No.3143/2020-2020 

Vawiin khan Cooperation Department Minister Pu C. Lalrinsanga'n Primary Agriculture Credit Co-operative Society (PACS) Ltd. Maubuang hawngin khuallian a ni a. Hawnna hun hi Presbyterian Kohhran Sunday School Hall-ah neih a ni.

Khuallian Pu C.Lalrinsanga chuan thu sawiin Consumer Co-operative Society behchhana Primary Agriculture Credit Co-operative Society (PACS) Ltd. an din thei chu lawmawm a ti a, Maubuang chu khua tangrual leh inlungrual tak an ni tih a lang, a ti a. Hmasawnna ruhrel tan dawn chuan leilung behchhan tello in a hlawhtling theilo a, rinawm taka leilung behchhana thlai tharchhuah chu bul tanna dik niin, thlai thar chhuah atanga pawisa tlem lua awmlo an khawl theih nan PACS chhungah a tam thei ang ber inrin lut se, neitu tih inhria a, agriculture hmasawnna bul tan tu ni zel turin a fuih a. Minister chuan society chu dan leh hrai hnuaia awm a nih avangin member te fimkhur turin leh dan awmsa te ngai pawimawh turin a ngen bawk a. Kum 18-40 inkar in an hmantheih Farmer's Pension Scheme ngai pawimawh a, Common Service Centre hnai bera in register thar leh turin a ngen a. Kut hnathawktuten Kum 60 an kai huna, Pension Rs 3000 zet thlatin an lak theihna tur scheme tha, Mizoram puma ti mi 200 bawr vel chauh an awm chu pawi a tih thu leh, Farmer's Pension Scheme chu Maubuang atanga lo alh chhuaka tan la turin khaw mipuite a sawm bawk a ni.

He hun hi Maubuang Consumer Co-operative Society Vice Chairman Pu B. Lalmawia'n kaihruaiin, Upa Lalbiaksanga'n hunserh a hmang a. Apex Bank Chairman Pi T.Lalmuanpuii'n PACS kalhmang te sawiin, kut hnathawktute tan tlem lua awm lo a pawisa khawlna leh dahthatna tha tak anih avangin PACS member leh account hawng pung zel se, a tih thu sawiin, thahnemngai tan chuan dinchhuahpui theihna hmanrua, loan te pawh lak theihna a ni, tiin a sawi.

Maubuang Consumer Co-operative Society hi Kum 1974-ah din a ni a, kum 1994-ah retailer hna an thawk tan a, kum 1996 atangin ngelnghet zawka kalpui niin, hardware chi hrang hrang, eichawp damdawi, chhungkaw mamawh bungrua zawrh tan a ni a. Consumer Co-operative Society hi thlatin audit thin a ni a, tun dinhmunah hian bungrua chi hrang hrang 1700 atanga 1800 vel zawrh a ni a. Nikhata Maubuang Consumer Co-operative Society Treasurer hnena submit thin hi a tlangpuiin Rs 12000/- vel a ni a. Nikum lama Society inhralhna zawng zawng belhkhawm hi cheng nuai sawmthum pakhua chuang a ni. Maubuang atanga bank hnai ber, Aibawk a mi chu dawr turin km 12 vel kal ngai a ni a, Maubuang Consumer Co-operative Society ten sumdawnna an kalpui hi a awlsam zawk nan Primary Agriculture Credit Co-operative Society (PACS) Ltd. Maubuang hi hawn a ni ta a ni.

Maubuang hi Mizo Lal Bawih chhuah hmasa ber, Khawvelthanga'n Kum 1903-a a din a ni a, hlaphuah thiam Awithangpa, B.Hawla, Upa Suaka te khua a nih bakah thu leh hla lama miril Pu R. Vanlawma sei lenna khua a ni bawk a ni. Tunah hian chhungkua 174 awmin mihring 776 an cheng a ni. Consumer Cooperate Society ah hian chhungkua 27 member an ni mek a ni.