Vawiin khan zalenna sualtu leh India ram pumkhata siamtu zinga langsar ber pakhat,  Sardar Vallabhai Patel piancham vawi 143-na pualin ' Ram leh Hnam Inpumkhatna Ni(Rashtriya Ekta Diwas)'  chu khua leh tui ten an hmanga. Mizoramah pawh he ni puala a lawmna inkhawm lianber chu tukin zing khan Sipai Lammualah Larsap Kummanam Rajasekharan hova hman a ni.

Aizawl khawpuiah chuan Ram leh Hnam Inpumkhatna Ni pual hian thuang hnihin 'Inpumkhatna Kawngzawh' neih a ni a. Inpumkhatna Kawngzawha pawl khat zawk chu Sikulpuikawn atangin Chief Secretary Pu Arvind Ray chuan a vai liam a.  Pawl hnihna chu School Education Commissioner & Secretary Pi Esther Lalruakimi chuan  Chanmari kawn atangin a vai liam thung a ni. Kawngzawhte chu Sipai lammualah an intawk khawma. Sipai Lammualah hian Rashtriya Ekta Diwas puala programme buatsaih pawh hman nghal a ni a. He hunah hian March Past Contingent panga - 46 Assam Riffles Pipe Band, 90 Border Security Force, 1st Bn Mizoram Armed Police leh 3rd Bn Mizoram Armed Police te inlanin Hnam Puanzar chibai an buk a ni. 

Rashtriya Ekta Diwas programme-ah hian  India khua leh tu te tana inpumkhatna leh ram venhimna kawnga intiamna thuchham chu Larsap Kummanam Rajasekharan chuan a kaihruai a. He ni puala Larsap thuchahin a chhunzawm nghal a  ni.

Larsap Kummanam Rajasekharan chuan  Sardar Vallabhai Patel chu hruaitu ropui chungchuang, India ram pumkhata siam a nih theihna atana Lalram 500 chuang India ram chhunga telkhawmtu. Administration-ah pawh hmahruaitu, All India Services pawh siamtu, kawng tam taka India ram hmasawnna atana a bul tantu leh  India chu ram ropui a nih theihna atana kawng tin renga hnathawktu ropui a ni a ti a. "India ram tana a hnathawh ropui tak tak te avang hian amah zah, chawimawi leh ngaihsan hi India khua leh tui ten kan bat a ni", a ti a. Mizoramah pawh Aizawl bakah District tinah he ni hi hman a nih thu sawiin Mizoram mipuite pawh India ram a lo ropui zual zel nana thawk zel tur leh inpumkhatna kawnga theih tawp chhuah zel turin a sawm nghal bawk a ni.

Rashtriya Ekta Diwas(Inpumkhatna Ni) hi kum 2014 October 31 khan 'Indian  Pa Rorum'  leh  ' India pumkhata Siamtu'  tia hriat, Sardar Vallabhai Patel piancham vawi 139-na pualin India ram pumah hman tan a lo ni a. Vawiinah hian Sardar Vallabhai Patel zahna lantirna leh a piancham lawmna denchhenin  Prime Minister Narendra Modi chuan  Metre 182 a sang, khawvela milim sangber, 'Statue of Unity' tia hming vuah, Rs 2989 Crore a siam, Sardar Vallabhai lim chu Narmada Luipui thliarkar, Rajpipla, Gujarat-ah a hawng dawn a ni.