1944/2024-2025
2024 Mimkut thla ni 6: Vawiin khan Lunglei District Level Committee on Solid Waste Management (DLCSWM) chu an Chairman, Lunglei District Bawrhsap Pu R. Lalṭhazuala hovin Lunglei DC Conference Hall-ah an ṭhu khawm a, Lunglei District chhungah awmze nei leh felfai zawka bawlhhlawh thehthang leh sawngbawl a nih theih nana hma lakna tur hrang hrang an sawi ho.
Chairman Pu R. Lalṭhazuala chuan India ram pumah National Green Tribunal (NGT)-in bawlhhlawh sawngbawlna kalpui dan vilin, felfai leh him taka bawlhhlawh thehthang leh sawngbawl a nih theih nana NGT-in inkaihhruaina a siamte chu state tinin an bawhzui ṭhin tih a sawi a. State thu chhuak um zuiin Lunglei District Level Committee on Solid Waste Management pawh chu din a nih thu sawiin, ṭhut khawm hmasa ber a nih angin member-te lawmna thu a sawi a. Khawvel changkang zel leh khaw ṭhang zelah bawlhhlawh thehthang dana fimkhur a ṭul piah lamah, bawlhhlawh sawngbawlna ṭha neih a pawimawh tel tih sawiin, Lunglei District chhungah pawh ram leilung, mihring leh nungchate tana pawi thei zawnga bawlhhlawh thehthang a nih loh nan hma lak leh inzirtir uar zel a ṭul a ni, a ti.
Vawiina Lunglei DLCSWM ṭhut khawm hmasa berah hian Lunglei khawpuiin khawl hmanga bawlhhlawh ṭawih thei chi leiṭhaa chantirna tur hmunhma leh hmanrua (mechanical compost plant) a la neih loh avangin heti ang mamawh a nih dan hi state level committee-ah thlen ni se, tih a ni a. Thuneitu sang zawk aṭanga a hmun ni lova bawlhhlawh paih (legacy waste)-te environment tana pawi lo tura chin fel dan zawng tura thu hmuh chu a kaihhnawih department-te'n a theih ang angin lo bawhzui se, tih a ni a. UD&PA Department-a khawpui chhung bawlhhlawh chhek khawm leh thehthang dan report hunbi neia theh luh turah data dik leh rin tlak a awm theih nana bawhzui dan tur pawh sawi ho a ni bawk.
He hunah hian Swachh Bharat Mission (Grameen) hma laknaa plastic bawlhhlawh sawngbawlna tura ruahman, June ni 4, 2022-a hawn, Luangmuala Plastic Waste Management (PWM) Centre dinhmun ngaihthlak niin, he hmunah hian thingtlang bakah khawpui chhunga plastic bawlhhlawh eng emaw zat sawngbawl tawh a nih thu leh hralh tura thawn chhuah pawh a awm tawh thu tar lan a ni a. He hmuna sawngbawl atan hian khawpui chhung leh thingtlang khaw hrang hrangah khawlaiah plastic bawlhhlawh bik paihna tur bawm hun a nih thu tar lan niin, mipuiin paih nachang an hriat tawk loh avangin he PWM Centre-a sawngbawl tur hi duh khawp a awm lo tih tar lan a ni bawk a. Hemi harsatna su kiang tur hian LMC-in bawlhhlawh an khawnna Lunglei khawpui chhung veng parukah mipuite'n plastic bawlhhlawh thliar a, a hranga lak khawm a nih theih nana hma la turin LMC ngen ni se; office leh zirna in tinah plastic bik paihna nei hrang tura hma lak ni bawk se, tih a ni a. Khawlaia plastic bik paihna tura bawm hunah te plastic bawlhhlawh chauh paih ṭhin turin District Level Committee chuan mipuite a ngen nghal bawk a ni.
He hunah hian Lunglei District chhunga September ni 14 leh October ni 2, 2024 inkar chawlhkar hnih chhunga faina beihpui thlak, Swachhata Hi Seva 2024 kalpui dan tur ruahmanna thlir ho nghal a ni a. Thingtlang lama hma latu tur PHED Rural WATSAN Division leh khawpui chhunga hma latu tur Urban Development & Poverty Alleviation/Lunglei Municipal Council te aṭangin hma lak dan tur ruahmanna an siam dan ngaihthlak a ni a. Thingtlang lamah chuan vantlang hmunhma then fai ngai bik [cleanliness target unit (CTU)]-a faina hnatlang thawh, faina thu tiam, thing phun, lui leh tuikhur hnar tihfai, Naupang Fai Duh Pawl (NFDP) te nena zirna in hrang hranga faina inzirtirna kalpui, khaw chhunga faina inzirtirna atana lemziak awm sa tihfai leh chei hnum bakah, vantlang inkhawm leh tlangau hmanga faina inzirtir te kalpui tum a ni a. Khawpui chhungah chuan faina hnatlang, pawl leh sikul thlan bikte nena hmunhma pawimawh leh tui lak hnar tihfai, Swachh Bharat Cultural Fest buatsaih, sanitation thawktute hriselna enfiah, Chanmari-a KFC dawr leh Civil Hospital Lunglei peng te 'tihbawlhhlawh thiang lo hmun' (no littering zone)-a puan te ruahman a ni a. September ni 23 - October ni 2, 2024 inkar chhungin faina hapta hman nghal tur niin, a kharna hi October ni 2-ah buatsaih turin ruahman a ni bawk.
Lunglei DLCSWM-ah hian Deputy Commissioner chu Chairman niin, Additional Deputy Commissioner chu Co-Chairman a ni a. PHED Rural WATSAN Division Lungleia Senior Executive Engineer chu Member Secretary niin, SP, Sr CMO, DFO, PD DRDO, Secretary LMC, DLAO, DUDO, DEO, DPO(WCD), BDO-te, DIPRO, Lunglei District VC Association President, Sub-Headquarters YMA President, Sub-Headquarters MHIP President leh Clean Lunglei ai awh te chu member an ni.
Attachment
- Loading attachment...
