1057/2024-2025

LUNGLEI; the 3rd July, 2024: Vawiin chawhnu dar 2:30 khan DC Conference Hall-ah Lunglei district chhunga Heads of Offices leh Tlawmngai Pawl hrang hrang  hruaitu ten Lunglei District bawrhsap Pi Ramdinliani thlahna programme an hmang.

Programme hi Pu James Miahlung Addl.DC chuan kaihruaiin, hunserh hi TC. Zonungsanga DRO in a hmang.

Pi Ramdinliani chuan a puala Farewell programme an buatsaih chu lawmawm a tih thu sawiin, a chunga duhsakna an lantir zawng zawng chu Pathianin a let tam takin rul theuh hlawm turin duhsakna a hlan hlawm. Pi Ramdinliani chuan  Lungleiah kum khat tha a awm chhunga LMC, MLA leh Lok Sabha inthlanpui a hmachhawn avanga Lunglei district tana   a thawh tur anga a thawk hman loh leh ruahmanna a lo neih ve te pawh  a bawhzui hman lo erawh  pawi a tih thu a sawi. Sawi zawmin Pi Ramdini chuan Lungleia  a awm chhunga Head of Office te, Tlawmngai pawl te, Kohhran te, Local Council/ Village council te leh mipui mimir te thawhpuina leh tawiawmna tha tak a dawn avangin lawmthu a sawi bawk.

Pi Ramdinliani chuan amah thlahtu HoO te hnenah, Lunglei District-a an awm chhunga an Office tan leh Lunglei district tana theitawp chhuah theuh tura chahin,  Thingtlang lam  atanga Lunglei khawpuia office dawr tura lo kal te chu lo ngai pawimawh a, lo ngaihsak hram hram thin turin a chah hlawm bawk.

Vawiin Farewell programme hi Pi Rochuangkimi Khenglawt, Addl. DC chuan lawmthu sawiin a khar ta a ni.

Head of Office te leh NGOs hruaituten an thlah zawhah hian Lunglei Officers' Club ten Circuit House, Conference Hall-ah an President Pi Ramdinliani, IAS hi an thlah ve leh bawk a ni.