2564/2022-2023
Aizawl the 7th 2022: Shyama Prasad Mukherji Rurban Mission (SPMRM) scheme hi Rural Development Department hnuaia hmalakna niin Thingtlang miten khawpui mite hmasawn ruala hma an lo sawn ve theihna tur leh ei leh bar zawn kawnga hmasawn zel theihna tura hmalakna scheme a ni a. Kum 2016 February thla khan Prime Minister in a tlangzarh a ni. India ram pumah Cluster 300 a awm mek a. Chung zingah chuan Aibawk Cluster (Aizawl District) chu India ram cluster zinga project zo thei hmasa ber a ni. Chumai bakah Government of India in MIS hmanga tehna hrang hrang hmanga a tehna leh endikna ranking a siamah India ram puma Cluster zingah Aibawk Cluster chu pakhatna (Rank No. 1 & Score: 98.86) a ni mek bawk a ni.
Rural Minister Pu Lalruatkima, Rural Development kaihhruaina hnuaiah Mizoram Sawrkar RD Department chuan theihtawp chhuahin hma a la a. Aibawk Rurban Cluster hian hna ruahman 48 an zo fel a. A ram cover zau zawng hi 522 sq. km bial niin, khua (village) 11 ah hmalak niin, mihring 10,963 bawr vel an cheng a ni. Aibawk Cluster hi Aizawl atanga hnai tak a nihna hian hmasawnna lamah kawng tam takin a pui a ni. Mamawh tharchhuah leh hralh kawngahte he Mission hnuaiah hian kalpui a ni a. Thlai thar chhuah te bazar hmuna phurh thlen a nih theih nan Agri link-road, footpath leh khawchhung inkalpawhna te thawh a ni bawk. Hmalakna dang tam tak zingah thlai leh thei chi hrang chin kawngah hmalak a ni bawk a. Tourism tih hmasawn kawngah te pawh hmalak a ni a. Hmunhlui leh ramngaw humhalh chungchangah hmalak a ni bawk a ni.
Ei leh bar tih changtlun kawnga hmalakna te pawhin khawtual mi te zingah awmze nei zawkin rahtha a chhuah a. He scheme hnuaia hmalakna hrang hrang Dragon fruit chin te, Vawk leh Ar vulh, Nature trail project, Rurban Eco Estate (Phulpui) leh Nature Park te hi an tel bawk a. He scheme hian khawtual miten an chhawr tangkai tur thlai tharchhuah zawrh leh hralhna tur hmun changtlung tak Sateek khuah Wholesale Market a buatsaih sak bawk a ni.
Heng bakah hian kawng, foothpath, tuiluankawr, tui lakna leh car parkna hmun te siam a ni a. Mipui vantlang in an mamawh Conference Centre-te sak niin School building sak leh siamthat te thawh a ni bawk a ni. Thalaiten infiamnaa hma an sawnna tur a tan Badminton court leh Futsal ground tha tak siam sak an ni bawk a ni.
Central leh State Sorkar tangkawp leh khawtual mite thawhhona tha tak zarah SPMRM (Rurban) hnuaia thlingtlang tihhmasawn kawnga hmalakna chuan rahbi thar a kai mek a ni.
SPMRM (Rurban) Aibawk Cluster hnuaia hnathawh langzar zual thenkhat te:
- Wholesale Market cum Guest House, Sateek
- Eco Tourism Nature Trail – Zawlpala thlan tlang
- Poultry Farming
- Cultivation of Oyster Mushroom project
- Mizoram Orchid Centre, Maubuang
- Rainwater Harvesting Project, Maubuang
- Futsal ground , Sateek leh Melriat
- Badminton court, Sateek
- Nursery Classroom project
- Cluster Training Centre etc.,
