 atanga hman tan turin a hawng. He programme hian a tum ber chu nu, nau chunga thi zat leh nausen kum khat tlin hmaa thi zat tih tlem a ni a, chumi tihlawhtling tur chuan nuin damdawiinah ngei nau a neih a tul dawn a ni.

He programme hi June ni 1, 2011 khan UPA Chairperson Pi Sonia Gandhi chuan India ram puma hman turin a lo hawng tawh a; Serchhip District-ah pawh May ni 1, 2012 atang hian a hman tan theih ve dawn ta a, Mizoramah chuan a hmang thei hmasa ber district ni a hriat a ni. He scheme chhawr theitu turte chu Nu, sawrkar damdawiin emaw Sub-Centre, nau neih theihna hmuna nau nei te leh naute zaichhuah ngaite an ni a. Heng sawrkar hmun ruata nau nei nu leh naute te hi an dinhmun a zirin hun engemaw chen chu a thlawnin sawrkarin damdawiinah a enkawl thei a, an kal man leh haw man thlengin sawrkarin a tumsak dawn a ni. Amaherawhchu he scheme hian private damdawiin-a nau neite chu a huam ve lo thung a ni.

Vawiin inkhawma thusawitu khuallian, District Bawrhsap ni bawk chuan fanau te hi Pathian malsawmna kan dawn an ni a, an dam khawchhuah ngei theihna tura beih hi kan mawhphurhna a ni tiin ram changkang apiangah nausen leh nu, nau chunga an thihna hi a tlem a, chu chu an fimkhur vang leh nau neihna tur hmuna nau an neih hram hram thin avang a ni a ti.Khuallian chuan mihring hrisel tha leh hleitling, hna thawk thei chher chhuak tur chuan nu in nau a pai lai atangin inenkawl uluk a tul a, chu chu mi tam takin an hriat loh avang leh an ngaihthah thin avangin media mite pawhin helam kawngah hian mipuite zirtirna an pek tam a tul hle a ni a ti bawk.

Khuallian chuan nu leh naute hi rai lai leh nau neih dawn hnaiah phei chuan an dawrawmin an derdep lehzual em em a, dim an ngaih em avangin nu leh nau an dam khawchhuah ngei theih nan damdawiin leh sawrkarin nau neihna tlaka a ngaih hmunte ngeia nau neih hi a thain a him a, a finthlak ni a ti bawk.

He hunah hian CMO Dr. Malsawma pawhin thu sawiin nausen leh nu nau chunga an thih chhan tam ber chu in lama nau neih vang a ni tih a sawi a. He scheme kalphung leh inrelbawl dan te, nu leh nautein an hlawkpui theih dan te leh sawrkar pawmpui nau neihna hmunte a sawi bakah mipuite hnen atanga zawhnate a chhang nghal bawk.