Vawiin atanga khan Durtlang MC Hall kawtah  Imperial Blue Super 5 Tournament khelh tan a ni. 

Hawnna programme-a Khuallian Pu Joseph Lalhimpuia chuan Futsal chu Mizote thiam zawng tak leh khawvel huap pawha mizote inpholan theihna tur a nih a beisei thu a sawi a, MFA leh buatsaihtu dangten he game chawikanna atan hma an la hi thil lawmawm tak a ni, a ti a. Thalaite khawvel zauh a, ram pawn thlenga eizawnna tha zawk neih chu MYC duhthusam a nih thu sawiin, khawvel hmun hrang hrangah mizo thalaite an inzarpharh tawh thu te, thalaite pawh rilru leh taksa lama theihtawpa inbuatsaih tura a duh thu te a sawi bawk. Talent kan neihte kan ram chhung chauh nilo, khawvel hmun zau zawka pholang turin theihna kan nei a ni tiin thawhrimna, tumruhna leh taimakna nena khawvel ram zau zawka luangchhuak turin duhsakna kalkhawmte hnenah a hlan a ni.  

He tournament hi Zo Events leh Durtlang Futsal Club huaihawt niin Team 229 an in ziak lut a. Kum 2017 khan Imperial Blue tournament hi hlawhtling taka huaihawt a lo ni tawh a, team 300 lai an tel a ni. Hawnna hun hi Pu Francis Lalmalsawma, Founding Partner, Zo Events and Management chuan lawmthu sawina in a khar a, “Mizoram Youth Commission kaltlanga thalaite hmasawnna tura a thawhna hi a ropui in, a zarah thalaiten khawvel thar kan nei ngei ang” tiin a sawi a ni.