Myanmar Police Officer 28 thlakhat chhung Champhai DIET a saptawng zir te nimin ah thlah liam an nih hnuin nimin chhun dar 12 khan U Tun Htay, Port Officer leh palai dang mi 8, Zorinpui hmuna Land Custom station en tura lo kal te chu thlah liam an ni ve leh ta.

Tarlan tawh angin ni 23rd April 2012 zingah khan Myanmar ram palai mi 8 te hi Champhai an rawn lut a. Chhimtuipui hi kaltlanga lawng hmanga India leh Myanmar insumdawn tawnna hmun tur, Mizoram leh Myanmar inrina, Lawngtlai District chhung Zorinpui hmuna Land Custom Station dinna hmun atana ruahman India Palai te nen en tura lo kal an ni. Myanmar palai te hi Tiau lei thlenga thlah liam an ni a. Palai te hian pangngai takin saptawng an hmang thei vek a. Mizoram chu nuam an tih thu leh tluang taka hun an hmang thei chu lawmawm an tih thu an sawi a ni. Nimin vek hian Myanmar lam panin an kal tlang nghal ang.