523/2025-2026

Saitual, the 9th May, 2025: Vawiin chawhma dar 10:00 khan, DC Conference Room, Saitualah, India leh Pakistan inkara buaina punlun thulha mipuite inralrin lawkna tur ngaihtuahin District Level Civil Defense Advisory Committee (DLCDAC) chu an chairman, District Bawrhsap ni bawk Dr. Lalngura Tlau kaihhruainain an thu khawm. 

He hunah hian Dr. Lalngura Tlau chuan thu sawiin, hel pawlin Pahalgam-a khualzinte an beih atangin India leh Pakistan boruak a tha lo hle tih a sawi a, mipuite pawh chiai lo a, indona hmachhawn thut thei tura inbuatsaih lawk a tul a ni, a ti. Bawrhsap chuan Civil Defence Act 1968 behchhana State leh District Levelah Civil Defense Advisory Committee din tura tih a nih angin Saitualah pawh chawpchilh taka din a ni tih a sawi a, DLCDAC chuan kawng hrang hranga inbuatsaih dan tur te a ngaihtuah dawn a ni, a ti. 

Bawrhsap chuan tunlai khawvel indonaah chuan ralthuam a changkangin a hlauhawm tawh a ni, a ti a, inbeihnaah hian Disaster kaihhnawih thlenga a huam theih avangin sawrkar hnathawkte leh khawtlang mipuite pawh tanrual a pawimawh hle tih a sawi. Dr. Lalngura Tlau chuan mipuite chu thu thehdarh kawngah fimkhur a tul hle a ni, a ti a, thu dik lo thehdarhtu chu hrem theih a ni tih a sawi bawk. Bawrhsap chuan mipui tichiai zawnga thu theh darh lo turin kalkhawmte chu a chah a, mipuite him nan theih tawp chhuah zel turin a fuih nghal a ni.  

Vawiin thutkhawmah hian Saitual District dinhmun te, bungrua leh hmanraw neih dan te bakah DDMA anga an inbuatsaih tawhna te sawiho a ni a. Civil Defence Exercise-ina tih tur a ruahman angin, DLCDAC chuan service hrang hrang 12-ah te mawhphur tur a ruat nghal a, District leh Block level-ah Civil Defense plan siam tura rel a ni bawk. Committee chuan mipuite himna tura tlan khawmna tur-school leh community hall ngaihtuah a rel a, Civil Defense Control Room din bakah buaina thleng thulha nun chan zirna “mock drill” leh mipuite inzirtirna “training” nei tura rel a ni bawk.  

Vawiin thutkhawmah hian Dr. Lalngura, DC & DLCDAC chairman, Pu Gaurav Tyagi, SP bakah DLCDAC member te an tel a ni.