No.621/2020-2021


Sawrkar ruahmanna kaltlanga Champhai District mi leh sa thenawm North East State Manipur, Meghalaya leh Tripura atanga lo haw turte buaipui dan tur chungchang chu vawiin khan Bawrhsap Pu Mark Lalthanliana hovin a Pisa-ah ngaihtuah ho a ni.

Pu Mark Lalthanliana chuan thenawm State-a tangkhang mekte an lo haw veleha dan ang taka buaipui an nih theihna turin a tul anga hmalak zel anih thu leh Champhai District chhunga Quarantine Centre-ah te tul bik mamawh angte chu chhawpchhuaha peihfel a nih thu a sawi a. Thenawm State atanga rawn haw turte tana Quarantine facilities lo inruahman lawk chu thil pawimawh tak ani tiin, an hriselna endik, ei leh in tur pek, venhim hna thawh leh tul dangte pawh dan ang thlapa kalpui anih theihna tura hmalak zel angai a, tuna Quarantine Centre-a awm mekte chu an chhuak zo tep tawh a, a thar lolut turte nen an inbanlet thei dawn ani, a ti a. Covid-19 beihletna kawnga Champhai district chhunga thawhhona tha tak awm chu fakawm tiin, thawktu zawng zawngte chu tha lehzuala thawkho zel tur leh harsatna awmte inhrilhhre tawn zung zung thin turin a chah nghal a ni.

Meeting chuan thenawm State atanga rawn hawte chu Quarantine Facilities pahnih, District Panchayat Resources Centre (DPRC), Keifangtlang leh Polytechnic Building Tlangsam Quarantine Centre-ah te dahluh hmasak nise, mamawh ang zelin Quarantine Centre dangte pawh hman nise a ti a. Damlohna avanga inenkawl tura thenawm State pantu Medical Case nei rawn hawte chu District Hospital Champhaia Isolation Ward, khum 5 awmnaah Quarantine hun chhunga dah rih nise tih a ni a. Heng bakah hian tunkar chhova Law Minister Pu TJ Lalnuntluanga hova District Level Task Force on Covid-19 meeting neih dan tur chungchangte, ei leh bar hnianghnar taka neih theih dan tur leh thlai rah leh hnah thar kawnga thlai chi mamawh neih dan turte pawh sawiho a ni bawk. Nodal Officer leh Incident Commander-te hnen atangin report ngaihthlak a ni a. Meeting chuan thahnemngai taka ramri vengtute hriselna leh himna a ngaipawimawh hle a, Malaria laka him theihna turin ramriak turten Thosi hloa chiah Thosilen chauh an ken theihna tura hmalak zel nise a ti a, an hriselna lamte a tul anga endik anih theihna turin CMO kaltlanga hmalak nise tih a ni a. Ruahtui leh thli laka ramri vengtute an him theihna turin a theih ang tawka hmalak chhunzawm zel nise tih a ni bawk.

Meeting-ah hian Online application hmanga District pawn leh State pawna vahvelna tur mihring leh vehicle registration dil theihna Online Apps ‘m-COVID-19’ chungchang pawh sawiho a ni a. District mipuite chu he Online Apps hi Playstore atanga download a, lo hmelhriat tur leh mahni awm hmun atanga dilna thehluta, a tangkai thei ang bera hmang turin a ngen bawk a ni.

Ruahman dan chuan tunkar chho hian thenawm State heng Manipur, Meghalaya leh Tripura-a Mizo tangkhangte haw theihna tura hmalak a ni dawn a. Heng zinga Champhai District mi leh sate Champhai district an rawn thlen huna lo buaipui dan tur relna hunah hian Pu Rex Zarzoliana Vanchhawng, SP Champhai. Pu Lalnunfela Chawngthu, SDO Sadar; Pu Lalduhthlana, DFO; Dr. R.Lianmawia, CMO; Dr. Zatluanga, DMS; Pu Spencer Vanlalchhuanga, DCSO, Pu Laldingliana Hrahsel, EE, I&WRD; Pi R.Lalnunkimi, BDO Champhai; Pu Vanlalchhuanliana, BDO Khawbung; Pu Benjamin Zalawma Ralte, DLAO; Dr. Lallawmkima, DIPRO; Pu Vanlalvuana Rokhum, SDHO; Pi Esther Leihang, SDC; Pu Obed Lalmalsawma, SDC leh Dr Samuel Laldinthara, MO te an tel a ni.

Attachment

  • Loading attachment...