No.620/2020-2021

Aizawl the 27th April, 2020: Vawiin khan Prime Minister Pu Narendra Modi chuan India state hrang hrang Chief Minister te nen video-conference kaltlangin ram pum leh state/UT a Novel Coronavirus hripui leng do hna leh, he hrileng avanga harsatnate tiziaawm tura hmalakna hrang hrang sawiho a ni a. Mizoram Chief Minister Pu Zoramthanga chu he meeting ah hian Home Minister Pu Lalchamliana leh Health Minister Dr. R. Lalthangliana ten an tawiawm bawk.

Chief Minister hian Prime Minister bulah hian he hripui do tura sawrkar laipui atanga kawng hrang hranga puihna a dawn avangin lawmthu a sawi a. PPE, Test kits leh medical supply dangte a pek bakah puihna sum state in a hmuh avangin lawmthu a sawi a. Mi harsa zawk ten ei tur an tlakchham loh nan a thla thum chhung a thlawn a buhfai pek an nih avang te leh ni za inhlawhna sawrkar laipuiin pawisa ba a neih pawh rang taka a rawn sanction avang te in lawmthu a sawi a ni.

Chief Minister chuan Mizoram a hmalakna hrang hrang sawiin, Covid Fund atana mipui, kohhran leh pawl hrang hrang ten phal taka an thawhkhawm thu a sawi a. Tlawmngai pawlte leh mipuiin hlawh beisei lova inpe taka mipui him tlan nana an duty thu te sawiin, he hun khirh tak kan tawn mek lai hian In neituten dawr leh in luah man an awl (free) thu te sawi bawkin, Zoram mipuite inthurualna leh thawhhona that thu leh midang tan pawha entawntlak a tih thu a sawi a. Tun dinhmunah Mizoramah chuan COVID-19 vei damlo pakhat chauh awmin, that lam a pan chhoh mek thu a sawi a. Chutihrual chuan ngaih ti tha mai thei kan la nih rih loh thu Chief Minister hian sawiin, kan ram thenawmte leh state thenawmah te he natna vei hi an la awm avangin Mizoram chu la inthlahdul mai chi a nih loh thu leh, khauh taka border venhim hna kalpui mek chu chhunzawm a tul thu a sawi. Ramri venhim hna hahthlak tak mai chu theihtawp chhuah a paramilitary forces bakah local volunteer ten theihtawp chhuah a an kalpui mek thu a sawi bawk a. Chief Minister chuan Zoram mipuite chuan sawrkar thuchhuahte an zawm that thu sawi bawkin, state dangte tana entawntlak a nih thu a sawi.

Mizoram mamawh hrang hrangte PM Narendra Modi bulah hian Pu Zoramthanga chuan a thlen bawk a. Hmanrua mamawh hrang hrangte leh sum a puih state in a mamawh thu te sawiin, Mizoram chu agriculture a innghat economy kan nih avangin hemi kawnga hmalak a tul thu te a sawi bawk a. COVID-19 in ram mipui hriselna leh ei leh bar, eizawnna thlenga nasa taka min nghawng dan hre rengin, chumi mil tur chuan Disaster Relief Fund 2020-21 inkaihhruaina chu siam ni se tiin rawtna a thlen bawk.

Vawiin video conference ah hian India Prime Minister chuan ngaiawh tur chuan hun rei tak nghah a la ngaih hmel a rin thu sawiin, he natna hri hian pawi a khawih belh zel loh nan mitin in theihtsawp a invengin hma kan lak tlan a pawimawh a ni, a ti a. Tun a red zone, orange zone leh green zone kan then zingah green zone a lo tam zel a, heng green zone te hi orange zone ah a lo chan mai loh nan state tin ten hmalak a tul thu a sawi a. Prime Minister chuan Chief Minister te chu sik leh sa inthlak in a ken tel natna dang te pawh ngaihtuah tel turin a chah.

Prime Minister in Chief Minister te hi Covid-19 chungchanga a kawm vawi li na niin, March ni 20, 2nd April ni 2 leh ni 11 khan a lo neihpui tawh a ni.

Vawiin meeting-ah hian Chief Secretary Pu Lalnunmawia Chuaungo, Director General of Police Pu SBK Singh, Health Secretary Pu H. Lalengmawia leh Home Secretary Pi Lalbiaksangi te an tel bawk a ni.