Pu J.H.Rothuama, Minister of Land, Revenue & Settlement, Cooperation, Excise & Narcotics leh Taxation chuan nimin zing dar 6 atang khan Zokhawthar a tlawh kual a. Tiau lui kama Land Custom building leh Tiau kama phaizawl te fang kualin Sorkar hmun pawimawh tura duan lawkte a hmunah Revenue Department nen an enfiah nghal.

V/C thlan thar ten sorkar an tawiawm tha leh tawiawm zel tura an lo pen chhuak chu a lawm thu a sawi a. Zokhawthar chu khaw din thar thangduang tak sorkar pawhin a ngaihven a ni a, Ramri bul anih avangin hmasawnna pawh a bel mawlh mawlh a, duh leh mamawh zawng zawng erawh chu tih theih ni nghal vek lo mah se a tul chu tih zel tum a ni tiin Minister chuan Damdawi In leh Civil SDO te pawh awm a la ngai mai thei a ni a ti. Ngaw humhalh a tul thu sawiin Pu Rothuama chuan ngaw te hi nakina kan ram hausakna tur an ni in tuihnar tha tak siam tu an ni a. Tunah hian Tuirial MW 70 pe thei tur tui khuah chu reiloteah mamawh phuhruk thei tura peih tep tawh a nih thu leh Tuivai leh Chhimtuipui te pawh khuah theih tura buatsaih mek an nih thu a sawi bawk.

NLUP hmanga Zoram mipui ten eizawnna ngelnghet an neih phah chuan kan hlawhtlingah kan ngai tiin Minister chuan India ram state zinga zahpuiawm lo leh chhuanawma Zoram siam hi kan tum tur a ni tiin Sorkarin ram hmasawnna tur tam tak a ngaihtuah a ni tiin kalkhawmte chu Minister chuan sorkar policy zawmpui tute ni zel a, Mizoram chu tluchhe mai lova, tungding tu ni zel turin a chah nghal a ni. Minister hian vawiin tlai lam dar 3 ah Tlangsam a tlawh anga. Polytechnic Building sak mek leh sorkar building dangte a hmunah a enkual leh nghal anga. Vawiin 27 April, 2012 hian Kanan playground ah puanthui khawl, MLA LAD Fund atanga hmuh a sem nghal ang.