No.3142/2020-2020

Aizawl, the 16th July, 2020 : Vawiin khan ASSOCHAM (Associated Chambers of Commerce and Industry of India) buatsaihin India ram pum huap Webinar neih a ni a. He hunah hian Sawrkar Laipuia Minister of State for Fisheries Pu Pratap Chandra Sarangi chu khuallian niin, Pu K Lalrinliana, Minister of State, Fisheries Department, Govt. of Mizoram leh Pu Parimal Suklabaidya, Fisheries Minister, Govt. of Assam te chu khualzahawm an ni.

Webinar-ah hian Minister Pu K Lalrinliana chuan COVID hrileng vanga Mizoram chhunga sangha khawitu ten harsatna an tawhte sawi langin sangha no khawi tur leh a chaw lakluh kawnga harsatna an tawh dan te, Lockdown vanga sangha dil enkawl that theih loh a tam thu leh hemi vanga sangha thar a tlem phah a rin thu a sawi a, Central Sawrkarin PMMSSY Scheme thar a siam behchhan hian sangha khawi a eizawnna leh a hralhna kawngah Mizoramin ngai awh chho a, a hma aia lian zawk leh mumal zawka hmasawnna a hmuh a beisei thu a sawi.

Sangha dil siam bakah Mizoram-in hma thar a lakna chi hrang hrangte thlenin; lui sangha humhalh chungchanga khawtlang mipuite nen tangruala hma an lakho dan te, Mizorama sangha no keu tir dan tur leh Mizorama sangha awmsa khawi dan tur te, sangha mawi chi khawi dan tur a hmalak tumna awm te a sawi lang bawk.

Minister chuan Mizoram chhunga sangha chaw siam na atana pawimawh bawlhlo awm dan zir chian a pawimawh thu leh zir bingna kalpui a tul thu pawh sawiin, heng sangha chaw siamna bawlhlo te hmun dang atanga lak ringawt a nih chuan Mizoram tan sangha chaw siamna kawngah intodelh a har dawn thu leh sangha thar hnem a har tur thu te a sawi a, chu tiang bawka a note thar chhuah lamah hmalak a tul thu a sawi bawk a ni.

Sangha dil atanga a zawrhna hmunthlenga thianghlim leh tha zawka mipui lei tura chhawp chhuah a nih theih nan tan lak a, mipui ten chaw an mamawh tak protein pawh sangha-a an hmuh theih a pawimawh thu a sawi bawk.

Central Sawrkar atanga sanction hmuh tlai leh installment a hun taka a thlen thin loh avanga State Sawrkar-in Scheme/Programme Implement na-ah harsatna an tawh thin thu te sawi langin PMMSSY-ah chuan a kalhmang siam tha turin Union Minister hi a ngen bawk a ni.