1945/2024-2025

Siaha the 6th September, 2024: Vawiin khan MADC Forest Hall-ah Power & Electricity Department, Siaha bultumin District chhunga power supply chungchangah thutkhawmna neih ni a, Er Lalrinmawia, Superintending Engineer, Lunglei Power Circle chuan he hun hi a hmanpui a ni.

Meeting kaihruaitu Siaha Power Division EE, Er Lalthlengliana chuan power supply chungchanga tul leh pawimawhte ngaituah ho tura thutkhawm hi buatsaih a ni a ti a, P & E Department hmalaknate leh hmachhawp an neih te mipuiin hriatpui ve se an tih thu a sawi.

Lunglei Power Circle SE, Er Lalrinmawia chuan Siaha District chhunga power supply a that zawk nana hmalakna an neih mek te a tarlang a, sawrkar pawhin chhim lam power dinhmun a ngai pawimawh takzet tiin hmachhawp an neihte a tarlang a, theihtawp an chhuah mek tih sawiin a phurawm hle a ti. Khawiva atanga Chawnhu 132kv line upgrade tura hmalak mek a nih thu te, an upgrade hun chhunga chak zawka hna thawh a nih theih nan chhun lamah power supply shut down a ngaih dawn thu te a tarlang a, Siaha mipuite hriatthiamna leh tawiawmna a dil nghal bawk. Er Lalrinmawia chuan Siaha Power Division hnuaia thawkte fakin an inpekna leh thawhrimnaah lawmthu a sawi a, 2023-2024 chhungin Mizoram pumah transformer enkawl kawnga titha ber, transformer chhia tlem berna an ni a ti a, lawmpui nan citation a hlan a ni. Siaha Division aiawhin MTP Gen Hqrts President Pu Pakhaw Chozah chuan citation hi a dawng a, Siaha Sub division aiawhin MCHP President Pi P Chaki chuan citation hi dawngin Tuipang Sub Division aiawhin YMA Chhimpuitui Group President Prof Chawngkhuma Chawngthu chuan a dawng thung a ni.

He hunah hian Lawngtlai Power Division EE Pu Ramdinsanga bakah Siaha Division hnuaia thawkte, Siaha khaw chhunga NGO hrang hrang aiawh; MCHP, MTP, MSO, YMA, MYA, Consumers Union te an tel a, zawhna leh chhanna hun buatsaih nghal niin kalkhawmten hriatthiamloh an neih te leh rawtna an neih te an thlen nghal bawk.