1056/2024-2025

Aizawl the 3rd July, 2024: The Indian Council of Medical Research-National Institute of Nutrition, Hyderabad chuan "Diet and Biomarker Survey in India" tih thupui hmangin ram chhung zirchianna a nei dawn a. He zirchianna-in a tum ber chu, mipuiten India rama nutritional (chaw tha) an lakluh dan dinhmun enchianna a ni. Hei bakah hian mipuite thisen tlakchham (anemia) leh micro-nutrient (Vitamin leh Minerals) tlakchhamna tlanglawn an neih dan enfiahna a ni. Heng zirchianna hi a hrang hrang in an then a: naupang kum 5 hnuai lam, kum 5-9 inkar, tleirawl/rawlthar, puitling leh kum upa lamah te then a ni.

Mizoram sorkar, Zoram Medical College (ZMC) leh The Indian Council of Medical Research-National Institute of Nutrition (ICMR-NIN) tang kawpin he zirchianna hi July 2024 atangin thla 6 chhung District thlan bik 6 Aizawl, Champhai, Kolasib, Lunglei, Mamit leh Siaha-ah te neih tum a ni a.

Zirchianna hi mi thlan bik 24 ten an nei dawn a chungte chu: Medical Officers-2, Nutritionist/ Dieticians-2, Phlebotomists/Lab Techician, Social Workers leh Antropologists te an ni ang. He zirchianna hi in tinah neih tura ruahman a ni a. An thlahtute atanga zirchianna, natna benvawn an neih dan, ni khat chhunga an ei leh in lakluh, an chaw lakluh dan kimchang leh an thisen test atanga neih turn a ni. Thisen sample hi chi hrang hrang a thenin : HB test, an zunthlum dinhmun, Iron, B12, Folate, Vitamin A etc leh an thau chhe neih leh neih loh atangte a en a ni ang.

He zirchianna hian Mizoram mipui dinhmun dik tak, an thisen tlakchham dan dinhmun leh an diet (chaw tha lak luh) dan a entir dawn a. National Food Security Act hnuaiah Mizoram dinhmun a hriat theih mai bakah public health nutrition policy kal tlangin an harsatna te a su kiang thei dawn a ni. He zirchianna hian a tawk te a kan chaw tha lak luh dan tur leh thau lutuk kan neih theihna turah te min vengin min kaihruai thei dawn a ni.