1946/2024-2025

Aizawl, 6.9.2024: Nimin (5.9.2024) khan Union Commerce & Industries Minister Pu Piyush Goyal kaihhruaina hnuaiah Commerce & Industries Minister Conference (Udhyog Samagam-2024), Yashabhoomi, Dwarka, New Delhi a buatsaih a ni a. Mizoram Commerce & Industries Minister Pu F Rodingliana pawh telin industry lama hmasawnna tura Mizoram hmalakna leh harsatna tawhte a sawi a ni.

He Ministers’ Conference ah hian Conference thupui ber ‘Ease of Doing Business (EODB)’ chungchanga State leh UT te hmalakna thlirho niin, India ram khawi hmunah pawh sumdawng leh Industry a eizawng ten awlsam zawka an sumdawnna an kalpui theih dan tur leh Industry/sumdawnna lian tham zawk te an rawn luh duh pawh a, investment awlsam zawk a reform leh policy neih dan tur sawikhawmna neih a ni.

He Conference ah hian Pu F Rodingliana, C&I Minister pawhin thu sawiin, Mizoram Sorkar in Industrial Policy leh Investment Policy te a duangthar a, investment ti duhte tan zau zawka kawng hawn a nih mek thu a sawi a. A bikin agro-based industries leh mau kaihhnawih industry lama nasa zawka hmalak tum mek a nih thu sawiin sawhthing, aieng leh hmarcha lam tharchhuah a tam dawn avangin heng thlai sawngbawlna tur buatsaih chhoh mek anih thu a sawi. Minister chuan Mizorama industry din kawnga harsatna awmte tarlangin India ram State dangte leh Sorkar laipui te chu a theih ang anga Mizoram pui a, chhawmdawl turin a ngen a ni.

C&I Minister hi Dr. Lalzirmawia Chhangte, Secretary leh Pi Maria CT Zuali, Director, Commerce & Industries Department ten an tawiawm a ni.